جاقىندا اقتوبە قالاسىندا گرەك-ريم كۇرەسىنەن قر كۋبوگى ءوتتى. ەلىمىزدىڭ 11 وبلىسى ءوز سايىپقىراندارىن قوسقان ءدۇبىرلى دودادا وبلىسىمىزدىڭ سپورتشىلارى توپ جاردى، - دەپ جازادى "وڭتۇستىك رابات" باسىلىمىنىڭ ءتىلشىسى.

ءوڭىرىمىزدىڭ نامىسىن نۇرسۇلتان قالمۇرزاەۆ (59 كەلى), جولدىباي توقباەۆ (59 كەلى), ءادىلحان ساتوەۆ (66 كەلى), رامازان مۇستافاەۆ (75 كەلى), ءشامىل باتىروۆ (75 كەلى) راشيد كوچيەۆ (80 كەلى), اگيت سۋلەيمانوۆ (85 كەلى), ساكەن سەيىتقاليەۆ (130 كەلى), اسحات جامبيروۆ (71 كەلى) جانە ءالىمحان سىزدىقوۆ (98 كەلى) سىندى بالۋاندار قورعادى. سپورتشىلار سايىستا كوماندالىق تۇرعىدا بەلدەسىپ، 8 سالماق بويىنشا باقتارىن سىنادى. ءبىزدىڭ ورەندەر الماتى، قوستاناي، جامبىل وبلىستارىمەن ءبىر توپقا ءتۇسىپ، بۇل كوماندالاردى جارىس جولىنان شىعاردى. الدىمەن جامبىل وبلىسىن 6:2, ازۋلى قارسىلاس الماتىلىقتاردى 5:3, قوستاناي وبلىسىن 5:3 ەسەبىمەن تىزە بۇكتىردى. باستى قارسىلاس الماتىلىق بالۋاندارمەن بولعان بەلدەسۋدە ءادىلحان ساتوەۆ، اسحات جامبيروۆ، رامازان مۇستافاەۆ، اگيت سۋلەيمانوۆ جانە ءالىمحان سىزدىقوۆ سىندى سپورتشىلارىمىز نامىستى قولدان بەرمەي، جەڭىس تۋىن جەلبىرەتتى. ناتيجەسىندە، اقتىق سىنعا ءوتتى.

ءابدىراحمان ارحاربەكوۆ، گرەك-ريم كۇرەسىنەن وبلىستىڭ ەرەسەكتەر اراسىنداعى قۇراما كومانداسىنىڭ اعا باپكەرى:

– سايىس وتە تارتىستى بولدى. كوماندامىز اۋىر توپقا ءتۇستى. الماتىلىق بالۋاندار بايراقتى باسەكەلەردە وزا شاۋىپ جۇرگەندەر عوي. قوستاناي وبلىسىنان كەلگەن سپورتشىلار دا وسال ەمەس. الايدا، شاكىرتتەرىمىز سەنىمدى اقتادى. ءوز توبىمىزدان شىعىپ، فينالدىق ويىنداردا دا ەشكىمگە دەس بەرمەدىك. ناتيجەسىندە، ەل كۋبوگىن قانجىعامىزعا بايلادىق.

وقو گرەك-ريم، ەركىن جانە ايەلدەر كۇرەسى فەدەراتسياسىنىڭ توراعاسى بەرىك وسپانوۆ سىي-سياپات جاسادى. بىراق، ءبىزدىڭ ويلاعانىمىز تەك قارجى ەمەس. كوكەيىمىزدە ەلىمىزدىڭ ابىرويىن اسقاقتاتۋ ارمانى تۇر. وسىنداي قادامنىڭ جەتەگىمەن بۇگىن بەلورۋسسيانىڭ مينسك قالاسىندا وتەتىن وليمپيادا چەمپيونى ولەگ كاراۆاەۆتى ەسكە الۋ تۋرنيرىنە اتتانامىز. ول سايىس تا اقتوبەدەگىدەي كوماندالىق جارىس بولادى. وعان ەل قۇراماسىنان 8 بالۋان قاتىسادى. ونىڭ تورتەۋى ءبىزدىڭ وبلىستان. اتاپ ايتسام، اسحات جامبيروۆ (71 كەلى), ءشامىل باتىروۆ (80 كەلى), اگيت سۋلەيمانوۆ (85 كەلى) جانە ءالىمحان سىزدىقوۆ (98 كەلى). اتالمىش تۋرنيردە 14 ەلدىڭ سپورتشىلارى باق سىنايدى.

ءالىمحان سىزدىقوۆ، گرەك-ريمنەن قر كۋبوگىنىڭ جەڭىمپازى:

– توپتىق كەزەڭدە قر، ازيا چەمپيونى جانە ستۋدەنتتەر اراسىندا الەم بىرىنشىلىگىنىڭ جەڭىمپازى الماتىلىق مارعۇلان اسىمبەكوۆپەن وتكەن كەزدەسۋ وتە اۋىر بولدى. ال فينالدىق ويىندا اقتوبەلىك جاناربەك قابدولوۆ تا ايتارلىقتاي قيىندىق تۋدىردى. دەگەنمەن، ەكى بالۋاننان دا 1:0 ەسەپتەرىمەن ايلامدى اسىرا الدىم. قالعان ءۇش كەزدەسۋدە قارسىلاستارىمدى ايقىن باسىمدىقپەن جەڭدىم.

اسحات جامبيروۆ، گرەك-ريمنەن قر كۋبوگىنىڭ جەڭىمپازى:

– تارازدىق قۋاندىق نۇرعالىمدى 8:0, قوستانايلىق بالۋاندى 6:4 ەسەبىمەن تىزە بۇكتىردىم. ال، باستى قارسىلاسىم الماتىلىق دەمەۋ جادىراەۆتى 4:0 ەسەبىمەن جەڭدىم. اقتىق باسەكەدە قاراعاندىلىق يبراگيم ماگومەدوۆتى ايقىن باسىمدىقپەن، ال اقتوبەلىك نۇرتاس وتەپبەرگەنوۆتى 2:0 ەسەبىمەن ۇتتىم.

فينالدىق ويىنداردا ءبىزدىڭ كوماندا قاراعاندى وبلىسى مەن جارىس قوجايىنى اقتوبەلىكتەردى 5:3 ەسەبىمەن جەڭىپ، كۋبوكقا قول جەتكىزدى.

اتالمىش سايىس بارىسىندا وبلىسىمىزدىڭ بالۋاندارى تاماشا ونەر كورسەتتى. ءتىپتى، اراسىندا بەس كەزدەسۋدە دە جاۋىرىنى جەرگە تيمەگەن جىگىتتەر بار. ولار – اسحات جامبيروۆ پەن ءالىمحان سىزدىقوۆ. وسى رەتتە وبلىستىڭ ەرەسەكتەر اراسىنداعى قۇراما كومانداسىنىڭ اعا باپكەرى ءابدىراحمان ارحاربەكوۆ جانە جاتتىقتىرۋشىلار بيسولت دەتسيەۆ، نۇرلان جىلقىايداروۆ، حاكيم مۋساەۆ، الەكساندر ەرشوۆ پەن ساددات گەلاشۆيليدىڭ ەڭبەكتەرى ەرەن ەكەنىن ايتا كەتكەن ءجون. ءوز كەزەگىندە وقو گرەك-ريم، ەركىن جانە ايەلدەر كۇرەسى فەدەراتسياسىنىڭ توراعاسى بەرىك وسپانوۆ وبلىستىڭ مارتەبەسىن بيىكتەن كورسەتكەن سپورتشىلار مەن باپكەرلەردى قابىلداپ، سىي-سياپات جاسادى. قابىلداۋ كەزىندە بەرىك سەرىكۇلى: ء«بىز ماراپات ءۇشىن ەمەس، وڭتۇستىكتىڭ اتاعىن شىعارۋ جولىندا جۇمىس جاساۋىمىز قاجەت. وڭىردە فەدەراتسيا قۇرىلعالى جاقسى ناتيجە كورسەتىپ كەلەمىز. وسى قارقىننان تايماي، وليمپياداعا جولداما الىپ، ەل نامىسىن لايىقتى قورعاۋلارىڭىزعا تىلەكتەسپىن» – دەدى.

ايتا كەتەيىك، اقتوبەدەن ولجالى ورالعان بالۋانداردىڭ ىشىندە اگيت سۇلەيمانوۆ پەن ءشامىل باتىروۆتان وزگەلەرى نيكولاي ستاۆيتسكي باسشىلىق ەتەتىن وقو جەكپە-جەك مەكتەبىندە جاتتىعادى.

ءادىلحان ابايۇلى

Abai.kz