جاقىندا پرەزيدەنتتىڭ جيەنى ايسۇلتان نازارباەۆ ومىردەن وتكەن اكەسى راحات اليەۆتى ەسكە الىپ، Facebook-تەگى پاراقشاسىندا ول تۋرالى ويلارىن جازدى.  

"جاقىندا مەنىڭ كوزىمە بۇقار جىراۋدىڭ ايتقان ءبىر ناقىل ءسوزى شالىندى (ابىلاي حاننىڭ كەڭەسشىسى): "اكەلى بالا – جاۋ جۇرەك، اكەسىز بالا – سۇم جۇرەك. ءوز اكەسىن مويىنداعان ادام – باتىل. ءوز اكەسىنەن بەزگەن ادام – زۇلىم".

كەيبىر جاعدايلارعا بايلانىستى 10 جەلتوقسان كۇنى مەن وسى سوزدەردى وقىدىم. سول كۇنى مەنىڭ اكەم راحات اليەۆ ءوزىنىڭ 53 جاسىن قارسى الار ما ەدى، الايدا، وكىنىشكە قاراي، اللانىڭ وزگە جوسپارلارى بولىپتى. ول وتە قاراپايىم ادام بولاتىن، الايدا ءومىر دەگەن قيىن دۇنيە. وندا ءبارى قارا نەمەسە اق بولۋى مۇمكىن. ءومىردىڭ ءمانى – ەرەكشەلىگى مەن وزگەشەلىگىندە. ماعان جاقسى تاربيە بەردى، ءوسىردى، وقىتتى، ءدال سول ادام مەنىڭ فۋتبول مەن سپورتقا دەگەن ماحابباتىمدى وياتقان، سوندىقتان دا مەن ونى ارقاشان تەك جاقسى اكە رەتىندە ەسكە الامىن. قانداي جاعداي بولماسىن، ءوز اكەسىنىڭ ۇلى رەتىندە مەن وعان تەك العىس ايتامىن.

كەيدە مەن ول تۋرالى ءارتۇرلى نارسەلەردى وقيمىن. ونى سىيلاعان جانە جاقسى كورگەن ادامدار بار، جانە ءالى كۇنگە دەيىن كورگىسى كەلمەيتىن دە ادامدار بار. مەن اللادان قورقاتىن ادام رەتىندە ەشكىمدى سوكپەيمىن، ەرتە مە، كەش پە ءبارىمىز سونىڭ الدىنا بارامىز، سوندا اركىم ءوزىنىڭ شىندىعىنا قاراي جاۋاپ بەرەدى. بىرەۋدى سوگۋ – اركىم كوتەرە بىلمەيتىن وتە اۋىر سالماق. ءتىپتى، پرەزيدەنت وتكەنىن ەسكە الىپ وتىرىپ، اكەمنىڭ تاعدىرىنا قاتىستى شەشىم قابىلداعاندا قاتتى قينالعانىن ايتتى. مەن اتامنىڭ بويىنداعى باتىلدىق پەن جىگەرلىلىككە تاڭدانامىن. كوپ ادام بىلە بەرمەيدى، ول مەنىڭ اكەمنىڭ ورنىن الماستىرىپ، قايراتتى جۇرەك پەن پاراساتتى اقىل ارقىلى ءومىر سۇرۋگە ۇيرەتكەنىن... مەن ويلايمىن وسىنىڭ ارقاسىندا شىندىقتان قورىقپاي، ءوز ارىمنان ۇيالماي، وزىممەن ءوزىم بولۋدى ۇيرەندىم. ول مەنى شىنايى ءومىر جانە ءوز ۇندەستىگىممەن ءومىر سۇرۋگە ۇيرەتتى.

كوپشىلىكتىڭ الدىندا ءوزىمنىڭ ەرتەڭىم ءۇشىن اكەمنەن تەرىس اينالۋىم كەرەك دەگەن پىكىر ايتقان مەنىڭ ومىرىمدە كەڭەسشىلەر دە بولدى. وكىنىشتى، ەگەر ونداي ادامداردىڭ جانى بولماسا ونداي ادامدار قالاي ءومىر سۇرەدى؟ مەن ءوز اكەمنەن تەرىس اينالۋدى ەشقاشان دا ويلاعان ەمەسپىن. سەبەبى، اناممەن ماعان ءومىر سىيلاعان ادام – اكەم بولعاندىقتان  مەنىڭ ويىمدى ەشكىم دە، ەشتەڭە دە وزگەرتە المايدى.

مەن قانداي دا ءبىر جەكە ماقساتتار ءۇشىن نەمەسە قانداي دا ءبىر مانساپ ءۇشىن ودان باس تارتپاق ەمەسپىن. ءومىردى ءسۇرىپ جانە ءومىرىمنىڭ سوڭىنا دەيىن ءوز-وزىنە ادال بولىپ قالۋدان اسقان مانساپ جوق. مەنىڭ بۇل دۇنيەدە قاتتى قورقاتىن نارسەم كوپ، جىلداردان كەيىن ويانىپ، ءوزىمدى جوعالتىپ العانىمدى سەزىنۋ. ءدال سونداي ادامداردىڭ وسى ومىردە دە، انا ومىردە دە باقىتى مەن تىنىشتىعى بولمايدى.

10 جەلتوقسان كۇنى اكەمدى تەك جاقسى ويلارمەن ەسكە الدىم. مەنىڭ جۇرەگىمدە ءدال سول ساتتە ەشقانداي زۇلىمدىق بولعان جوق. تەك جىلى سەزىمدەر مەن كوكتە عانا كورىسەتىنىمىز جايلى ازداعان وكىنىش بولدى. مەن "ومىردەن وتكەندەر تۋرالى جاقسىلىعىن عانا ايتۋ كەرەك دەپ" سوڭىنا ءسوز قالدىرعان ادام وتە دانا كىسى بولعان دەپ سانايمىن.  قازىر مەنىڭ دە وتباسىم بار، ينشاللا بالالارىم دا بولادى. مەنىڭ تاعدىرىم قانداي بولارىن بىلمەيمىن، بىراق بارىنەن بۇرىن ۇلىم نەمەسە ۇلدارىم مەنى ءدال سولاي، ەشتەڭەگە قاراماستان، قۇرمەتپەن ەسكە الىپ وتىرعانىن قالايمىن. سول كەزدە مەن، ءتىپتى اسپاندا ولارعا بۇقار جىراۋدىڭ ءوزى “سەندەر ناعىز ەرسىڭدەر – ماقتان تۇتامىن” دەگەن سوزدەرىمەن قاراپ تۇرا الامىن".

Facebook-تەگى پاراقشاسىندا ايسۇلتان راحاتۇلى وسىلاي دەپ جازدى. ءيا، ولار ءبىرتۇتاس وتباسى ەدى. نەپوتيزم. وتباسى ويران بولدى. ءبىر-اق كۇنىڭ ىشىندە اكەسى بالاسىنا جاۋ بولىپ شىعا كەلدى. ايسۇلتاننىڭ پرەزيدەنت اتاسىنىڭ ءوزى، راحات اليەۆتى اباقتىعا قاماتۋدىڭ وڭايعا تۇسپەگەنىن، ويتكەنى نەمەرەلەرى مەن قىزدارىنىڭ راحاتاتقا راقىمشىلىق جاساۋىن سۇراپ كەلگەندىگى تۋرالى ايتقان بولاتىن (https://www.youtube.com/watch?v=TNLMuUnRiLg). الايدا زاڭ الدىندا ءاربىر قازاقستاندىقتىڭ تەڭ ەكەندىگىنە پرەزيدەنت پارمەن ەتتى.

دەگەنمەن، وتباسىلىق «اۆتوريتەت» دەگەن بار عوي. پرەزيدەنت  ءفۇتبولدان ازدى-كەم حابارى بار نەمەرە جيەنىنە قولداۋ ءبىلدىرىپ، قفف توراعالىعىنا تاعايىنداۋ تۋرالى شەشىمگە كەلسە كەرەك. ونى ايسۇلتان راحاتۇلى نازارباەۆتىڭ ءوزى مويىندادى.  سونىمەن، پرەزيدەنت نۇرسۇلتان نازارباەۆتىڭ جيەنى ايسۇلتان نازارباەۆ قازاقستان فۋتبول فەدەراتسياسى باسشىسى قىزمەتىن اتقارعىسى كەلەتىن نيەتىن اشىق جاريالاپ جاتىر. فەدەراتسيانىڭ قازىرگى پرەزيدەنتى ەرلان قوجاعاپانوۆتى وتستاۆكاعا جىبەرۋ ماسەلەسىن كوتەردى. قوجاعاپانوۆ كەتتى. اكەسى ءۇشىن بالاسى ۇيالادى دەگەن ناۋميەزدىكتى قويا تۇرىپ، ايسۇلتان تۋرالى ءسوز ەتەيىك ەندى.

Vesti.kz سايتى ايسۇلتان نازارباەۆتىڭ «اللانىڭ قالاۋىمەن وسىنداي اۋلەتتە، ياعني ەلباسىمىز ءارى پرەزيدەنتىمىزدىڭ وتباسىندا دۇنيەگە كەلدىم. پرەزيدەنتتىڭ جيەنى بولۋ – مەنىڭ نەگىزگى ءارى تاۋلىگىنە 24 ساعات بويى اتقاراتىن قىزمەتىم» دەگەن سوزدەرىن كەلتىرگەن.

25 جاستاعى ايسۇلتان نازارباەۆ – ۇلىبريتانيانىڭ قۇرلىق اسكەرلەرىنىڭ «ساندحەرست» اسكەري اكادەمياسىنىڭ تۇلەگى. ءوزىنىڭ جازۋىنشا، اكادەميادا وقىپ ءجۇرىپ «ۇلىبريتانيانىڭ جەتەكشى كلۋبتارىندا» ويناعان.

نەپوتيزمنىڭ نەگىزگى فيگۋرانتى بولعان اكەسى مارقۇم مەن ايسۇلتاننىڭ اراسىندا بايلانىس مۇلدە بولماعان دەۋ دە جاڭساقتىق. 2009 جىلى ازاتتىق سايتىندا جارىق كورگەن ماقالادا، راحاتتىڭ وتباسىمەن ارا-تۇرا كورىسىپ تۇراتىنى ايتىلعان. 

ال مارقۇم راحات شە؟ راحات اليەۆ – قازاقستان يستەبليشمەنتى ءۇشىن قاتارداعى قازاقستاندىق سانالماسا كەرەك-ءتى. ول ءبىرىنشى كەزەكتە قر پرەزيدەنتىنىڭ بۇرىنعى كۇيەۋ بالاسى. اكەسى قانشا جەردەن قىلمىسكەر بولسا دا، ونىڭ بالالارى ءۇشىن  نۇرسۇلتان ءابىشۇلى – اتا. سودان كەيىن بارىپ، راحات ەكس-ەلشى، بەيرەسمي ديسسيدەنت. ءوزىن-ءوزى جاريالاعان – بيلىك وپپونەنتى.

راس، ايسۇلتان ءالى جاس. جاس كەلسە – ىسكە. شەتەلدە جيناقتاعان تاجىربيەلەرى مەن قازاقستاندا ءجۇرىپ ۇيرەنگەندەرىن ەندى قازاقستان فۋتبولىنا سالاتىنىنا ۇلكەن سەنىممەن قارايمىز.

نۇرگەلدى ابدىعانيۇلى

Abai.kz