جاقىندا تۇركيا سىرتقى ىستەر ءمينيسترى مەۆلۇت چاۆۋشوگلى رەسەي فەدەراتسياسى مەن تۇركيا رەسپۋبليكاسىنىڭ اراسىندا بولۋى ىقتيمال «اسكەري-قاقتىعىستارعا» قاتىستى پىكىر ءبىلدىردى.
ازىربايجاندىق «minval.az» سايتىنىڭ حابارلاۋىنشا، تۇركيا سىرتقى ىستەر ءمينيسترى تۇركيالىق تەلەارنالاردىڭ بىرىنە بەرگەن سۇحباتىندا رەسەي قارۋلى كۇشتەرى مەن تۇركيانىڭ قازىرگى اسكەري احۋالىن سالىستىرعان.

«ەگەر تۇركيا مەن ناتو اسكەرلەرى بىرىگەتىن بولسا، تۇركيا رەسەيدىڭ بۇكىل تەرريتورياسىن 7 كۇننىڭ ىشىندە جاۋلاپ الادى. بىزدە مۇنداي كۇش پەن كەلىسىم بار. ەگەر قاجەت بولسا، ءبىز ناتو-مەن كۇش بىرىكتىرەمىز. ەگەر ءبىز ناتو-مەن بىرىگەتىن بولساق، بار-جوعى جەتى كۇندە رەسەيدى جەر بەتىنەن جوق قىلىپ جىبەرۋگە شامامىز جەتەدى»،-دەدى تۇركيا ءسىم مەۆلۇت چاۆۋشوگلى (http://minval.az/news/123524504).
ەستەرىڭىزگە سالا كەتەيىك، وسىعان دەيىن تۇركيالىق «Habertürk» باسىلىمى حابارلاعانداي، تۇركيا قارۋلى كۇشتەرى 27 رەسەيلىك تەڭىز كەمtسىن قاماپ قويعان.
«The First News» باسىلىمىنىڭ حابارلاۋىنشا، قازىر جەرورتا، ءمارمار، ەگەي جانە قارا تەڭىزدەگى احۋال ۋشىعا تۇسكەن.
ال رف قارۋلى كۇشتەرى بولسا، 6 بىردەي تۇركيالىق جۇك كەمەسىن قاماعاندىعى تۋرالى اقپاراتتى رەسەيلىك «دوجد» ارناسى تاراتىپ ەدى.
سونىمەن قاتار، قوس ەلدىڭ قارۋلى كۇشتەرى سيريا تەرريتورياسى اۋماعىندا اسكەري بازالارىن بەكىتە تۇسۋدە.
الەمدىك ساراپشىلار، پۋتين مەن ەردوعان ەرەگەسى ءۇشىنشى دۇنيەجۇزىلىك سوعىستىڭ وشاعىنا اينالىپ كەتۋى مۇمكىن دەيدى.

كەيبىر بولجامدارعا قاراعاندا، رەسەي تاياۋدا تۇركيانىڭ الدەبىر اسكەري ۇشاعىن اتىپ ءتۇسىرۋى ىقتيمال. سوندا عانا قارىمتا قايتارىلادى، رەسەيدىڭ ەسەبى تەڭەسەدى. سوندا عانا ءپۋتيننىڭ كوڭىلى كونشيدى. بۇعان دايىندىق جاسالىپ تا قويدى. بۇدان بىلاي سيرياداعى رەسەيدىڭ بومبالاۋشى ۇشاقتارى اۋەدە سوعىس جۇرگىزۋگە قاجەتتى «اۋە-اۋە» تاكتيكالىق زىمىراندارىن دا الىپ ۇشاتىن بولدى. وسىعان ۇقساس زىمىراندارمەن جابدىقتالعان «موسكۆا» اسكەري كەمەسى دە تۇركيامەن شەكارالاس سيريانىڭ لاتاكيا ايماعىنىڭ جاعالاۋىنا جاقىنداتىلدى. سيريانىڭ لاتاكيا ايماعىنداعى رەسەيدىڭ اۋە كۇشتەرى بازاسىنىڭ قاسىنا 400 شاقىرىم قاشىقتىق پەن 30 شاقىرىم بيىكتىكە دەيىنگى جاۋدىڭ ۇشاقتارى مەن زىمىراندارىن اتىپ قۇلاتاتىن س-400 اۋە قورعانىس كەشەنى اسكەري كەزەكشىلىككە قويىلدى. «يسلام مەملەكەتى» مەن سيريا وپپوزيتسياسىنىڭ جاساقتارىندا ۇشاقتار مەن زىمىراندار جوق. ولاي بولسا، س-400 قوندىرعىسىنىڭ قانداي نىسانانى كوزدەيتىنى دە بەلگىلى. رەسەي باسشىلىعى س-400 قوندىرعىسى وزدەرىنىڭ سيرياداعى اسكەري اۋە بازاسىن قورعاۋ ءۇشىن قويىلعانىن ايتادى. دەگەنمەن، بۇل قوندىرعىنىڭ قاداعالاۋ راديۋسى تۇركيانىڭ وڭتۇستىك ايماعىنا ىشكەرىلەپ كىرىپ كەتتى. ءتىپتى، تۇركيانىڭ ادانا قالاسىنىڭ ماڭىنداعى يندجيرليك اسكەري اۋە بازاسىنىڭ اسپانى رەسەيلىك س-400 قوندىرعىسىنىڭ باقىلاۋ ايماعىندا قالىپ قويدى. بۇل بازادان تۇرىك ۇشاقتارى ۇشىپ شىعا سالا تەڭىزدە تۇرعان «موسكۆا» كەمەسىنىڭ زىمىراندارى مەن لاتاكياداعى س-400 قوندىرعىسىنىڭ نىساناسىنا الىنادى. بۇل وقتالعان مىلتىقتى كەزەگەنمەن بىردەي. مۇنداي ارەكەت يندجيرليكتەگى تۇرىك اسكەري ۇشقىشتارىنىڭ دەگبىرىن قاشىرىپ، ءار كەز ابىگەرگە سالادى.
سونىمەن قاتار، رەسەي تۇركياعا قارسى ەكونوميكالىق سيپاتتاعى سانكتسيالاردىڭ تۇگەلگە جۋىعىن جاساپ ۇلگەردى: تۇرىك تاۋارلارىنىڭ رەسەيدە ساتىلۋىنا شەكتەۋ قويىلدى; ەكى ەل اراسىنداعى ۆيزاسىز رەجيمدى جويىپ، تۇرىك ازاماتتارىن جۇمىسقا الماۋ جونىندە ارنايى قاۋلى شىعارىلدى; تۇركيا باعىتىنداعى تۋريزم توقتاتىلدى; ءتىپتى رەسەي ەۋرازيالىق ەكونوميكالىق وداق جانە كەدەن وداعىنا كىرەتىن پوستسوۆەتتىك ەلدەردىڭ تۇركيامەن ساۋدا-ساتتىق جاساۋىنا كەدەرگىلەر قويىپ جاتىر. بۇل وتە قاۋىپتى جاعداي. كەز كەلگەن تاراپتىڭ قاتە جاسالعان قادامى اسكەري قاقتىعىسقا، سوڭى ۇلكەن سوعىسقا اپارادى.
P.S. تۇركيا سىرتقى ىستەر ءمينيسترى مەۆلۇت چاۆۋشوگلىنىڭ «ەگەر ءبىز ناتو-مەن بىرىگەتىن بولساق»، - دەگەن سوزىنەن شىعادى. جاقىندا تۇركيالىق «www.trt.net.tr» سايتى ەكى بىردەي تۇرىك ازاماتى ناتو باس شاتابىندا جوعارى لاۋازىمدى قىزمەتتەرگە تاعايىندالعانىن حابارلادى. ەلشى تادجان يلدەم ناتو باس حاتشىسىنىڭ ورىنباسارى بولىپ تاعايىندالسا، بۋردجۋ سان ناتو وپەراتسيالار ءبولىمىنىڭ ديرەكتورى بولدى.

نۇرگەلدى ابدىعانيۇلى
Abai.kz