استانادا ۋكراينا پرەزيدەنتى پەتر پوروشەنكومەن وتكىزگەن كەلىسسوزدەردەن سوڭ قازاقستان پرەزيدەنتى نۇرسۇلتان نازارباەۆ تاراپتار «كوپ ماسەلەلەر بويىنشا ءوزارا تۇسىنىستىك تاپقانى» تۋرالى مالىمدەگەن. نازارباەۆتىڭ سوزىنشە، كەزدەسۋ بارىسىندا پرەزيدەنتتەر ەكى ەلدىڭ ساياسي جانە ەكونوميكالىق ىنتىماقتاستىعىن تالقىلاعان.

پوروشەنكونىڭ ايتۋىنشا، بەتپە-بەت كەزدەسۋ جوسپارلانعان 40 مينۋتتان كوپ ۋاقىتقا جالعاسىپ، قوس پرەزيدەنت ماڭىزدى تاقىرىپتاردى تالقىلاپ ۇلگەرگەن. ول ەكى مەملەكەت اراسىندا «ەل باسشىلارى مەن حالىقتار اراسىندا ورناعان ءوزارا سەنىم مەن قۇرمەتكە نەگىزدەلگەن ساياسي ديالوگتى دامىتۋعا نيەتى ءۇشىن» نازارباەۆقا ريزاشىلىعىن ءبىلدىردى. سونىمەن بىرگە پوروشەنكو ءوزى ءۇشىن قازاقستاننىڭ حالىقارالىق قۇقىقتىڭ ىرگەلى پرينتسيپتەرىنە بەرىكتىگى، ەگەمەندىك پەن حالىقارالىق دەڭگەيدە مويىندالعان مەملەكەت شەكاراسى اۋماعىنداعى جەرىنىڭ تۇتاستىعىن قۇرمەتتەيتىنى زور ماڭىزعا يە ەكەنىن مالىمدەگەن.

قوس پرەزيدەنتتىڭ بۇل كەزدەسۋى ۋكراينا مەن قازاقستان اراسىندا تاۋار اينالىمى كولەمى ازايعان شاقتا ءوتىپ جاتىر. نازارباەۆتىڭ سوزىنشە، ءوزارا ساۋدانىڭ باسەڭدەۋى ەنەرگيا كوزدەرى باعاسىنىڭ كەمۋىنە، باتىس پەن ۋكراينانىڭ رەسەيگە سالعان سانكتسيالار مەن وعان كرەملدىڭ قارسى شارالارىنا بايلانىستى بولىپ وتىر. ۋكراينا رەسمي ورگاندارىنىڭ مالىمەتى بويىنشا، بۇل ەلدىڭ قازاقستانمەن جالپى ساۋدا كولەمى بيىلعى جىلدىڭ العاشقى جارتىسىندا 544,1 ميلليون دوللاردى قۇراعان.

پەتر پوروشەنكو استاناعا قازاننىڭ 8-ءى كەشكىسىن كەلگەن. سول كۇنى ول قازاقستان پرەمەر-ءمينيسترى كارىم ماسىموۆپەن كەزدەسكەن. پوروشەنكونىڭ ساپارى اياسىندا استانادا بقازاق-ۋكراين بيزنەس-فورۋمى ءوتتى.

بۇل پوروشەنكونىڭ 2014 جىلى ۋكراينا پرەزيدەنتى بولىپ سايلانعاننان  كەيىنگى قازاقستانعا العاشقى ساپارى.

اباي-اقپارات