الماتىدا «قازترانسگاز» اق باس ديرەكتورىنىڭ بۇرىنعى كەڭەسشىسى سانجار بوكاەۆقا قاتىستى قىلمىستىق ءىس بويىنشا سوت پروتسەسى ءوتىپ جاتىر. پروكۋرور ايىپتاۋ اكتىسىن وقىپ، الاياقتىق جاساۋ، قىلمىستىق جولمەن الىنعان كىرىستەردى زاڭداستىرۋ، گرانيت تاقتالاردى ۇرلاۋدى ۇيىمداستىرۋ، اعاشتاردى زاڭسىز كەسۋ جانە جالعان اقپاراتتى قاساقانا تاراتۋ ارەكەتتەرىنىڭ ءمان-جايىن ەگجەي-تەگجەي باياندادى.

پروكۋروردىڭ ايتۋىنشا، گرانيت تاقتالاردى ۇرلاۋ وقيعاسىن قولدان ءساتتى ۇيىمداستىرعان سوڭ بوقاەۆ قىلمىستىق ارەكەتتەر ارقىلى قوعامدا جالعان داۋ-داماي تۋعىزۋدى جالعاستىرۋدى كوزدەپتى.

2025 جىلدىڭ كۇزىندە ول باۋم توعايىن اباتتاندىرۋ جۇمىستارىن جۇرگىزىپ جاتقان «بازيس-ا» قۇرىلىس كومپانياسى مەن مەملەكەتتىك ورگاندارعا قارسى اقپاراتتىق شابۋىل ۇيىمداستىرۋدى جوسپارلادى. 26 قازانعا تۇركسىب اۋدانىنىڭ تۇرعىندارىمەن كەزدەسۋ بەلگىلەنگەندىكتەن، بوقاەۆ وسى شارا قارساڭىندا قوعامدا ۇلكەن داۋ تۋعىزۋدى كوزدەدى. ول الدىمەن توعايداعى اعاشتاردى جاسىرىن كەسىپ، كەيىن ولاردىڭ ورنىنا كوممەرتسيالىق جىلجىمايتىن مۇلىك سالۋ ماقساتىندا جاسىل جەلەك زاڭسىز ءارى اياۋسىز جويىلىپ جاتىر دەپ جۇرتشىلىقتى دۇرلىكتىرۋدى ويلاستىردى.

وسى ماقساتتا بوقاەۆ پەن ونىڭ جەكە موبيلوگرافى ۇ.نۇسىپقوجا بۇعان دەيىن گرانيت تاقتالاردى ۇرلاۋعا كومەكتەسكەن ا.حامراقۇلوۆقا قايتا جۇگىنگەن. تاپسىرىس بەرۋشىلەردەن اقشا العان حامراقۇلوۆ قالاداعى لومباردتاردىڭ بىرىنەن كادىمگى بەنزينمەن جۇمىس ىستەيتىن ارا ساتىپ العان.

2025 جىلعى 24 قازان كۇنى كەشكى ۋاقىتتا حامراقۇلوۆ جالداعان ادامدار باۋم توعايىنا جاسىرىن كىرەدى. ولار ەكى جارىم ساعات ىشىندە ۇيەڭكى، قاراعان جانە قاراعاشتى قوسا العاندا، 16 اعاشتى ادەيى كەسىپ، زاقىمداعان. سول ءتۇنى، 25 قازاندا، قىلمىس جاسالعاننان كەيىن نۇسىپقوجا ورىنداۋشىلارمەن كەزدەسىپ، ولارعا 100 مىڭ تەڭگە تولەگەن.

جوسپاردىڭ العاشقى بولىگى ورىندالعانىنا كوز جەتكىزگەن ۇيىمداستىرۋشىلار ەندى ونى جۇرتشىلىققا جاريا ەتۋگە كىرىسەدى. سول ءتۇنى بوقاەۆ پەن نۇسىپقوجا شەتەلدىك تەلەفون نومىرىنەن اعاشتاردىڭ كەسىلىپ جاتقانى تۋرالى جاسىرىن حابارلاما العانداي كەيىپ تانىتقان. ولار قول شامدارىن الىپ توعايعا بارادى دا، «بەلگىسىز قىلمىسكەرلەردى» قۋعانداي كورىنىس ۇيىمداستىرىپ، ونى بەينەجازباعا تۇسىرەدى.

كەلەسى كۇنى، 26 قازاندا، اۋدان تۇرعىندارىمەن كەزدەسۋ باستالار الدىندا بوقاەۆ قوعام بەلسەندىلەرىن توعايعا ەرتىپ بارىپ، ءوزىنىڭ تاپسىرماسىمەن كەسىلگەن اعاشتاردى كورسەتكەن. كامەرا الدىندا ول الدەبىر مۇددەلى تۇلعالار تۇرعىن ءۇي كەشەندەرىن سالۋعا جەر بوساتۋ ءۇشىن اعاشتاردى جويىپ جاتىر دەپ مالىمدەگەن.

كەيىن بوقاەۆ مونتاجدالعان بەينەروليكتى Instagram جەلىسىندەگى جەكە پاراقشاسىندا جاريالاعان. ايىپتاۋ تاراپىنىڭ ايتۋىنشا، ول ءوزىن قوعام مۇددەسىن قورعاۋشى رەتىندە كورسەتىپ، الەۋمەتتىك جەلىدەگى وقىرماندارىن ادەيى جاڭىلىستىرعان.

پروكۋرور بۇل ارەكەتتەر ارقىلى ءوزىن «جارنامالاۋدىڭ» سالدارىنان تابيعاتقا جانە «مەدەۋ» مەملەكەتتىك تابيعي پاركىنە ناقتى زيان كەلتىرىلگەنىن اتاپ ءوتتى. وسىعان بايلانىستى بوقاەۆ پەن نۇسىپقوجاعا الدىن الا ءسوز بايلاسقان ادامدار توبىنىڭ قۇرامىندا اعاشتاردى زاڭسىز كەسۋ جانە جويۋ بويىنشا ايىپ تاعىلدى.

Abai.kz