ەلىمىزدىڭ اقپارات قۇرالدارى مەن الەۋمەتتىك جەلىلەردىڭ قولدانۋشىلارى قازاق مەكتەپتەرىندەگى 9 سىنىپتارعا ارنالعان ادەبيەت حرەستوماتياسىنداعى جىر جولدارىنا نارازىلىق ءبىلدىرىپ، ءبىلىم مينيسترلىگىن سىن تەزىنە سالعان بولاتىن.

اتالعان كىتاپتا ابۋباكىر ديۆاەۆتىڭ "قامبار باتىر" جىرى جاريالانعان. وقۋلىقتا ەپوس باتىرى القاش جانە شىلىم شەگەتىن ادام رەتىندە سۋرەتتەلگەن. 

الايدا، قر ءبىلىم جانە عىلىم مينيسترلىگىنىڭ وكىلدەرى بۇل تۋىندىنىڭ 19 نۇسقاسىنىڭ بار ەكەندىگىن ايتىپ، ونىڭ 11-12 نۇسقاسى عىلىمي اينالىمعا تۇسكەنىن جەتكىزدى. "وقۋلىققا ەنگەن جىر نۇسقاسى ەڭ العاش 1864 جىلى قازان قالاسىندا باسىلعان. ودان سوڭ 1922 جىلداردىڭ شاماسىندا تاشكەنت قالاسىندا باسىلعان. وسى نۇسقالار ابۋباكىر ديۆاەۆ نۇسقاسى دەلىنەدى" دەيدى مينيسترلىكتەگىلەر. 

"وسى ديۆاەۆ نۇسقاسى ەلباسىنىڭ قولداۋىمەن 2008 جىلى شىققان 100 تومدىق "بابالار ءسوزىنىڭ" 43-ءشى تومىندا، ياعني "باتىرلار جىرىندا" "قامبار باتىر" جىرىنىڭ ءماتىنى بەرىلگەن. كىتاپتىڭ 43-بەتىندە حرەستوماتياعا بەرىلگەن ءماتىن سول كۇيىندە جاريالانعان. سونىمەن بىرگە، 1957 جىلى قازاق سسر عىلىم اكادەمياسى شىعارعان "قامبار باتىر" جىرىنىڭ 49-بەتىندە وسى ءماتىن سول كۇيىندە بەرىلگەن. حرەستوماتيا قۇراستىرۋشىلار وسى عىلىم اكادەمياسى شىعارعان 1957 جىلعى جانە 2008 جىلعى “بابالار ءسوزى” كىتاپتارىنا سۇيەنىپ، سونى باسشىلىققا العان", - دەپ حابارلادى قر بعم وكىلدەرى. 

"ال وسى ءماتىندى حرەستوماتياعا ەنگىزگەندە وقۋشىلاردى جاماننان جيرەنۋگە جانە كەرەك ەمەس نارسەنى وزدەرى ىرىكتەپ، ءارى قاراي باسقا دا نۇسقالارمەن سالىستىرۋعا بەيىمدەۋ. جىردىڭ كوپتەگەن نۇسقاسى بارىن جانە ونىڭ كوركەمدىگىن مۇعالىمدەر وقۋشىلارعا وقۋلىق ارقىلى تۇسىندىرەدى. سول سەبەپتى دە ۇلتتىق مۇرامىزدىڭ ءماتىنىن بۇزباي، سول كۇيىندە بەرۋ ءبىزدىڭ پارىزىمىز", - دەلىنگەن مينيسترلىك حابارلاماسىندا.

ەپوستىق جىرداعى "كەرەك ەمەس نارسەنى" وقۋشى قالاي ىرىكتەيدى؟ ولار باسقا نۇسقانى قايدان الىپ سالىستىرادى؟ تۇسىنىكسىز. كەشە عانا "قىرىمدى رەسەيگە سىيلاپ", ارتىنشا قاتەلىكتى تۇزەۋگە شەشىم شىعارعان مينيسترلىك قامبار باتىرعا كەلگەندە نەگە باتىر بولا الماي قالدى؟ سوندا مينيسترلىكتىڭ ءوزى قامبار باتىردىڭ "القاشتىعىن" مويىنداعانى ما؟ سۇراق كوپ، جاۋاپ جوق...

Abai.kz