سيرياعا تاياۋ تۇركيانىڭ اۋە كەڭىستىگىندە وتكەن جۇما كۇنى تۇرىك اسكەرلەرىنىڭ اتىپ تۇسىرگەن ۇشقىشسىز ۇشاتىن اپپارات رەسەيدە وندىرىلگەن بولىپ شىقتى. الايدا ماسكەۋ انكاراعا بۇل اپپاراتتىڭ رەسەيگە تيەسىلى ەمەس ەكەنىن ايتقان. وسىلاي دەپ دۇيسەنبى كۇنى تۇركيانىڭ پرەمەر-ءمينيسترى احمەت داۆۋتوگلۋ AHaber تەلەارناسىنا مالىمدەدى.

تەلەارناعا بەرگەن سۇحباتىندا داۆۋتوگلۋ ۇشقىشسىز اپپاراتتىڭ سيريا پرەزيدەنتى باشار اسادتىڭ اسكەرىنە نە بولماسا كۇرد ميليتسياسىنا تيەسىلى بولۋى مۇمكىندىگىن جوققا شىعارمايدى. ول رەسەيدىڭ ۇشاقتارىنىڭ تۇركيا اۋە كەڭىستىگىن باسىپ وتكەن جاعدايدان كەيىن وتە مۇقيات بولاتىن شىعار دەپ ۇمىتتەنەتىنىن دە جەتكىزدى.

16 قازاندا تۇركيا كۇشتەرى سيريا شەكاراسىنا تاياۋ ۇشىپ جۇرگەن اپپاراتتى اتىپ تۇسىرگەن. ونىڭ قاي ەلگە تيەسىلى ەكەنىن ءالى انىقتاي الماي جاتىر. وسىعان دەيىن 21 قىركۇيەكتە پەنتاگون سيريادا ۇشقىشسىز ۇشاقتار ۇشىرىپ جاتقانىن ەسكەرتكەن بولاتىن.

اباي-اقپارات