– مەن ءوز شىعارمالارىمدا، اسىرەسە كوپتەگەن اڭگىمەلەرىم مەن پوۆەستەرىمدە شىمكەنت اتاۋىن «كۇن شۋاق» دەگەن ۇعىممەن بىرگە سينونيم رەتىندە قولدانامىن. شىندىعىندا، شىمكەنت شاھارى شۋاقتى كۇنىمەن جالپاق جۇرتقا ايگىلى بولعان، - دەيدى جازۋشى مارحابات بايعۇتوۆ. –  ەلباسىمىز نۇرسۇلتان نازارباۆ شىمكەنتكە كەلگەن ءبىر ساپارىندا: «بۇل ءوڭىر شۋاقتى كۇنىمەن، حالقىنىڭ جومارتتىعىمەن، مەيماندوستىعىمەن، سالت-داستۇرگە بەرىكتىگىمەن، ەڭ باستىسى – ەڭبەكسۇيگىشتىگىمەن ەرەكشەلەنەدى» دەگەن بولاتىن. مەنىڭشە، قالانىڭ نەگىزگى نىشانىن انىقتاعاندا كۇننىڭ كەسكىنىن ايشىقتاعان وتە دۇرىس.

راسىندا، وڭتۇستىك قازاقستان وبلىسى ەلىمىزدە الار ورنى ەرەكشە ايماقتاردىڭ ءبىرى. ءدىن مەن ءداستۇردىڭ قايماعى ساقتالعان ساڭلاق ايماقتاردىڭ قاتارىندا ەكەندىگىندە داۋ جوق. ورتالىعى بولعان شىمكەنت قالاسىنىڭ بۇكىل قازاقستانعا، ءتىپتى بۇكىل الەمگە اتى ءماشھۇر. شىمكەنت دەسە ەلەڭ ەتە قالمايتىن ەل جوق. شىمكەنتتىكتەر دەسە قورقا قارايتىن دا، قىزىعا قارايتىن دا جۇرتتار بار. ايتارى جوق، راسىندا شىمكەنت جاقتىڭ تۇرعىندارى كەڭ پەيىلدى، اق جارقىن، بارعان جەرىنە تەز ءسىڭىسىپ كەتە الاتىن جاندار. شىققان جەرىنىڭ قاسيەتىنەن بە، ايتەۋىر ءبىر يىعىن ونەرگە بەرگەن ونەرپازداردىڭ كوبىسى سول ايماقتان شىعادى. بۇل جاعىنان قىزىعا دا، قىزعانا قارايتىنىن جاسىرمايتىن اعايىنداردى دا كەزدەستىردىك. وڭتۇستىكتىڭ تۇرعىندارى ەلدىڭ دەموگرافياسىنىڭ وسۋىنە سۇبەلى ۇلەس قوسىپ كەلەدى. بۇل وڭىردە تۋ كورسەتكىشىنىڭ جوعارى بولۋى ءدىنى مەن ءداستۇرىن تياناقتى ۇستاعانىنان بولار.

«تمد جانە ەۋرازەس-ءتىڭ تاڭداۋلى قالاسى» اتتى ءىىى حالىقارالىق قالالار بايقاۋىنىڭ قورىتىندىسى بويىنشا بارلىق تالاپ بيىگىنەن كورىنگەن شىرايلى شىمكەنت وتكەن جىلى «ۇزدىك قالا» اتاعىنا يە بولدى. شارانى حالىقارالىق استانالار جانە ءىرى قالالار قاۋىمداستىعى، تمد-نىڭ اتقارۋ كوميتەتى ەۋرازەس، رەسەيدىڭ ءوڭىردى دامىتۋ مينيسترلىگى مەن بۇكىلرەسەيلىك جەرگىلىكتى ءوزىن-ءوزى باسقارۋ كەڭەسى ۇيىمداستىرعان. ارناۋلى ديپلومدى سول كەزدە وڭتۇستىك قازاقستان وبلىسى اكىمىنىڭ ورىنباسارى بەرىك وسپانوۆ قالا اكىمى ارمان جەتپىسباەۆقا سالتاناتتى تۇردە تابىس ەتتى. بەرىك وسپانوۆ ءوز سوزىندە: «بۇل ناگرادا ءبىزدىڭ قالامىزعا شاھار تۇرعىندارىن اۋلا، كىرەبەرىس تازالىعىن ساقتاۋعا جانە كوپقاباتتى ۇيلەردىڭ ىشكى الاڭدارىن كوركەيتۋگە، قوقىس جيناۋعا جانە جىلۋ بەرۋ ماۋسىمىنا دايىندىق جۇمىستارى جوعارى دارەجەدە ۇيىمداستىرىلعانى ءۇشىن بەرىلىپ وتىر» دەپ اتاپ ءوتتى. شىمكەنتتى الەمگە ايگىلى دەۋىمىزدىڭ دە ءتۇپ توركىنى وسىندا جاتىر. شىمكەنتتى تمد بىلسە، ارى قاراي كۇللى الەم ەستيدى دەگەن ءسوز.

Abai.kz