– بۇگىن ءبىزدىڭ قالامىزدا وتە ماڭىزدى ءىس-شارا ءوتىپ جاتىر، – دەدى جيىندى اشقان قالا اكىمى باۋىرجان بايبەك. – ەلىمىز ءۇشىن اسا ماڭىزدى ەكسپو-2017-ءنى وتكىزۋ ءۇشىن باس مەردىگەر، ۇلتتىق كومپانيانىڭ توراعاسى احمەتجان سماعۇلۇلى كومانداسىمەن ءوزىنىڭ سۇيىكتى قالاسىنا كەلىپ، ونداعى مۇمكىندىكپەن تانىسىپ، كاسىپكەرلەرگە قولداۋ جاساماق. ونىڭ ۇستىنە ول كىسى قالاداعى كوپتەگەن ماڭىزدى جوبالاردىڭ نەگىزىن قالاعان ادام. بۇگىنگى فورۋمعا ەكى جۇزدەن اسا قالاداعى ءىرى كاسىپورىنداردىڭ باسشىلارى قاتىسىپ، فورۋم اياسىندا ولاردىڭ 40-تان استامى ءوز تاۋارىنىڭ جارمەڭكەسىن ۇسىنىپ وتىر. بۇل دەگەنىڭىز – قۇرىلىس ماتەريالدارى، قۇرال-جابدىقتار مەن ارنايى تەحنيكالار، جيھاز، كيىم-كەشەك، جادىگەرلىك بۇيىمدار. شىعاراتىن ونىمدەرىنىڭ ساپاسى وتە جوعارى. ەلباسى ايتقانداي، ەكسپو – اسىرەسە بۇگىنگىدەي قيىن ۋاقىتتا ەكونوميكامىزدىڭ درايۆەرى. سونىڭ نەگىزىندە تۋريزم سالاسىن دامىتىپ، ينۆەستيتسيا مەن جاڭا تەحنولوگيالاردى تارتىپ، جاڭا جۇمىس ورىندارى اشىلاتىن بولادى. سوندىقتان ساپالى ءونىم شىعاراتىن الماتىلىق كومپانيالار ەكسپو-2017 كورمەسىن قولداۋعا بەلسەندى ارالاساتىنىنا سەنىمدىمىز.
ەكسپو-2017 جالپىۇلتتىق جوباسى اياسىندا الماتى قالاسىندا ايماقتىق ءىس-قيمىل جوسپارى ازىرلەنگەنىن، سوعان سايكەس الماتى قالاسى ەل تاريحىنداعى ەلەۋلى شارانى جوعارى دەڭگەيدە وتكىزۋىنە زور ۇلەس قوساتىنىن، ول ءۇشىن قالامىزدا بارلىق مۇمكىندىكتەر بار ەكەنىن جەتكىزىپ، بايانداما جاساعان قالا اكىمىنىڭ ورىنباسارى ەرلان اۋكەنوۆ، سونداي-اق، قالادا 184 مىڭ بيزنەس سۋبەكتىسى، ونىڭ ىشىندە 1800 ءوندىرىس ورنى، 2,5 مىڭ قۇرىلىس كومپانياسى، 900-گە تارتا تۋريستىك فيرما، 122 قوناقۇي ورنالاسقانىن، ولاردىڭ كوپشىلىگى اتالمىش جوباعا قاتىسۋعا ۇلكەن قىزىعۋشىلىق ءبىلدىرىپ وتىرعانىن جەتكىزدى.
وعان قوسا باۋىرجان قىدىرعاليۇلى كەلىسىمشارتقا قول قويىلعان سوڭ «جول كارتاسى» قابىلداناتىنىن، سول بويىنشا الماتى قالاسى اۋقىمدى شارانى وتكىزۋگە وزىندىك ۇلەس قوسىپ، جارناما، ۇيىمداستىرۋ، ت.ب. جاعىنان ۇلكەن كومەك كورسەتەتىنىن تىلگە تيەك ەتە كەتتى. مەگاپوليستە سوڭعى 3 جىلدا ينۆەستيتسيا كولەمى 12 پايىزعا، ال تەحنولوگيالىق يننوۆاتسيالىق كاسىپورىندارعا جۇمسالعان قاراجات 2 ەسەگە ارتقان. الماتىنىڭ 30-دان استام ءوندىرىس وشاعى ءوز ءونىمىن تمد، ەۋروپا مەن وڭتۇستىك-شىعىس ازيا ەلدەرىنە ەكسپورتتايدى.
ءوز كەزەگىندە ءسوز العان «ەكسپو-2017» ۇك» اق باسقارما توراعاسى احمەتجان ەسىموۆ الماتى كاسىپورىندارىنىڭ قاتىسۋىنسىز حالىقارالىق كورمەنى وتكىزۋ مۇمكىن ەمەستىگىن جەتكىزدى.
– كوپتەگەن كومپانيالاردىڭ دامۋىن جاقسى بىلەمىن. ولاردا ءوزىم بولعانمىن. الماتىنىڭ الەۋەتى وتە جوعارى ەكەنىن دە بىلەمىن. الماتى – ەلىمىزدىڭ باستى لوكوموتيۆى. مۇندا عىلىم مەن ءبىلىم وشاقتارى، ءىرى ءوندىرىس ورىندارى شوعىرلانعان. بىراق وسىعان دەيىن قالانىڭ ەكسپو-2017 جوباسىنداعى قاتىسى وتە بەلسەندى ەمەس بولاتىن. سوما دا اسا ءماز ەمەس – 550 ملن. تەڭگە. بۇگىن قۇنى 10 ميلليارد تەڭگەگە سەرىكتەستىك جونىندەگى كەلىسىمگە قول قويىلماق. ازىرگە مەموراندۋم 8 وبلىسپەن جاسالىپ، جالپى 300-گە جۋىق كاسىپورىن جۇمىلدىرىلدى. الماتى – كەلىسىم جاسالىپ وتىرعان 9-شى ايماق. جالپى العاندا سەگىز ايماقتان 23 ملرد. تەڭگەگە كەلىسىمشارت جاسالىپ، 10 مىڭ جۇمىس ورنى پايدا بولدى، – دەدى احمەتجان ەسىموۆ.
وسىلايشا، الماتى ەكسپو-نىڭ تىعىز قارىم-قاتىناس ورناتقان 9-شى ءوڭىرى بولدى. بۇگىندە قۇرىلىس الاڭىندا 7800 ادام تەر توگۋدە. پرەزيدەنتىمىز ايتقانداي، بۇل جوبا – داعدارىس كەزىندە جاڭا جۇمىس ورىندار اشىپ، كاسىپورىنداردىڭ تىنىسىن كەڭەيتۋگە مۇمكىندىك بەرەتىن جوبالاردىڭ ءبىرى بولماق. سونداي-اق، ەكى تاراپ مەموراندۋمدى جۇزەگە اسىرۋ بويىنشا قولعا الىناتىن شارالاردىڭ جوسپارىن قۇردى.
گۇلزەينەپ سادىرقىزى،
«ەگەمەن قازاقستان».
