استانادا وتكەن قاۋىپسىزدىك كەڭەسىنىڭ وتىرىسىندا قازاقستان پرەزيدەنتى نۇرسۇلتان نازارباەۆ «استانا ءۇشىن ەۋرازيا ەكونوميكالىق وداق (ەەو) تەك عانا ەكونوميكالىق ۇيىم بولىپ تابىلادى» دەپ اتاپ وتكەن. بۇل جونىندە پرەزيدەنتتىڭ ءباسپاسوز قىزمەتى حابارلادى.

ونىڭ سوزىنشە، ەەو-نىڭ بار مۇمكىندىگى سىرتقى جاعدايلارعا بايلانىستى اشىلماي وتىر. وتىرىس بارىسىندا قازاقستاننىڭ الەۋمەتتىك-ەكونوميكالىق دامۋىنا سىرتقى نەگاتيۆتى فاكتورلاردىڭ اسەر ەتۋىن بارىنشا ازايتۋ ماسەلەسى ايتىلعان.

سونىمەن بىرگە ەەو-عا مۇشە ەلدەر اراسىنداعى سانيتارلى-ەپيدەميولوگيالىق، فيتوسانيتارلى جانە ۆەتەرينارلى باقىلاۋ جونىندە تالقىلانعان.

ەۋرازيالىق ەكونوميكالىق وداق ۇستىمىزدەگى جىلدىڭ قاڭتار ايىنان باستاپ جۇمىس ىستەيدى. وعان ارمەنيا، بەلارۋس، كىرعىزستان، قازاقستان جانە رەسەي كىرەدى. تاجىكستان ازىرگە ۇيىم تالاپتارىن ءجىتى زەرتتەپ جاتقانىن ايتادى. رەسەي وزبەكستاندى دا بۇل ۇيىمعا مۇشە بولۋعا تارتىپ جاتىر.

اباي-اقپارات