كەشە پاۆلودار قالاسىنىڭ اكىمى  بولات باقاۋوۆ شاھاردىڭ سوڭعى 11 ايداعى  الەۋمەتتىك-ەكونوميكالىق دامۋى تۋرالى ەسەپ بەردى. وسىلايشا بريفينگىندە باق وكىلدەرىمەن كەزدەسكەن باقاۋوۆ مىرزا ءار اپتانىڭ العاشقى كۇندەرى قوعامدىق كولىكپەن جۇرەتىنىن ايتىپ، مارشرۋتتىق اۆتوبۋستاردىڭ باعىتتارىنىڭ وزگەرۋى جايىندا پىكىرىن بىلدىرگەن. بۇل تۋرالى رavlodarnews.kz سايتى جازادى.

سونداي-اق قالا اكىمى ءار دۇيسەنبى سايىن قوعامدىق كولىكپەن جۇرەتىنىن دە ءسوز ەتتى.

-. ءوز باسىم ءار دۇيسەنبى سايىن اۆتوبۋستارمەن جۇرۋگە تىرىسامىن. بىردە سەلفي جاساۋعا ۇسىنىس بىلدىرگەن جىگىتتىڭ ءسوزىن جەرگە تاستاماي كەلىسىم بەردىم. الايدا سۋرەتتى الەۋمەتتىك جەلىگە سالماۋىن ءوتىندىم، - دەيدى  ب. باقاۋوۆ مىرزا. بريفينگ سوڭىندا قالا اكىمى ءبىر دۇيسەنبىدە جۋرناليستەردى وزىمەن بىرگە اۆتوبۋسپەن جۇرۋگە شاقىرۋعا ۋادە بەردى.

اكىمنىڭ ايتۋىنشا، ول وسىلاي قوعامدىق كولىكپەن جۇمىسقا بارىپ جۇرگەنىنە ەكى ايدان اسقان. ال قالا باسشىسى باقاۋوۆتى تانىپ قالعان تۇرعىنداردىڭ ءبىرى ونىڭ اۆتوبۋس ىشىندەگى سۋرەتىن الەۋمەتتىك جەلىگە تاراتىپ جىبەرگەن.

ءيا، پاۆلودار قالاسىنىڭ اكىمى الگى سۋرەتتەگى ادامنىڭ ءوزى ەكەنىن مويىنداعان. ءبىر قىزىعى، ونىڭ اكىم ەكەنىن ەشكىم بىلە بەرمەيدى ەكەن. دالىرەك ايتساق، اۆتوبۋستاعى ءنوپىر حالىق اكىمدى تانىمايدى.  باقاۋوۆتىڭ ءوزىنىڭ ايتۋىنشا، ءتىپتى بىردە ونى وبلىس اكىمى قانات بوزىمباەۆپەن شاتاستىرىپ العاندار دا بار ەكەن.

جاقىندا اوتوبە وبلىسىنىڭ اتى ءماشھۇر اكىمى بەردىبەك ماشبەكۇلى ساپارباەۆ تا قوعامدىق كولىكپەن ءجۇرىپ، جۇرتتى تاڭ قالدىرماق بولىپ ەدى. قاسىنا يمامىن ەرتىپ الىپ، قالاداعى №15 باعىتتاعى اۆتوبۋستا  جولاۋشىلارمەن ەمەن-جارقىن اڭگىمەلەسىپ، قىزىقتى وقيعالارىن بايانداپ بەرگەن.

ايتپاقشى، شىمكەنت قالاسىنىڭ ەكس-اكىمى دارحان ساتىپالدى مىرزا دا ارا-تۇرا اۆتوبۋسپەن ءجۇرىپ، PR شوۋ جاسايتىن ادەتى بار ەدى. ال شىمقالانىڭ سۋ جاڭا اكىمى عابيدوللا ءابدىراحىموۆ قوعامدىق كولىكتەرمەن شاھاردى شىر اينالىپ، باسقارما باسشىلارىنا اۆتوبۋستىڭ ىشىندە تاپسىرمالار بەرىپ ەدى عوي. وسىلايشا، ءابدىراحىموۆ ەكى اي بويى قالا باسشىلارىنىڭ كوشىن باستاپ تۇرعان.

سونىمەن ەكونوميكالىق داعدارىس ەسىك قاقتى. الەمدىك گەوساياسي احۋال كۇن سايىن قۇبىلىپ تۇر. تاۋەلسىزدىكتىڭ 25 جىلىندا شەنەۋنىكتەردىڭ تىزگىندى مىقتى ۇستاعانى دا، اتتان قۇلاعانى دا از ەمەس. اكىم كىم؟ حالىققا جاقىن كىم؟ ونى مىنا جۇرت انىق اڭعارۋدا. شەندىلەردىڭ ىشىندە اتى ايگىلىسى دە، ەسىمىن ەل بىلمەيتىن ەلەۋسىزى دە كوپ. قاي وڭىردە وندىرىس وركەندەپ، قاي وڭىردە كوررۋپتسيا قانات جايىپ وتىرعانى قاراپايىم حالىققا ايان. قاي اكىمنىڭ ۇلتتىق رۋحتى ۇلىقتاپ، قاي اكىمنىڭ شەتەلدىڭ شەكپەنىنە قۇمار ەكەنى دە جاسىرىن بولماسا كەرەك. تەك جوعارىدا ءبىز اتتارىن اتاپ، تۇستەرىن تۇستەگەن اكىمدەر ارزان جارناماعا دەگەن اۋەستىكتەرىن باسا الماسا كەرەك. PR جۇرىستەر ارقىلى حالىقتىڭ نازارىن اۋدارۋ ءۇشىن اكىمدەر وسىنداي ايلالارعا ءجيى بارىپ تۇراتىنى زاڭدى قۇبىلىس. تەك قوعامدىق كولىك ىشىنە كىل ناكەرلەرىمەن شابارماندارىن جيىپ اپ، ونى باق ارقىلى تاراتقانان اكىم مىرزالار نە ۇتادى؟ تەگىندە ەل نازارىندا ويىن جاساۋ ارقىلى ەلباسىنىڭ كوزىنە ءتۇسىپ قالۋدى كوزدەيتىن اكىم مىرزالار نە ىستەمەدى؟ كۇيساندىقتا (پيانينو), گيتارادا، دومبىرادى ويناپ، پاتشام-اۋ، دەپ ءان ايتقاندار دا جوق ەمەس. ەندى بىرەۋلەرى ەلباسىنىڭ كيىنەتىن دۇكەننەن كاستۇم ساتىپ الدى. تاعى بىرەۋلەرى تاعى بىردەڭەلەر ىستەپ جاتتى. ايتەۋىر شامالارىنىڭ كەلگەنىنشە دە... بۇل جۇرتقا جاقسى كورىنىپ، اكىمدەردىڭ اراسىندا رەيتينگىن ءوسىرۋ ءۇشىن جاسالاتىن جارناما ارقىلى ەلدى ءبىر، ەلباسىن ەكى الدايتىن اكىمدەر، سوزدەن ىسكە كوشەتىن ۋاقىت جەتپەدى مە؟ جۇرت اكىمدەردەن ءان مەن اۆتوبۋستاعى اڭگىمە ەمەس، ناقتى ناتيجە  كۇتەدى.

ءتۇيىن: سىزدەر، اكىم-قارالاردىڭ جالعان جارنامالارىنان جالىققان جوقسىزدار ما؟

نۇرگەلدى ابدىعانيۇلى

Abai.kz