قر ۇلتتىق مۋزەيىندە قر مادەنيەت جانە سپورت مينيسترلiگiنىڭ ۇيىمداستىرۋىمەن كورنەكتى مەملەكەتتىك قايراتكەر جۇمابەك تاشەنوۆتىڭ 100 جىلدىعى قۇرمەتىنە ارنالعان سالتاناتتى ءىس - شارا وتكىزىلدى. بۇل تۋرالى abai.kz پورتالى  strategy2050.kz  سايتىنا سىلتەمە جاساي وتىرىپ حابارلايدى.

ءىس –شارادا ج. تاشەنوۆتىڭ ءومىرى مەن قىزمەتىن زەرتتەۋشىلەر، تۋىستارى جانە ونىڭ ءومىرى مەن قىزمەتى جايلى اڭگىمەلەپ بەرگەن وزگە دە قوناقتار بولدى. سونىمەن قاتار سالتاناتتى ءىس – شارا اياسىندا قازاق ساحناسىنىڭ شەبەرلەرى، سونىمەن قاتار ق. قۋانىشباەۆ اتىنداعى قازاق مۋزىكالىق – دراما تەاترىنىڭ ارتىستەرى ونەر كورسەتتى. بۇدان باسقا،  كەش قوناقتارىنا ج. تاشەنوۆتىڭ ءومىرى جايلى ۆيدەوفيلم كورسەتىلدى.

سونىمەن قاتار قازاقستاننىڭ تاۋەلسىزدىگىنىڭ قالىپتاسۋىنداعى تاريحي ماڭىزىن اشىپ كورسەتكەن ج. تاشەنوۆتىڭ ءومىرى مەن قىزمەتى جايلى جازىلعان كىتاپتاردىڭ كورمەسى ۇيىمداستىرىلدى. كورمەدە قاراپايىم اۋىل جىگىتىنەن كسرو جوعارعى كەڭەسى پرەزيديۋمىنىڭ توراعاسى قىزمەتىنە دەيىن كوتەرىلگەن ج. تاشەنوۆتىڭ تۇلعاسىنىڭ قالىپتاسۋى جايلى ەنتسيكلوپەديالىق مالىمەتتەر كەلتىرىلگەن، سونداي-اق  ونىڭ ءومىربايانىن زەرتتەۋشىلەردىڭ كىتاپتارى كەلۋشىلەرگە كورسەتىلدى.

ەستەرىڭىزگە سالا كەتەيىك، جۇمابەك تاشەنوۆ كەزىندە كەڭەس وداعىن اشسا الاقانىندا، جۇمسا جۇدىرىعىندا ۇستاپ تۇرعان ن. حرۋششەۆتىڭ ء«بولىپ ال دا، بيلەي بەر» دەگەن اپەرباقان ساياساتىنا قارسى تۇرىپ، بابالارىمىز امانات ەتىپ كەتكەن قازاقتىڭ قاسيەتتى جەرىن قورعاپ قالعان ۇلت قايراتكەرىنىڭ بىرەگەيى. ول سول كەزدەگى پارتيالىق-رەپرەسسيالىق ساياساتقا ءبىلىمى مەن بىلىكتىلىگىن، ۇلتتىق نامىسى مەن پاراساتتىلىعىن قارسى قويا بىلگەن تۇلعا.

جۇمابەك تاشەنوۆ كىم ەدى؟

تاشەنوۆ – ەرلىگى ەلەنبەگەن حالىق قاھارمانى!  

 ءيا، جۇمابەك تاشەنوۆ اسىرەساق، قوسۇرەي زاماندا بيلىككە كەلسە دە، كومپارتيالىق يەرارحيانىڭ بۇرالاڭ باسپالداقتارىمەن كوتەرىلۋدى عانا كوزدەگەن شەنقۇمار باسشى، قارا باسىنىڭ قامىن عانا كۇيتتەگەن كوپ شەنەۋنىكتىڭ ءبىرى بولماي، ۇلتىن سۇيگەن اياۋلى ازامات، ۇلتتىق قاھارمان دەڭگەيىنە كوتەرىلە ءبىلدى. قازاق جەرىنىڭ تۇتاستىعى ءۇشىن ازۋى كەرەقارىس كسرو باسشىلارىمەن قاسارىسا كۇرەسىپ، ايتقانىن ورىنداتا ءبىلدى. ۇلتتىق قۇندىلىقتار مەن ۇلت مۇددەسى ءۇشىن بيىك مانساپ پەن قاراقان باسىنىڭ، وتباسىنىڭ، اۋلەتىنىڭ، ۇرپاعىنىڭ راحاتىنان باس تارتتى. ەسەسىنە التىنعا دا، اقشاعا دا ساتىپ الا الماس حالقىنىڭ، ەلىنىڭ، ۇرپاعىنىڭ ىستىق ىقىلاسى مەن سۇيىسپەنشىلىگىنە بولەندى.

دەسە دە، تاۋەلەلسىز ەلدىڭ جالتاق بيلىگى  تاشەنوۆكە باعاسىن بەردى مە؟ 

ءيا، قاراپايىم حالىق تاراپىنان جۇمابەك تاشەنوۆتىڭ 100 جىلدىعىنا وراي حالىق قالاۋلىسىنىڭ ەسىمىن ماڭگى ەستە قالدىرۋ باعىتىنداعى ناقتى ۇسىنىستار كوپتەپ ايتىلۋدا. ەندى وسىنداي قوعامدىق پىكىردى بيلىك قانا ەمەس، شىنايى حالىقتىڭ پارتياسى بولۋعا ۇمتىلۋشى «نۇر وتان» پارتياسى شىنداپ قولعا الىپ، قازىردەن باستاپ قىزۋ دايىندىققا كىرىسسە، نۇر ۇستىنە نۇر بولار ەدى.

نۇرگەلدى ابدىعانيۇلى

Abai.kz