بەيسەنبى, 14 قاراشا 2019
بىلگەنگە مارجان 3485 0 پىكىر 26 قاڭتار, 2016 ساعات 13:38

9 جاسار بالانىڭ داعدارىس تۋرالى ولەڭى حيتكە اينالدى

اقتوبەدە وتباسىنىڭ بار بەينەتىن ولەڭ جولدارىمەن جەتكىزگەن بالا اناسىنىڭ جانىن اۋىرتتى دەپ جازادى “كەرەك.info”.

شالعاي اۋدانداردىڭ ءبىرى ويىلدان اقتوبەگە كوشىپ كەلگەن تالمۋرزيندەر وتباسىنىڭ وزگە جۇرتتان ەش ايىرماشىلىعى جوق. ۇيمەلى-سۇيمەلى ءۇش بالامەن ماماندىعى جوق ەرلى-زايىپتىلار جالدامالى پاتەردە تۇرادى.

ءۇي يەسىنىڭ ايەلى مەڭتاي تالمۋرزينانىڭ سوزىنە قاراعاندا، وتباسى تابىسىنىڭ 70 پايىزى جالدامالى پاتەرگە جۇمسالادى. قارجىلىق داعدارىستىڭ جەلەۋى – پاتەراقى دا 15 000 تەڭگەدەن بىردەن 25 000 تەڭگەگە دەيىن كوتەرىلىپ كەتكەن. ودان بولەك كوممۋنالدىق قىزمەت اقىسى دا بار. “ازىق-تۇلىك تە كۇن سايىن قىمباتتاپ بارادى” دەپ مۇڭايدى جاس ايەل.

مەڭتايدىڭ توعىز جاستاعى ۇلى ءابۋناسىر اتا-اناسىنىڭ قينالعانىن كۇن سايىن كوزىمەن كورىپ ءجۇر. بىراق قولىنان كەلەر دارمەن بولماعاسىن ىشكى الەمىن اق قاعازعا تۇسىرە بەرگەن. وسىنداي تىرناقالدى تۋىندىلارىنىڭ ءبىرىن ء“بىز كەدەيمىز…” دەپ اتاعان.

ءبىز كەدەيمىز. نەسىنە جاسىرامىن؟
كوردىم اكەم جۇك اربا تاسىعانىن.
كوردىم انام بۇكشەڭدەپ ەدەن جۋىپ،
پاتەر يەسى الدىندا جاسىعانىن…

ءبىز كەدەيمىز. جۇرەگىمدە بار مۇڭىم،
وسىلايشا ءوتىپ جاتىر ءار كۇنىم.
اكە شەشەم جالدامالى پاتەردە
ۋايىمدايدى ءۇش بالانىڭ تاعدىرىن.

ءبىز كەدەيمىز. جات بوساعا مەكەندەپ
ۇمتىلامىن ءبىر شاتتىققا جەتەم دەپ.
انام ءۇشىن ءوزىم ەدەن جۋار ەم،
ارماندايمىن تەز ەرجەتسەم ەكەن دەپ.

ء“ۇش بالام بار. بالالارىمنىڭ ۇلكەنى بولعاسىن، وسىلاي ەرتە ەسەيدى مە، كىم ءبىلسىن؟ مەن جاعدايىمنىڭ قيىندىعىن ايتىپ، جۇرتقا الاقان جايايىن دەگەن ويدان اۋلاقپىن. ەدەن جۋسام دا، كۇيەۋىم اربا سۇيرەسە دە ءوز كۇنىمىزدى ءوزىمىز كورىپ ءجۇرمىز. تەك بالالارىمدى جىلاتقان داعدارىس تەزىرەك اياقتالسا ەكەن”، – دەيدى جاس دارىننىڭ اناسى.

دەرەككوزى: qazaquni.kz

0 پىكىر