رەسەي ارمياسى اسكەري-عارىشتىق كۇشتەرىنىڭ قولباسشىسى ۆيكتور بوندارەۆ رەسەيدىڭ سيرياعا زەنيتتىك زىمىران كەشەندەرىن جەتكىزگەنىن راستاپ، ەندى ويىنداعىسىن ىستەۋگە كىرسكەنىن ايتتى. 5 قاراشادا "كومسومولسكايا پراۆدا" باسىلىمىندا جاريالانعان سۇحباتتا بوندارەۆ ارتيللەريانى "بارلىق ىقتيمال قاۋىپ-قاتەرگە جاۋاپ بەرۋ" ءۇشىن جونەلتتىك دەدى.

ول مىسال رەتىندە "سيرياعا كورشى ەلدە اسكەري ۇشاقتاردى ايداپ اكەتىپ، رەسەي اسكەرىنە قارسى پايدالانۋى مۇمكىن" ەكەنىن كەلتىرگەن. بىراق بوندارەۆ سيرياعا ناقتى قانداي زىمىرانداردىڭ ورنالاستىرىلعانى تۋرالى جاق اشپادى، "كومسومولدىڭ" ءتىلشىسى دە ونى تىقاقتاپ سۇراماعان سياقتى.

بوندارەۆتىڭ سوزىنشە، سيريادا رەسەيدىڭ 50-دەن استام اسكەري ۇشاعى مەن تىكۇشاعى بار.

كەشە اقش مەملەكەتتىك دەپارتامەنتىنىڭ ەۋرازيا جانە ەۋروپا ىستەرى بويىنشا كومەكشىسى ۆيكتوريا نۋلاند رەسەي سيريانىڭ حومس پەن حاما قالالارى ماڭىنداعى سوعىس قيمىلدارى ءجۇرىپ جاتقان اۋداندارعا اۋىر ارتيللەريا مەن قۇرلىقتاعى اسكەرىن ورنالاستىردى دەپ مالىمدەگەن.

ماسكەۋ قىركۇيەكتىڭ سوڭىندا سيريادا اۋە شابۋىلدارىن "تەرروريستەردىڭ كوزىن جويۋ" ءۇشىن باستاعانىن ايتادى. بىراق اقش پەن ونىڭ وداقتاستارى رەسەي اسكەري وپەراتسيانى سيريا پرەزيدەنتى باشار اسادتى كۇشەيتۋ ءۇشىن باستادى دەيدى.

اباي-اقپارات