2015 جىلدىڭ 31-قازانىنان باستاپ الماتىنىڭ "الماتىەلەكتروترانس"  ترامۆاي دەپوسى ءوز جۇمىسىن ۋاقىتشا توقتاتادى. مۇنداي شەشىمدى الماتى قالاسىنىڭ اكىمى باۋىرجان بايبەك باستاعان ارنايى كوميسسيا ترامۆاي دەپوسىندا ءجىتى تەكسەرۋ جۇرگىزگەننەن كەيىن شىعارعان. بۇل تۋرالى abai.kz پورتالى "الماتىەلەكتروترانس" جشس-ءنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

الماتى قالاسىنىڭ اكىمى باۋىرجان قادىرعاليۇلى ءوزى باستاپ، كوميسسيا مۇشەلەرى ترامۆاي دەپوسىنا بارىپ، ونىڭ جۇمىسىمەن تانىسقان سوڭ، قوعامدىق كولىك دەپوسىنىڭ باسشىلىعىنا بىرقاتار تاپسىرمالار بەرىپ، ترامۆايلاردىڭ وسى كۇيىندە قالا تۇرعىندارىنا قىزمەت كورسەتە المايتىندىعىن ايتقان.

اكىم مىرزانىڭ قوعامدىق كولىك دەپوسىن جابۋ تۋرالى شەشىمى ۋاقىتشا دەگەنىمىزبەن، رەسمي حابارلامادا دەپو جۇمىسشىلارىنىڭ ەش ءبىرى قىسقارتىلمايتىنى، ەڭبەكاقىلارى ساقتالا وتىرىپ، وزگە جۇمىستارعا اۋىستىرىلاتىنى ايتىلعان. بۇل دەگەنىڭىز قالانىڭ تاريحي كەلبەتىن ايشىقتاپ تۇرعان ترامۆاي جەلىلەرى ءبىر جولاتا جابىلادى دەگەن ءسوز بە

ەندى ساراپتايىق. الماتى ترامۆايلارى قالاداعى ماڭىزدى قوعامدىق كولىك ءتۇرىنىڭ ءبىرى بولىپ تابىلادى.  جەلىلەر ەسكى بولعاندىقتان كۇردەلى جوندەۋدى تالاپ ەتەتىنى تاعى راس.

2014 جىلى الماتى قالاسىندا ترامۆايدىڭ قاتىسۋىمەن 20 كولىك اپاتى تىركەلسە، 2015 جىلدىڭ 9,5 ايىندا بۇل كورسەتكىش 43-ءتى قۇراعان. مىسالى، 21-قىركۇيەك كۇنى ترامۆاي ۆاگونى باسقارۋدان شىعىپ، ترامۆاي جەلىسىنىڭ ماڭىنداعى جولداعى بىرنەشە كولىكتى زاقىمداعان. سول ءبىر اپارت كەزىندە 4 ادام ءتۇرلى جاراقات الىپ، 14 كولىك قيراعان بولاتىن. ال 13-قازان كۇنى №6-ترامۆاي جولعا ششىعىپ كەتىپ، 4 ادام اۋىر جاراقات الىپ، اۋرۋحاناعا تۇسكەن. ءدال وسىنداي ترامۆايدىڭ قاتىسۋىمەن بولعان اپاتتار سانى 43-تەن اسىپ وتىر. ونىڭ ۇستىنە ترامۆاي ەلەكتر قۋاتى ارقىلى قوزعالاتىندىقتان، قالانىڭ كەيبىر كوشەلەرىندە كەپتەلىس تۋدىراتىنى تاعى بار دەلىك.

وسىنداي فاكتىلەردى جىپكە ءتىزىپ كەلگەن اكىم مىرزا بۇگىن ترامۆاي دەپوسىنىڭ قالا تۇرعىندارىنا قىزمەت كورسەتۋ ساپاسىنىڭ تومەندىگى سالدارىنان، دەپونى ۋاقىتشا جابۋ تۋرالى شەشىم شىعارعان.

بۇل جاڭالىقتى ەستىگەن قالا تۇرعىندارىنىڭ كەيبىرى اكىم شەشىمىن دۇرىس دەپ باعالاسا، ەندى ءبىر توبى شەشىممەن كەلىسپەيدى. دەسەك تە سوڭعى كەزدەرى ترامۆايلاردىڭ قاتىسۋىمەن ورىن العان جول كولىك وقيعالارى جيىلەپ كەتكەنى راس. ساراپشىلار بۇل ترامۆاي جەلىلەرىنىڭ ەسكىلىگىنەن بولدى دەسە، ەندى بىرەۋلەرى دەپو باسشىلىعىنىڭ سالعىرتتىعى دەيدى. نە دەگەنىمىزبەن، ترامۆاي دەپوسىن جاۋىپ تاستاعانىمىزبەن، ماسەلەنىڭ شەشىلمەيتىنى راس.

ايتپاقشى، ەستەرىڭىزدە بولسا، 2013 جىلى سول كەزدەگى قالا اكىمى  12 سۋ جاڭا ترامۆاي اكەلگەنىن قۋانا حابارلاعان ەدى عوي. جاڭا ترامۆايلار كەلىپ، جەلىلەر جاڭارتىلدى، بۇل قالا تۇرعىندارىنا تارتۋ دەپ كولگىرسىگەن احمەتجان مىرزانىڭ ترامۆايلارى تىرايىپ قالعانى نەسى؟

چەحيادا جاسالعان 12 ترامۆايدى گەرمانيادان 20 ميلليارد تەڭگەگە ساتىپ العان ەدىك. بىزگە سۋ جاڭا دەپ اكەلگەن ترامۆايلار بالەنباي جىل گەرمانيا كوشەلەرىندە توز-توزى شىققاندىعى تۋرالى اقپارات سول كەزدىڭ وزىندە باق-تا از جازىلماعان ەدى. 

سونىمەن، الگى 20 ميلليارد قايدا جوعالدى؟ جاماپ-جاسقاعان ترامۆاي تۇككە جارامسىز بولىپ قالعانى نەسى؟ الدە، بۇل احمەتجان مىرزانىڭ ايلاكەرلىگىنىڭ كورىنىسى مە؟ وۋ، سونشاما قارجى شىعارىپ، ساتىپ العانىمىز تىم قۇرىعاندا 5 جىل پايدالانبادىق. بۇعان جاۋاپتى كىم بەرەدى؟

نۇرگەلدى ابدىعانيۇلى

abai.kz