... سوڭعى ەكى كۇننىڭ ىشىندە «قازاق فۋتبولىنىڭ دامۋى وسى» دەپ تاڭداي قاعارداي ەكى جاقسىلىق، ەكى جاڭالىق بولدى. ءبىرى، البەتتە، استانالىق «استانا» كلۋبىنىڭ ءوز الاڭىندا ستامبۇلدىق «گالاتاسارايمەن» تەڭ ويناپ، قازاقستان فۋتبولى تاريحىنداعى چەمپيوندار ليگاسىنىڭ العاشقى ۇپايىن ولجالاۋى. ەكىنشىسى، الماتىلىق «قايراتتىڭ» جاڭا وقۋ-جاتتىعۋ بازاسىنىڭ ويىنشىلار يگىلىگىنە بەرىلۋى. «استانانىڭ» جەتىستىگىنە ەسىم شىعا قۋاندىم دەپ ايتا المايمىن، ءتىپتى، تۇرىك كومانداسىنىڭ جەڭىسىنە تىلەكتەستەردىڭ ءبىرى ەدىم. الايدا، «ارىستانداردىڭ» سىلبىر ويىنىنا قاراپ، قارنىم اشتى. ءتىپتى، ولارعا ءبىر ۇپايدى ۇستاتىپ جىبەرە سالعان «استانالىقتارعا» رەنجىدىم، «گالاتاساراي» تەڭ ويىنعا ەڭبەك سىڭىرگەن جوق، ساتتىلىكتىڭ سەلبەۋىمەن ۇتىلىستان امان كەتتى. حوش دەلىك...

ال، ەۋروپا ليگاسىنىڭ توپتىق كەزەڭىنە تۇسۋگە ءبىر ەلى عانا جەتپەي توقتاعان «قايراتتىڭ» جاڭا بازاسى... ىشىنە ءۇڭىلىپ قاراۋعا ءداتىم شىدامادىJ, بىراق، سىرتقى كورىنىسىنىڭ ءوزى كوزدىڭ جاۋىن الادى. الەۋمەتتىك جەلىدە جۇرگەن اقپاراتتاردان بىلگەنىم جاڭا بازادا ەكى تابيعي الاڭ، ءۇش جاساندى الاڭ بار، ال، جابىق سپورت زالدارىنداعى قۇرال-جابدىقتارعا ەۋروپالىق گراند كوماندالاردا دوپ قۋىپ كەلگەن تيموششۋكتىڭ ءوزى تاڭعالىپتى.

«قايراتتىڭ» باعى باسىم جىل بيىل، ءسوز جوق. 2015 جىلدىڭ چەمپيوندىعى دا تاياق تاستام جەردە تۇر...  سولاي!

ءيا، ەكەۋى دە ادەمى جاڭالىق. «اقتوبەنىڭ» جانكۇيەرى رەتىندە ەكەۋىنە دە قىزىعۋدان قىزعانۋى باسىم كوڭىلمەن قارادىم.

5 جاسىنان «اقتوبەنىڭ» فۋتبول كلۋبىنىڭ فاناتى ارشات ورازوۆ دەگەن دوسىم وسى جىلدىڭ باسىنان-اق: «الداعى ۋاقىتتا ىشكى چەمپيوناتتا تەك ەكى كوماندانىڭ عانا تەكەتىرەسىن كورەمىز. ولار قازىردىڭ وزىندە مەنەدجمەنتىن ساقاداي-ساي ەتىپ جولعا ءتۇسىرىپ العان «استانا» مەن «قايرات» ال، «اقتوبەنىڭ» قازىرگى مۇشكىل جاعدايى مەن وبلىستاعى كلۋبقا دەگەن «وڭ» كوزقاراس ناتيجەسىندە الداعى ۋاقىتتا اقتوبە فۋتبولىن تولىق توقىراۋ كەزەڭى كۇتىپ تۇر» دەپ ايتىپ كەلەدى.

ايتپاقشى، كۇنى كەشە ۋەفا-نىڭ جاستار ليگاسىندا تۇڭعىش رەت دوپ تەپكەن «اقتوبە-U-19» تۇركيالىق «بەشيكتاشتىڭ» جاستارىنان 0:2 ەسەبىمەن ۇتىلدى. مىنە، اقتوبە فۋتبولىنىڭ بولاشاعى...

اقتوبە وبلىسىنا جاقىندا بارعان وبلىس اكىمى بەردىبەك ساپارباەۆتىڭ ىسكەرلىگى ارقاسىندا وڭىردەگى، اقتوبە قالاسىنداعى كوپتەگەن ماسەلەلەردىڭ شەشىمىن تەزدەتىپ تاۋىپ جاتقانى جايلى حاباردارمىز. البەتتە، اقتوبەگە جاڭا بارعانى بولماسا، بەردىبەك ماشبەكۇلى جۇرگەن جەرىنە گۇل ەگىپ جۇرەتىن ىسكەر ازامات ەكەنىن بۇرىننان بىلەمىز.

وسىلاردىڭ ءبارىن ويلاي كەلە، بەردىبەك ماشبەكۇلى «اقتوبە» كلۋبىنىڭ جاعدايىن تىكەلەي باقىلاۋىنا السا دەگەن تىلەك تۋادى.

فۋتبول دىنمەن قاتار تۇراتىن قالادا، قالا بەردى وبلىستا جاڭا اكىمنىڭ اتىنا العىس جاۋدىراتىن ەڭ سۇبەلى، سۇيەكتى نارسە بولسا، ول – «اقتوبەنىڭ» كلۋبىنىڭ جاعدايى!

قۇرمەتتى بەردىبەك ماشبەكۇلى!

ءسىزدىڭ اقتوبە وبلىسىنا اكىم بولىپ بارعانىڭىز قۋانىش. ەڭ الدىمەن، وبلىستاعى الەۋمەتتىك احۋال جاقسارادى دەگەن نىق سەنىم بار، سوسىن، ارينە قازاقستانداعى گراندتار ساناتىنداعى فۋتبول كلۋبىنا شىن جاناشىر بولارسىز دەگەن ءۇمىت!

وبلىس بيۋدجەتىنەن قارجى الاتىن كلۋبتىڭ ىشكى جاعدايىنا ۇڭىلسەڭىز، ءوزىڭىزدىڭ دە كوزىڭىز جەتەر، جاريالاپ قايتەمىز؟! ءبىز كۇتكەنبىز، سەنگەنبىز «اقتوبەنىڭ» شاتقاياقتاپ تۇرعان قادامىن نىعايتار، كوزدەرىنە ءۇمىت وتىن جاعار ءبىر ازاماتتىڭ كەلەرىنە.

ەل چەمپيوندىعىن 5 رەت جەڭگەن، ەۋروپا ليگاسىنىڭ، چەمپيوندار ليگاسىنىڭ ىرىكتەۋ كەزەڭدەرىندە ويناعان، الەمدىك دەڭگەيدەگى كلۋبتاردىڭ وزىمەن ساناسۋ كەرەكتىگىن ۇقتىرعان «اقتوبە» فۋتبول كلۋبى بۇگىندە قۇلدىراۋ ۇستىندە.

شۇعىل كومەك كەرەك. كىنالىنى حالىق كەشىرەدى، تەك كلۋبتىڭ جاعدايى رەتتەلگەن جاعدايدا عانا. كەز-كەلگەن «فيزرۋكتىڭ» باس باپكەر بولۋى، ماۋسىم ورتاسىندا عانا اشىلاتىن ستاديوننىڭ ماسەلەسى، الا تاڭنان كەزەگى باستالاتىن بيلەتتىڭ جاعدايى، سەلەكتسيالىق جۇمىستاردىڭ سىلبىرلىعى ناتيجەسىندە «اقتوبەنىڭ» جولى تۇيىقتالىپ، ماسەلەسى قوردالانىپ قالعانىن اقتوبەنىڭ كەز-كەلگەن ازاماتى ايتىپ بەرەدى.

ءبىز بىلەمىز، سىزبەن قانداي دا ءبىر ماسەلە قاتار تۇرمايتىنىن، سوندىقتان دا سەنەمىز! قازاق «نار جولىندا جۇك قالماس» دەيدى عوي...

فۋتبولمەن تىنىستايتىن اقتوبەنىڭ ەندىگى دەمىن ءسىز اشارسىز، ءبىز سەنەمىز!

الماس التاي،

استانا قالاسى