قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ازاماتتىق سەكتور وكىلدەرىمەن بىرلەسىپ سىبايلاس جەمقورلىقپەن كۇرەس ماسەلەلەرى بويىنشا اشىق كەلىسىمگە كەلۋ  جوباسىن دايىندادى. كەلىسىمنىڭ ماقساتتارى مەن  مىندەتتەرىن تەرىستەي المايمىز. تەك «مەدالدىڭ ەكىنشى جاعىنا» ءۇڭىلۋدى دۇرىس كوردىك.

سوڭعى جىلدارى قوعامدىق سانادا «سىبايلاس جەمقورلىقپەن كۇرەستى  قارجىلىق-وندىرىستىك توپتار قارسىلاستارىن تەمىر توردىڭ ار جاعىنا توعىتۋدىڭ تاسىلىنە اينالدىرىپ العان» دەگەن پىكىر قالىپتاستى.  ەندى قانداي دا ءبىر شەنەۋنىك سوتتالسا، وعان اياۋشىلىق سەزىممەن قارايمىز...  وزىنە-ءوزى قول جۇمساعان مەملەكەتتىك قىزمەتكەرلەردى كلاندارارالىق  شايقاستىڭ قۇربانىنا جاتقىزىپ،  ابىرويى، لاۋازىمى،  باس بوستاندىعى، دۇنيە-مۇلكى تاقىمى مىقتىلاردىڭ كوكپارىنا اينالار تۇستا جۇيكەسى سىر بەرگەن عوي... – دەپ مۇسىركەيتىنىمىز دە  راس.

ءسىرا، قازاقستان بيلىگى گرۋزيا پرەزيدەنتى سەكىلدى كلانداردىڭ ء تۇپ-تامىرىنا بالتا شابا المادى. دەمەك، ءبىزدىڭ  قوعامدا كلاندارارالىق شايقاستار دا، سىبايلاس جەمقورلىق تا جويىلمايدى! ەندەشە اۋەلدەن بەرى كۇشتىك قۇرىلىمداردىڭ مىندەتىنە جاتاتىن جەمقورلىقپەن كۇرەستى بۇدان بىلاي  ازاماتتىق قوعامنىڭ دا موينىنا جۇكتەپ قويۋ دۇرىس پا؟ اسىرەسە، باق وكىلدەرىن  كۇرەسكە تارتۋعا قانداي مۇقتاجدىق بار؟ ونسىز دا جەمقورلىقتى جەلەۋ ەتىپ، ءارىسى اق ورداداعى، بەرىسى اكىمدىكتەرىندەگى شەنەۋنىكتەردى سىناپ-مىنەيتىن  تاۋەلسىز ءورىستىلدى باسىلىمداردان اقپارات كەڭىستىگى جىرتىلىپ ايرىلادى عوي!

پاۆلودارداعى  «ۆەرسيا»،  «گورودسكايا نەدەليا»، «نوۆوە ۆرەميا» گازەتتەرىندە، سونداي-اق  «pavon.kz»، «pavlodar.gn.kz»، «obozrenie.kz» سايتتارىندا قىلمىستىلىق تاقىرىبىنا كەڭ ورىن بەرىلگەن.  ولاردا نەگىزىنەن ۇلتى قازاق شەنەۋنىكتەر سىنالادى.  ياروسلاۆ گولىشكين، ولگا ۆورونكو، دجاميليا ماريچەۆا سياقتى تاۋەلسىز تىلشىلەر وبلىستىڭ ەكس-اكىمى ەرلان ارىندى سوت شەشىمى شىقپاي تۇرىپ اسا قاۋىپتى قىلمىسكەر كەيپىندە كورسەتىپ باقتى. ال  گولىشكين الگى ءىسىن مىسە تۇتپاي، قازىرگى اكىم قانات بوزىمباۆتىڭ وزىنەن  اسا ءىرى مولشەردە اقشا بوپسالاۋعا كىرىستى! بىراق قالامدى  شوقپارعا اينالدىرعىسى كەلگەن «ۆەرسيا» گازەتىنىڭ رەداكتورى   ايداۋىلداردىڭ الدىندا ء وزى كەتەتىنىن اڭداماي قالدى...  

ۇيىمداسقان قىلمىس پەن سىبايلاس جەمقورلىق تاقىرىبىن تىسقاقتى تىلشىلەر تۇگىل قولىنا جاڭا عانا قالام ۇستاعان  جاس «جۋرناليست-كريميناليستەر» دە  تۋ تالاقاي قىلدى!  بۇلاردىكى بەلگىلى، «اتىڭ شىقپاسا – جەر ورتە» دەگەننىڭ كەرى.  ال  شوۆينيستىك، نيگيليستىك كوزقاراستاعى جۋرناليستەردىڭ پيعىلى مۇلدە باسقا...

ۋكراينانىڭ قىرىم، دونەتسك، لۋگانسك  ايماقتارىنداعى  ءورىستىلدى تاۋەلسىز باق  جەرگىلىكتى بيلىك وكىلدەرىنىڭ قىزمەتى  مەن زورلىق-زومبىلىق،  ۇرلىق-قارلىق، جەمقورلىق قىلمىستارىن بايلانىستىرا قاراستىرىپ، ولاردى جۇرتشىلىققا قۇبىجىق قىلىپ كورسەتكەن. ءسويتىپ، سەپاراتيزمنىڭ ەتەك جايۋىنا قولايلى جاعداي جاساعان. سالدارى  بەلگىلى...

بۇلاردى بىلاي قويعاندا، ءوزىمىزدىڭ شولاق بەلسەندىلەر سىبايلاس جەمقورلىققا  قارسى اتويلاپ اتقا مىنسە، ايانىپ قالماس!..   ەگەر بۇگىنگى جۋرناليستەر وتكەن عاسىردا وقىعان ازاماتتارىمىزدىڭ  «حالىق جاۋلارىن» جاپپاي  اشكەرەلەۋ ءىسىن  ۇلگى تۇتسا، ءالى قانشا «سىبايلاس جەمقورلاردىڭ» وتباسى اڭىراپ قالاتىنىن كىم ءبىلسىن.   

قالاي دەسەم دە، استاناداعى اق جاعالى ۇلىقتارىمىز دايىنداعان الگى كەلىسىم جوباسى كەرەكۋدە جاتقان مەنىڭ كوڭىلىمدە الاڭداۋشىلىق سەزىمىن تۋدىرادى. ء تۇبى   قازاق بيلىگىنىڭ جاعاسىنان ۇستاپ سىلكىلەپ، ابىروي-بەدەلىن اياققا تاپتاۋدى كوكسەيتىندەردى سىبايلاس جەمقورلىقپەن كۇرەسكە تارتۋ – ء  «ۇي ىشىنەن ءۇي تىگىلۋىنە» اپارىپ سوقتىرماي ما؟ مەنى وسى وي مازالايدى.

ارمان قاني، پاۆلودار قالاسى

Abai.kz