كەلمەسكە كەتكەن كەڭەستىك جۇيەنى اڭساپ، قازاقتىڭ كوزىنە كوك شىبىن ۇيمەلەتكەن سول ءبىر ءداۋىردىڭ قايتا ورالۋىن كوكسەيتىندەر CCCر دەگەن جازۋى جانە كەڭەستەر وداعىنىڭ ەلتاڭباسى بەدەرلەنگەن كولىك ءنومىرىن بەكىتەتىن قۇرال پايدالانا باستاپتى. 

«كوشەدە كەلە جاتىپ، اپپاق لەكسۋس اۆتوكولىگىنىڭ نومىرىنە كوزىم تۇسە كەتكەنى. انىقتاپ قاراسام، ءنومىر-بەكىتكىشتە «سسسر» دەگەن جازۋ مەن كسرو-نىڭ ەلتاڭباسى تۇر. قازاق ەلىندە ءجۇرىپ، مەملەكەتتىلىگىنە پىسقىرماعان ازاماتتىڭ ماشيناسىنىڭ مەملەكەتتىك ءنومىرىن سۋرەتكە ءتۇسىرىپ جاتىپ، تاعى ءبىر قىزىققا تاپ بولدىم. وندا دا – سسر دەگەن جازۋ تۇر. مىنە، مەملەكەتتىك تىركەۋ ءنومىرى مىنانداي: «ا 301 سسر». بۇل كەزدەيسوقتىق پا، جوق الدە... 

كسرو ءداۋىرىن اڭساعان اتالمىش كولىك الماتى قالاسىنداعى پۋشكين مەن گوگول كوشەلەرىنىڭ قيىلىسىندا تۇر ەكەن. الماتى قالاسىنىڭ بۇل تۇسى كەڭەستەر كەزەڭىن ەرىكسىز ەسكە تۇسىرەدى. مىسالى، كوك بازاردىڭ اينالاسىندا كەڭەستىك ءداۋىردىڭ ەسكى-قۇسقى زاتتارىن ساتاتىن شال-كەمپىرلەر جەتەرلىك. اسكەري كيىم كيگەن ازاماتتار دا ءجيى كوزگە تۇسەدى (وفيتسەرلەر ءۇيى دە بۇل ماڭنان الىس ەمەس). سونداي-اق، بۇل جەردە 28 پانفيلوۆشىلار پاركى ورنالاسقانى بەلگىلى. سول پاركتەگى 28 پانفيلوۆشىلارعا ارنالعان مەموريالدى ەسكەرتكىشتە «ۆەليكا روسسيا، ا وتستۋپات نەكۋدا، پوزادي موسكۆا. پوليتۋرگ ۆ.كلوچكوۆ» دەگەن جازۋ تۇرعانىن بىلەسىزدەر... پوليتۋرگ ۆ.كلوچكوۆتىڭ "ۇلى رەسەي" دەپ جار سالعان وتىرىك ءسوزى بىزگە ۇران بولماۋى ءتيىس ەمەس پە؟. كۇمبەزى كوك تىرەگەن شىركەۋ ماڭىن قازاقىلاندىراتىن كەز كەلگەنىن ءبىزدىڭ اتقامىنەرلەر نەگە ويلانبايدى.

قازىر كوشەدە رەسەيدىڭ تۋىن تاراتاتىندار كوبەيىپ بارادى. مۇنىڭ استارىندا قانداي ساياسات جاتىر؟ ء«نومىر-بەكىتكىشتىڭ» وزىمەن-اق تاۋەلسىزدىگىمىزدى مويىنداماي جۇرگەندەرگە نە ىستەمەك كەرەك؟ ساۋال بىزدەن، جاۋاپ سىزدەن بولسىن!

ءشارىپحان قايسار

Abai.kz