اقتوبەلىك توعىز جاسار بالا اناسىن اسىراۋدى ارمانداپ، وسىنداي ولەڭ جازدى

بۇل ولەڭدى مەن العاش رەت «فەيسبۋكتان» كوردىم. ىزدەستىرە كەلگەندە، «كەرەك.info» سايتى Nur.kz پورتالىنا سىلتەمە جاساپ، «اقتوبەلىك توعىز جاسار بالانىڭ داعدارىسقا قارسى ولەڭى حيتقا اينالدى» دەپ، تۇپنۇسقا توڭىرەگىندە ءبىراز اقپارات بەرىپتى.

«شالعاي اۋدانداردىڭ ءبىرى ويىلدان اقتوبەگە كوشىپ كەلگەن تالمۋرزيندەر وتباسىنىڭ وزگە جۇرتتان ەش ايىرماشىلىعى جوق. ۇيەلمەلى-سۇيەلمەلى ءۇش بالامەن ماماندىعى جوق ەرلى-زايىپتىلار جالدامالى پاتەردە تۇرادى.

ءۇي يەسىنىڭ ايەلى مەڭتاي تالمۋرزينانىڭ سوزىنە قاراعاندا، وتباسى تابىسىنىڭ 70 پايىزى جالدامالى پاتەرگە جۇمسالادى. قارجىلىق داعدارىستىڭ جەلەۋى – پاتەراقى دا 15 000 تەڭگەدەن بىردەن 25 000 تەڭگەگە دەيىن كوتەرىلىپ كەتكەن. ودان بولەك كوممۋنالدىق قىزمەت اقىسى تاعى بار. «ازىق-تۇلىك تە كۇن سايىن قىمباتتاپ بارادى» دەپ مۇڭايدى جاس ايەل. مەڭتايدىڭ توعىز جاستاعى ۇلى ءابۋناسىر اتا-اناسىنىڭ قينالعانىن كۇن سايىن كوزىمەن كورىپ ءجۇر. بىراق قولىنان كەلەر دارمەن بولماعان سوڭ، ىشكى الەمىن اق قاعازعا تۇسىرە بەرگەن. وسىنداي تىرناقالدى تۋىندىلارىنىڭ ءبىرىن ء«بىز كەدەيمىز...» دەپ اتاعان.

ء«ۇش بالام بار. بالالارىمنىڭ ۇلكەنى بولعاسىن، وسىلاي ەرتە ەسەيدى مە، كىم ءبىلسىن؟! مەن جاعدايىمنىڭ قيىندىعىن ايتىپ، جۇرتقا الاقان جايايىن دەگەن ويدان اۋلاقپىن. ەدەن جۋسام دا، كۇيەۋىم اربا سۇيرەسە دە، ءوز كۇنىمىزدى ءوزىمىز كورىپ ءجۇرمىز. تەك بالالارىمدى جىلاتقان داعدارىس تەزىرەك اياقتالسا ەكەن»، – دەيدى جاس دارىننىڭ اناسى».

بۇعان نە الىپ-قوسارسىڭ؟ «بالالارىمدى جىلاتقان داعدارىس تەزىرەك اياقتالسىن» دەگەن انانىڭ سوزىنە ايتار ءبىر عانا رەماركا بار: اياعى اسپاننان سالبىراپ، داعدارىس وزدىگىنەن كەلگەن جوق. بۇل – قازاقستاندىق ۇكىمەتتىڭ دارمەنسىز ءارى بىلىكسىز ارەكەتىنەن تۋعان داعدارىس. انىعىندا، ارەكەتى ەمەس، ارەكەتسىزدىگىنەن پايدا بولعان قاسىرەت. بۇنى مەن بەيكۇنا انانى ۇدىرەيگەن ۇكىمەتكە قارسى ايداپ سالايىن دەپ ايتپادىم: بىلە ءجۇرسىن – تۇلىمداي عانا بالاسىنىڭ كوز جاسى كىمدەردىڭ كەسىرىنەن اق قاعازعا ولەڭ بوپ توگىلگەنىن.

ينتەرنەت جەلىسىن ارالاپ كەتكەن ءابۋناسىردىڭ ولەڭىنە قاتىستى ويدىڭ ناق نۇسقاسىن ساندۋعاش جۇمابەكتىڭ «فەيسبۋكتاعى» پاراقشاسىنا كوممەنتاري رەتىندە ينديرا كودەكوۆا دەگەن جەلى پايدالانۋشى جازىپتى:

«بالا ارمانى... دەپۋتاتتىڭ بالاسى – دەپۋتات بولۋعا، مينيستر بالاسى – مينيستر بولۋعا جۇلقىنادى. بايعۇس بالا «ەر جەتسەم، ەدەن جۋار ەدiم» دەيدi. بالا-شاعانى شىرىلداتىپ، iشەر اس، كيەر كيiمگە جارىتپاي، ءوز ەلiندە پاتەر جاعالاتتىرىپ قويعانداردىڭ جازاسىن اللام بەرەر!».

اسپانداعى اللانى كىم ءبىلسىن، ال جەردەگى «قۇدايلار» بۇل جالعاندى قونىشىنان باسىپ ءجۇر. ساندۋعاشتىڭ پاراقشاسىنداعى تاعى ءبىر پوستى وقىپ كورىڭىز: (ايجان وسپانوۆا) ماسيموۆ 137 000$ الادى. قازاق جانۇيالارى پاتەر جالداپ، جالتاڭ-جالتاڭ ەتىپ، نانعا اقشانى زورعا تابادى. ەشقانداي ادىلدىك جوق».

بۇعان دا نە ايتارسىڭ؟

ەرمۇرات باپي

«وبششەستۆەننايا پوزيتسيا»

(پروەكت «DAT» №4 (321) وت 28 يانۆاريا 2016 گ.