سارسەنبى كۇنى جۋرناليستەرمەن تىلدەسكەن رەسەي پرەزيدەنتىنىڭ ءباسپاسوز حاتشىسى دميتري پەسكوۆ بۇل ماسەلەنىڭ تالقىلانىپ جاتقانىن، الايدا ءوزىنىڭ بىلۋىنشە ول جەردە شەكتەۋ تۋرالى ماسەلە كوتەرىلمەگەنىن جانە بۇعان پرەزيدەنت اكىمشىلىگى تاپسىرمالارىنىڭ ەش قاتىسى جوقتىعىن ايتتى. «ينتەرفاكستىڭ» تاراتۋىنشا، پەسكوۆ مەسسەندجەرلەرگە قانداي دا ءبىر شەكتەۋ قويۋدان ءوز باسىنا دا كوپتەگەن قولايسىزدىقتار تۋاتىنىن مالىمدەگەن.

بۇعان دەيىن سارسەنبى كۇنى «ۆەدوموستي» گازەتى رەسەيدە حابارلاما الماسۋ جۇيەلەرىن باقىلاۋدى كۇشەيتەتىن زاڭ جوباسىنىڭ دايىندالعانى تۋرالى جازعان ەدى.

قۇجاتتا مەسسەندجەرلەردىڭ رەسەيدە تەك بايلانىس وپەراتورلارىمەن كەلىسىمشارت نەگىزىندە جۇمىس ىستەۋگە جانە ءوز جۇمىستارى تۋرالى روسكومنادزورعا حابارلاپ وتىرۋعا مىندەتتى ەكەنى جايلى جازىلعان.

دەرەككوزدەردىڭ پىكىرىنشە، زاڭ جوباسىن روسكومنادزور كرەملدىڭ نۇسقاۋىمەن ازىرلەگەن.

اباي-اقپارات