ەسترادا جۇلدىزدارى دا قاراپايىم جاندار. ولاردىڭ دا قۋانىشتارىمەن قاتار كوڭىلگە كىربىڭ ۇيالاتار ساتسىزدىكتەرى بولادى.  جاڭا جىلدى بىردە تاماشا قارسى السا،  بىردە مەرەكە جانارىنا جاس ۇيالاتادى. BaiStars.kz Comode.kz-كە سىلتەمە جاساپ، وتاندىق جۇلدىزداردىڭ جاڭا جىل تۋرالى ەستەلىكتەرىن نازارلارىڭىزعا ۇسىنادى.

بايان ەسەنتاەۆا

ەڭ كەرەمەت جاڭا جىل وتباسىمەن بىرگە قارسى العان مەرەكە. ارينە، جاڭا جىلدا شەتەلگە بارىپ، جىلى جاقتا قارسى العانعا نە جەتسىن؟! سوندىقتان جاڭا جىل مەنىڭ تۇسىنىگىمدە تەڭىز، جاعاجاي جانە بالمۇزداق.

ەڭ ءساتسىز جاڭا جىل دەپ 90-جىلدارى بولعان مەرەكەنى ايتۋعا بولادى. قازىر ەسىمدە ەمەس، بىراق 1992-1993 جىل بولۋى كەرەك، جاڭا جىلدى مەيرامحانادا قارسى الدىم. ءبىز وتىرعان ۇستەل زالدىڭ ورتاسىندا ورنالاسقان ەدى، ءبىراز ۋاقىتتان سوڭ، وڭ جاعىمىز بەن سول جاعىمىزدا وتىرعان ادامدار ءبىر-بىرىمەن اتىسا باستادى. بىرەۋى تاپانشا شىعارسا، ەكىنشىسى اۆتومات كەزەندى. مەيرامحانانىڭ ىشىندەگى جيھازدىڭ تاس-تالقانى شىقتى، تەرەزەنىڭ ءبارى شىتىنادى. سوندا ادامداردىڭ ساۋ قالعانىنا تاڭ قالدىم. بۇل مەنىڭ ومىرىمدەگى ەڭ ءساتسىز، قورقىنىشقا تولى جاڭا جىل بولعان ەدى.

ايقىن تولەپبەرگەن

ەڭ كەرەمەت جاڭا جىل مەن ءۇشىن دالادا قالىڭ قار جاۋعانى، اياز بولعانى. سوندىقتان، جاڭاجىلدىق مەرەكەنى سولتۇستىكتە قارسى الۋ كەرەك دەپ ويلايمىن. ماسەلەن، بۋرابايدا قارسى العان كەش ەرەكشە ەسىمدە. اينالاڭ قالىڭ قار، دالادا ۇسكىرىك اياز، مونشاعا ءتۇسىپ، دەنەمىزدى قارمەن ىسقىلاعانبىز. مىنە، ناعىز جاڭا جىل دەپ وسىنى ايت.

ەڭ ءساتسىز جاڭا جىل ومىرىمدە بولعان ەمەس. ارينە، جالىقتىراتىن جاڭاجىلدىق مەرەكەلەر دە ورىن الادى. بىراق، ونى جامان دەپ ايتا المايمىن.

ءدىلناز احماديەۆا

اكە-شەشەڭمەن، باۋىرلارىڭمەن قارسى العان كەز-كەلگەن جاڭا جىلدى ەڭ كەرەمەت مەرەكەلىك كەش دەپ ايتۋعا بولادى.

ەڭ ءساتسىز جاڭا جىل دەپ ليفتىدە تۇرىپ قالعان كەزىمدى اتاۋعا بولاتىن شىعار. قاشان بولعانى ەسىمدە ەمەس، بىراق وسىنداي جايت باسىمنان وتكەنى راس.

ليدو

ادەتتە جاڭا جىلدى جاقسى كوڭىل-كۇيمەن، جاقىن ادامداردىڭ اراسىندا قارسى الامىن. بىراق، ەستە قالعان ەڭ كەرەمەت كەشتەر بالالىق شاقتا بولدى. عاجايىپقا سەنىپ، شىرشانىڭ تۇبىندە سىيلىق جاتاتىنىن ابدەن ءبىلىپ العانبىز. قايبىر جىلى ءىنىم ەكەۋىمىز شىرشانىڭ استىنان ءتورتبۇرىشتى قوراپتاردى تاۋىپ الدىق. اتا-انامىز ءوز قولىمەن قاعازدان قوراپ جاساپ، ىشىنە كامپيتتەر سالىپ قويىپتى. مەنىڭ قورابىمنىڭ ىشىنەن كونكي شىقتى. قازىر ءوزىم دە انامىن، بالالارىمدى سىيلىقپەن تاڭ قالدىرعاندى ۇناتامىن.

ومىرىمدە ءساتسىز بولعان جاڭا جىل جوق ەكەن.

ءادىل ليان

ءار جىلدىڭ ءوز ەرەكشەلىگى بار. بىردە جاڭا جىلدى مەن ءوزىم جالعىز قارسى الدىم. قاتتى قالجىراپ شارشاعانىم سونشالىق، ەشتەڭەگە شامام كەلمەدى. سول جىلى Hit TV تەلەارناسىن اشىپ، حابارعا جۇرگىزۋشىلەر جينادىق، جاڭا باعدارلامالار اشىپ، كوپ ەڭبەك ەتتىك. ابدەن شارشاپ، جاڭا جىلدى مۇلدەم تويلاماۋعا بەل بايلاعانىم ءالى ەسىمدە. ءسويتىپ، وزىمە اس ازىرلەپ، ديۆانعا جايعاسىپ، تەلەفونىمدى ءوشىردىم دە، تەلەديداردى قوستىم. سول ساتتە ەشكىمدى كورگىم كەلمەگەنى راس. جالپى، ءار جاڭا جىلدى وزگەشە ەتىپ تويلاۋعا تىرىسام.

جاڭا جىلدى ءساتسىز دەپ ايتۋعا كەلمەيدى. ءار جىل ءوز جاڭالىعىمەن ەستە قالادى، ادامدار ونى اسىعا كۇتەدى، جاقسىلىققا سەنەدى. سوندىقتان جاڭا جىلدىڭ ءبارى جاقسى.

الۋا قوناروۆا

ومىرىمدەگى ەڭ كەرەمەت جاڭا جىلدى استانادا Rin’Go توبىمەن قارسى الدىم. جاڭا جىلدىڭ كەلۋىنە 5 مينۋت قالعاندا ولار ساحنادا ونەر كورسەتىپ ءبىتتى. سودان قولىمىزعا بوكال الا جۇگىرىپ، ءبىر-ءبىرىمىزدى اسىعىس قۇتتىقتادىق تا، ساحناعا قايتا ورالدىق. نەگە ەكەنىن بىلمەيمىن، ءدال وسى جاڭا جىل ەسىمدە جاتتالىپ قالىپتى.

ەڭ ءساتسىز جاڭا جىل دەپ جالعىز ءوزىم قارسى العان مەرەكەنى ايتار ەدىم. ول كەزدە 22-23 جاستاعى بويجەتكەنمىن. انام قۇربىلارىمەن قارسى الۋدى ۇيعاردى، دوستارىم شەتەلگە ۇشىپ كەتكەن، ال مەن جۇمىستىڭ كوپتىگىنەن ۇيدە قالدىم. تەلەديداردى قوسىپ، تاتتىلەردى ساتىپ الدىم دا، ءوز-ءوزىمدى جاڭا جىلمەن قۇتتىقتادىم. ءتىپتى كوڭىلىم ءتۇسىپ، جىلاپ تا الدىم.

رانو ۋماروۆا

ەڭ كەرەمەت جاڭاجىلدىق مەرەكەلەر بالالىق شاعىمدا ءوتتى. اياز اتا بار ەكەنىنە قاتتى سەنەتىنمىن، عاجايىپقا سەنەتىن ەدىم. بىردە جاڭا جىل قارساڭىندا جەرگە قۇلاپ، مۇرنىمدى بۇزىپ الدىم. ءسويتىپ، جارالى كۇيدە مەيرامدى قارسى الدىم، بىراق، سول كەزدىڭ ءوز قىزىعى بار.

نۇرجان كەرمەنباەۆ

ەڭ كەرەمەت جاڭا جىل Superstar KZ جوباسىنان كەيىن ۇيگە بارعانىم ەدى. 2009 جىلى داستارحان باسىنا وتباسى مۇشەلەرى تۇگەل جينالىپ، جاڭا جىلدى قارسى الدىق.

ەڭ ءساتسىز جاڭا جىل 2006 جىلى قاراعاندىعا اپكەمە بارعان cاپارىم. ول استاناعا قۇربىلارىنا جول تارتىپ كەتكەن ەكەن. ۇيدە ەشكىم بولعان جوق.

لۋينا

مەن ءۇشىن ءار جاڭا جىل كەرەمەت. جاراتقانعا ءار جىلعا امان-ەسەن جەتكەنىمە، تۋعان-تۋىستارىمنىڭ اماندىعىنا، ساحناعا شىعۋعا مۇمكىنىدىگىم بار ەكەنىنە ريزالىعىمدى بىلدىرەم. جاڭا جىلدا جۇمىس ىستەگەندى ۇناتام جانە مەرەكە كەزىندە ساحنادا ءان ايتىپ تۇرعىم كەلەدى.

ءساتسىز جاڭا جىلىم بولعان ەمەس.

كەنتال

ەڭ تاماشا جاڭا جىل دەپ اكەمنىڭ “سەگا” ويىنىن سىيعا تارتقان كەزىن ايتار ەدىم. ول جىلدارى ونداي ويىنشىق ەشكىمدە بولعان جوق، ارنايى كلۋبقا بارىپ 50 تەڭگە تولەپ وينايتىن ەدىك. اكەم سىيلىقتى قولىما ۇستاتقاندا، مەنەن باقىتتى ادام بولماعان شىعار.

ەڭ ءساتسىز جاڭا جىل دەپ وتكەن جىلدى ايتار ەدىم. باسىمنان كوپ سىناق ءوتتى، جاعىمسىز وقيعالار دا بولدى.

ءمولدىر اۋەلبەكوۆا

ەڭ كەرەمەت جاڭا جىلدى مەكتەپ كەزىندە وتكىزدىم. ول شاقتا وتباسىمىزبەن، اكەم، انام، اپكەم، ءىنىم جانە مەن داستارحان باسىنا جينالىپ، تىلەك ايتاتىنبىز. ادەتتە ۇيگە كوپ ادامدار كەلىپ، مەرەكەنى بىرگە تويلايتىنبىز. بىراق، ءبىر جىلى ۇيگە قوناقتار كەلمەي، تەك ءوزىمىز بولدىق. ادەمى كيىنىپ، ماسكا كيىپ، ابدەن كوڭىل كوتەردىك.

مەنىڭ ومىرىمدە ءساتسىز جاڭا جىل بولعان ەمەس.

Abai.kz