شىمكەنتتە جاسى ون التىعا تولماعان قىزداردىڭ اراسىندا جۇكتىلىك كۇرت كوبەيگەن، - دەپ حابارلايدى 31 ارنا.

بالالىقتىڭ اۋىلىنان الىستاي قويماعان "بالا-انالاردان" تۋىستارى تەرىس اينالعاندىقتان، امالسىز "انالار ءۇيىن" پانالاۋعا ءماجبۇر. كامەلەتكە تولماعان، وقۋشى  انالاردىڭ كوبەيگەنى سونشالىق، شىمكەنتتەگى ەكى ورتالىق ازدىق ەتىپ، ءتىپتى كەلەر جىلدىڭ قاڭتار ايىندا ءۇشىنشىسى اشىلۋى مۇمكىن.

قازاقى اۋىلدان شىققان 17 جاستاعى قۇندىز ەسىمدى انا  8-ءشى سىنىپتا جۇرگەندە اياعى اۋىرلاپ، وزىنەن بىرەر جاس ۇلكەن جىگىتتەن جۇكتى بولعانىن ايتادى. توعىزىنشى سىنىپقا وتكەندە بوسانىپ، ومىرگە قىز اكەلىپ، اياق-قولىمدى باۋىرىما الدىم دەيدى. ال، اۋىلدا تانىستاردىڭ سوزىنەن باس كوتەرە الماعان اتا-اناسى امالسىز باسقا اۋىلعا كوشىپ، وزىنەن تەرىس اينالعان ساتتە، دالادا قالماس ءۇشىن شىمكەنتتەگى "كامەلەتتىك جاسقا تولماعان انالار ءۇيىن" پانالادىم دەپ وتىر.

قۇندىز، 17 جاستاعى جاس انا:

- باسىندا مەن ول بالامەن ارالاستىم. ارالاسقاننان كەيىن ول مەنى قينادى.  كەيىن مەن ودان بۇزىلدىم. بۇزىلعاننان كەيىن ۇيدەگىلەر سوتقا بەردى. ول مەنەن كەشىرىم سۇراپ جاتسا، مەن ونى كەشىردىم. تاعى جولىققاندا، مەن "كوتەرىپ" قويدىم.

دەمەۋشىلەر ەسەبىنەن قارجىلاندىرىلاتىن قوعامدىق ۇيىمنىڭ جەتەكشىسى وكسانا براتكوۆا اتالمىش ورىننىڭ اسىرەسە، اداسۋشى جاسوسپىرىمدەر مەن ولاردىڭ بەيكۇنا سابيلەرى ءۇشىن پايداسى وراسان دەيدى. اڭداۋسىزدا جۇكتى بولىپ، بارار جەرلەرى بولماعانداردى ءتىپتى كەيدە اتا-انالارى وزدەرى اكەپ تاستايدى ەكەن.

بيلىك شىمكەنتتەگى بۇل ۇيلەرگە ءجاسوسپىرىم-انالاردىڭ كوپتەپ كەلە باستاعانىنان حاباردار. بالا مەن انانى بىرگە ۇستاعاندىقتان، قايتا مۇنداي ورىنداردىڭ كوپتەپ اشىلعانى دۇرىس دەپ ەسەپتەيدى. ال، 16 جاسقا دەيىنگى جۇكتىلىك جيىلەدى دەگەنگە، بارلىق ماسەلە تاربيەدە دەگەندى ايتادى.

ناۋشارمان بورانباەۆا، وقو دەنساۋلىق ساقتاۋ باسقارماسىنىڭ باس مامانى:

- جەتىم بالالار كوبەيگەن، بىرىنشىدەن. ەكىنشىدەن، كوپ بالالار اناسىز تاربيەلەنگەن. سونىڭ سالدارىنان كوپ جاسوسپىرىمدەر اراسىندا قۇقىق بۇزۋشىلىقتار، زورلىق-زومبىلىقتار كەزدەسكەن.

شىمكەنتتەگى ءبىر عانا انالار ۇيىندە ون جەتى جاس انا مەن ون ءتورت بالا، سونىمەن قاتار ءۇش جۇكتى ايەل بار. ال، وسى جىلدىڭ وزىندە مۇندا 14 جاستاعى ەڭ جاس انانى جاقىندا ورتالىق كوكشەتاۋعا وقۋعا جىبەرىپتى. رانو ەسىمدى ءجاوسپىرىم ون ۇشىندە جۇكتى بولىپتى. ماماندار كەلەر جىلدىڭ باسىندا جىلدىق قارجى قورى 120 مىڭ دوللاردى قۇرايتىن وسىنداي ءۇشىنشى ءۇي اشىلادى دەپ كۇتىپ وتىر.

ەرلان قۋاندىقوۆ، ەرجان سەيدازىموۆ

31 ارنا