ۇلتارالىق الاۋىزدىقتى قوزدىرعانى ءۇشىن مامبەتالين مەن نارىمباەۆ ەكى ايعا قاماۋعا الىندى دەپ حابارلايدى http://alashainasy.kz سايتى.

قازان ايىنىڭ ونىندا الماتىدا قوعام بەلسەندىلەرى سەرجان مامبەتالين مەن ەرمەك نارىمباەۆ الەۋمەتتىك جەلىلەر ارقىلى ەل ىشىندە ۇلتارالىق ارازدىقتىڭ تۋىنداۋىنا تۇرتكى بولارلىقتاي اقپاراتتى تاراتتى دەگەن كۇدىكپەن قاماۋعا الىنىپ، ۋاقىتشا ۇستاۋ يزولياتورىنا جابىلعان بولاتىن. ولارعا ازاماتتاردىڭ ۇلتتىق ار-نامىسى مەن قادىر-قاسيەتىن قورلاۋ بەلگىلەرى بار مالىمەتتەردى تاراتتى دەگەن ماعىنادا ايىپ تاعىلىپ وتىر.

وسى ىسكە بايلانىستى قازاننىڭ 12-ىندە قر قىلمىستىق كودەكسىنىڭ 174-ءشى بابى، 1-ءشى ءبولىمى بويىنشا سوتقا دەيىنگى تەرگەۋ امالدارى باستالدى. ال بۇگىن، ياكي قازاننىڭ 15-ءى كۇنى الماتى قالاسى المالى اۋداندىق سوتىندا جينالعان ماتەريالدار نەگىزىندە وسى ازاماتتارعا قارسى كۇزەتپەن ۇستاۋ تۇرىندەگى بۇلتارتپاۋ شاراسى ەنگىزىلدى.

«قازىرگى ۋاقىتتا مامبەتالين مەن نارىمباەۆقا قاتىستى بۇلتارتپاۋ شاراسىن ودان ءارى جالعاستىرۋ ماسەلەسى شەشىمىن تاپتى. وسىعان بايلانىستى وسى ءىستى تەرگەۋ امالدارى الداعى ەكى اي بويى ۇزدىكسىز جۇرگىزىلمەك. ال ەكى ايدان كەيىن تەرگەۋشى ءوزىنىڭ پروتسەسسۋالدى شەشىمىن قابىلدايتىن بولادى»، - دەدى سوت پروتسەسىنە قاتىسقان المالى اۋداندىق پروكۋرورىنىڭ اعا كومەكشىسى داۋرەن اۋىپباەۆ.

ەسكە سالامىز، پروكۋرورلىق سانكتسيانىڭ پارمەنىمەن اتالعان تۇلعالاردىڭ ۇيىندە ءتىنتۋ جۇرگىزىلىپ، زاتتىق ايعاقتار تابىلعان بولاتىن.

تەرگەۋ امالدارى جالعاسىپ جاتىر.

اباي-اقپارات