قىرعىزستاننىڭ ورتالىق سايلاۋ كوميسسياسى پارلامەنت سايلاۋىنا داۋىس بەرۋدىڭ الدىن-الا ناتيجەسى بويىنشا، التى پارتيانىڭ 7 پايىزدىق جانە 0,7 پايىز ايماقتىق مەجەدەن وتكەنىن حابارلادى.

سوڭعى تۇسكەن اقپاراتقا سايكەس، ازىرگە قىرعىزستاننىڭ سوتسيال-دەموكراتيالىق پارتياسى 48% داۋىس جيناپ، پارلامەنتتەن 37 مانداتقا يە بولسا، وپپوزيتسيالىق اتا-جۋرت رەسپۋبليكالىق پارتياسى 20 پروتسەنت داۋىسپەن 28 ماندات الىپ، ەكىنشى ورىندا كەلەدى. قالعان ءتورت پارتيا – «قىرعىزستان» -18, «ونۋگۋ-پروگرەسس» - 13, «بير بول» - 12 جانە «اتا مەكەن» - 11 مانداتپەن 120 ورىندىق پارلامەنتكە بارادى.

4 قازاندا وتكەن پارلامەنت سايلاۋىنا ۇمىتكەر رەتىندە قاتىسقان قالعان 8 پارتيا 7 پايىزدىق مەجەنى ەڭسەرە المادى. داۋىس بەرۋگە ءبىرىنشى رەت بيومەتريالىق يدەنتيفيكاتسيالىق كارتا بويىنشا تىركەلگەن 2,7 ملن سايلاۋشىنىڭ 60 پروتسەنتى قاتىسقان. مۇنداي جۇيە ورتالىق ازيا ەلدەرى بويىنشا ءبىرىنشى رەت قىرعىزستاندا قولدانىلىپ وتىر.         

سايلاۋدا بولۋى مۇمكىن الاياقتىق قاتاڭ تۇردە الدىن الىندى دەلىنگەنىمەن، ونداعان زاڭ بۇزۋشىلىق ورىن العانى حابارلاندى.

قىرعىزستان پرەزيدەنتى المازبەك اتامباەۆ سايلاۋشىلاردى تۇراقتىلىقتى ساقتاۋعا شاقىردى. ول سونىمەن بىرگە سايلاۋ ناتيجەسىنە قارسى كەلۋشىلەردى «قاتاڭ تۇردە جازالايمىز» دەپ ەسكەرتتى.

اباي-اقپارات