سوت ءجارىسسوزى كەزىندە پروكۋرور سىچەۆتى بەس جىلعا تۇرمەگە كەسۋدى سۇراعان. ول رەسەي ۋكراينادان اننەكسيالاپ العان قىرىمدى ايتا كەلىپ، «سىچەۆ ءوز ارەكەتىمەن ورىس ۇلتى وكىلدەرى باسىم ايماقتا سەپاراتيستىك كوڭىل-كۇيدى قالىپتاستىرۋعا تىرىستى» دەپ مالىمدەگەن.

رەسەيلىك «ۆكونتاكتە» الەۋمەتتىك جەلىسىندەگى «پودسلۋشانو ۆ ريددەرە» پاراقشاسى ادمينيستراتورلارىنىڭ ءبىرى بولعان سىچەۆ بيىل كوكتەمدە توپ پاراقشاسىندا «داۋىسقا سالۋ ريددەر قالاسىندا ءوتىپ جاتىر دەپ ەلەستەتىپ كورەيىك» دەگەن تاقىرىپپەن ساۋالناما جاريالاپ، وقىرماندارعا شىعىس قازاقستان وبلىسىن رەسەي فەدەراتسياسى قۇرامىنا قوسۋدى «قولدايمىن» نەمەسە «قارسىمىن» دەپ جاۋاپ بەرۋدى ۇسىنعاننان كەيىن وعان ايىپ تاعىلعان.

تەرگەۋ بارىسىنداعى جانە سوت پروتسەسىندەگى ايىپتاۋلاردىڭ ەشقايسىسىمەن كەلىسپەگەن يگور سىچەۆ سوت شەشىمىنە قارسى شاعىمدانباق.

اباي-اقپارات