تاعدىردىڭ جازۋىمەن جاقىندا ءىنىم ناۋقاستانىپ اۋرۋحاناعا ءتۇستى. ونىڭ پالاتاسىندا ورىستىڭ ءبىر شالى دا جاتتى. قاسىندا كەمپىرى وتىرادى كۇزەتىپ. دياگنوزى - ينسۋلتتىڭ العاشقى ساتىسى. مۇنداي دياگنوزبەن كەلگەن سىرقاتتار ۇمىتشاق بولىپ، ءبىر نارسەنى سان قايتالاپ سۇراي بەرەدى ەكەن. سوندىقتان شالدىڭ تاياعىن ۇستاپ ءوز كەمپىرىن قۋالاۋى، الپىس جىل وتاسقان زايىبىن تانىماي ميليتسيا شاقىرام دەۋى بىرگە جاتقان سىرقاتتاردىڭ بىرەسە كوڭىلىن كوتەرەدى. كەيدە ءبىز دە سوندايمىز با دەگەندەي ءۇرپيىسىپ قالادى.

تاعدىردىڭ جازۋىمەن جاقىندا ءىنىم ناۋقاستانىپ اۋرۋحاناعا ءتۇستى. ونىڭ پالاتاسىندا ورىستىڭ ءبىر شالى دا جاتتى. قاسىندا كەمپىرى وتىرادى كۇزەتىپ. دياگنوزى - ينسۋلتتىڭ العاشقى ساتىسى. مۇنداي دياگنوزبەن كەلگەن سىرقاتتار ۇمىتشاق بولىپ، ءبىر نارسەنى سان قايتالاپ سۇراي بەرەدى ەكەن. سوندىقتان شالدىڭ تاياعىن ۇستاپ ءوز كەمپىرىن قۋالاۋى، الپىس جىل وتاسقان زايىبىن تانىماي ميليتسيا شاقىرام دەۋى بىرگە جاتقان سىرقاتتاردىڭ بىرەسە كوڭىلىن كوتەرەدى. كەيدە ءبىز دە سوندايمىز با دەگەندەي ءۇرپيىسىپ قالادى.
حوش، سونىمەن سىرقاتتىڭ اسەرىنەن تۋىندايتىن تۇسىنىكسىز قىلىقتارىمەن كۇلكى تۋدىرىپ جۇرگەن الگى شال ءدارى-دارمەك بويىنا تاراپ، اۋرۋدىڭ بەتى قايتا باستاعان ءبىر كۇنى تازا قازاقشا سايراپ قويا بەرمەسى بار ما؟ سويتسەك، شال دا، ونى كۇزەتىپ وتىرعان كەمپىر دە ورىس ەمەس ەكەن. اقساقال قازاق، بايبىشەسى تاتار بولىپ شىقتى. بىراق ەكەۋى دە بار بولمىستارىمەن ورىستانىپ كەتكەن. ەكەۋى دە تۋعان ءتىلىن ۇمىتقان. كەزىندە جاۋاپتى قىزمەتتەر اتقارىپتى. جاقسى جۇمىس، جايلى تۇرمىستارى بولسا كەرەك. بايبىشەسىنىڭ ايتۋىنشا، شالى ءسابي كۇنىنەن ورىستىڭ ورتاسىندا وسكەن. ەكەۋى كەزدەسكەن كەزدە ول كىسى تازا ورىسشا سويلەيتىن، كوممۋنيزمگە شىن بەرىلگەن ناعىز "كەڭەس پاتريوتى" بولىپتى. كەيىن سول ورىس تىلىنە ادالدىعىنىڭ ارقاسىندا جاۋاپتى قىزمەتتەر اتقارىپ،  وسى اۋرۋحاناعا تۇسكەنگە دەيىن سول ادالدىعىنان ءبىر تانباي كەلىپتى. بالالارىن دا ورىس رۋحىندا تاربيەلەگەن. الپىس جىل وتاسقان كەمپىرى شالىنىڭ ءبىر اۋىز قازاقشا سويلەگەنىن ەشقاشان ەستىمەدىم دەيدى. انا ءتىلىن مۇلدەم قاجەتسىنبەي قارتايعان. سول شالى كەنەت قازاقشا سايراپ كەتكەندە كەمپىرى تالىپ قالا جازدادى.
بۇل نە قۇدىرەت؟ ءتىلدىڭ تىلسىمى، كيەسى دەگەن وسى ما؟ الدە، ادامنىڭ جادىن بەلگىلى دەڭگەيدە ءوشىرىپ تاستايتىن سىرقات اقساقالعا كەرىسىنشە اسەر ەتىپ، ءسابي كۇنىندە قانىنا سىڭگەن انا ءتىلىن ساناسىندا قايتا جاڭعىرتتى ما؟ قالاي بولسا دا سەكسەننىڭ سەڭگىرىنەن اسىپ، تورىنەن كورى جاقىن قالعاندا ءتىلى جاڭا شىققان سابيدەي بىلدىراي سويلەپ، تۋعان تىلىندە سايراپ كەتكەنى، سەكسەن جىل سويلەگەن ورىس ءتىلىن ۇمىتىپ قالعانى تاڭ قالارلىق جايت ەمەس پە. ورىسشانى مۇلدەم تۇسىنبەيدى. وتاعاسىمەن سويلەسۋ ءۇشىن اراعا اۋدارماشى سالىپ كەمپىرى الەك.
دەمەك، ورىسشا وقىدىم، سوندىقتان ءتىلدى ۇمىتتىم، ەندى ۇيرەنۋ قيىن دەپ اقتالاتىنداردىڭ بارلىعى كولگىرسىپ ءجۇر دەگەن ءسوز. مىناۋ وقيعا سونىڭ ايقىن مىسالى. انانىڭ الديىمەن، اتانىڭ قانىمەن كەلەتىن ءتىلدى ءبىرجولاتا ۇمىتۋ مۇمكىن ەمەس. ورىستانعاندار تەك ءتىلدىڭ كيەسى بارىن بىلمەي جۇرسە كەرەك. الدە ولار دا ينسۋلت بولاتىن كۇندى كۇتىپ ءجۇر مە ەكەن؟!

اردابەك سولداتباي.