26 قازاندا قاراعاندى وبلىستىق سوتىندا «احمەتوۆ ءىسى» بويىنشا كۋاگەرلەردەن سوتتا جاۋاپ الۋ ودان ءارى جالعاستى.

قاراعاندى قالاسىنىڭ يندۋستريالدىق پاركىندەگى ينفراقۇرىلىمدىق نىسانداردىڭ قۇرىلىسىن سالۋ كەزىندە بيۋدجەت قاراجاتىن ۇرلاۋ تۋرالى ەپيزود بويىنشا «مەملەكەتتىك ەكسپەرتيزا» رەسپۋبليكالىق مەملەكەتتىك كاسىپورنىنىڭ ساراپشىسى تاتيانا تۋمانوۆا ءسوز سويلەدى. ول ءوز سوزىندە يندۋستريالدىق پاركتەگى ينفراقۇرىلىمدىق نىساندار «مەمەكسپەرتيزانىڭ» تۇجىرىمىنسىز سالىنعانىن مالىمدەدى.

«يندۋستريالدىق پاركتەگى شارۋاشىلىق-تۇرمىستىق سۋاعارلار ستانتسياسىنىڭ قۇرىلىسى بارىسىندا نەگىزىنەن، جوبانىڭ تەحنولوگيالىق بولىگىنە قاتىستى تۇزەتۋلەر ەنگىزىلدى. الدىمەن اعىن سۋلاردى تازالاۋعا ارنالعان «USB» تەحنولوگياسى جۇمىسقا قابىلدانعان ەدى. بۇل جوبانى «ساۋلەت» جشس-ءنىڭ ماماندارى جۇزەگە اسىردى. سودان كەيىن جاڭا جوبالاۋشىلار پايدا بولدى. ءسويتىپ، شارۋاشىلىق-تۇرمىستىق سۋاعارلاردى تازالاۋ تەحنولوگياسى كۇرت وزگەردى. جاڭا جوبالاۋشىلار مۇنىسىن چەحتىڭ «USB» تەحنولوگياسىنا قاراعاندا ارزانعا تۇسەتىندىگىمەن ءتۇسىندىردى. ال قوندىرعىنىڭ ءوزى چەحتاردىڭ قوندىرعىسىنا ۇقساس دەگەندى ايتتى. ءسويتىپ، ءبىز وسى تەحنولوگيانى قاراستىرا باستادىق»،- دەپ ءتۇسىندىردى ءىستىڭ ءمانىسىن ت. تۋمانوۆا.

ونىڭ ايتۋىنشا، تەحنولوگيانى قاراستىرۋ بارىسىندا «مەمەكسپەرتيزاعا» قۇزىرلى ورگانداردىڭ بىرىنەن بىرەۋ قوڭىراۋ شالىپ، ساراپتاماعا جارتىلاي سالىنىپ بىتكەن نىساننىڭ ماتەريالدارى ۇسىنىلعانىن حابارلاعان. سول كەزدە مەنەن: ء«سىز بۇل نىسانداردىڭ كوپشىلىك بولىگى سالىنىپ ءبىتىپ، پايدالانۋعا بەرىلگەنىن بىلەسىز بە؟ اتقارىلعان جۇمىستاردىڭ اكتىسى بار ما؟» دەپ سۇرادى. بىراق مەنىڭ بۇل ىستەن ەش حابارىم جوق ەدى. سول سەبەپتەن مەن اتالعان نىساننىڭ قۇرىلىسى ءىس جۇزىندە اياقتالعانى تۋرالى ەشتەڭە بىلمەيتىنىمدى ايتىپ، تۇسىنىك حات جازدىم. ودان كەيىن بىزگە تاعى دا قۇجاتتار كەلىپ ءتۇستى، وندا قايتادان تۇزەتۋلەر ەنگىزىلىپتى. كوپ ۇزاماي قارجى پوليتسياسى قىزمەتكەرلەرى كەلىپ، بارلىق قۇجاتتاردى الىپ قويدى،- دەپ اڭگىمەلەدى ت. تۋمانوۆا.

اتالعان نىساننىڭ جوبالىق-سمەتالىق قۇجاتتاماسىن قاراۋ بارىسىندا «مەمەكسپەرتيزا» رمك-نىڭ ساراپشىلارى تاراپىنان كوپتەگەن ساۋالداردىڭ تۋىنداعانىن وسى مەكەمەنىڭ قىزمەتكەرى گۇلنار ارتەكوۆا دا راستادى. ول سوت وتىرىسىندا كەز-كەلگەن نىساننىڭ قۇرىلىسىندا تەحنولوگيانى اۋىستىراتىن جاعدايدا جوبا مەملەكەتتىك كوميسسيانىڭ قايتا تەكسەرۋىنەن وتۋگە تيىستىگىن مالىمدەدى. ساراپشى شارۋاشىلىق-تۇرمىستىق سۋاعارلار ستانتسياسىنىڭ جوباسىندا ەكى تەحنولوگيانىڭ سالىستىرمالى سيپاتتاماسى بولماعانىن اشىپ ايتتى. «جوبا العاش رەت 2013 جىلى تۇزەتۋگە جىبەرىلدى. ءبىز وسىعان وراي، ەكى ءتۇرلى سالىستىرمالى سيپاتتامانىڭ بولۋىن سۇراپ، حات جازدىق. سەبەبى تۇزەتۋدە ەكى نۇسقانىڭ ءبىرىنىڭ سالىستىرمالى تۇردە ارتىقشىلىعى كورسەتىلەدى. بىراق ونداي سيپاتتاما اقىرى بولمادى. بىزگە كوبىنەسە ەكونوميكالىق بولىككە قاتىستى قۇجاتتاردى جىبەردى»،- دەدى گ. ارتەكوۆا سوتتا.

ءامينا باكىر

Abai.kz