بۇل اقپاراتتى «الاش جولى» قوزعالىسى جەتەكشىلەرىنىڭ ءبىرى ماقسات ءىلياسۇلى راستادى. ءوزىنىڭ الەۋمەتتىك جەلىدەگى پاراقشاسىندا قوعام بەلسەندىسى بۇل شەشىمدى بىلاي دەپ تۇسىندىرگەن ەكەن.
قادىرلى اعايىن، قۇرمەتتى باۋىرلار، جەرىن قورعاۋشى باتىر ۇل-قىزدارىمىز، اعا-ىنىلەرىمىز، «الاش جولى» قوزعالىسىنىڭ مۇشەلەرى مەن قولداۋشىلارى!
بۇگىنگى ۇكىمەت جانىنان قۇرىلعان جەر رەفورماسى جونىندەگى كوميسسيانىڭ العاشقى جينالىسىنان كەيىن «الاش جولى» قوزعالىسىنىڭ ۇيىمداستىرۋ كوميتەتى شۇعىل جينالىس وتكىزىپ، ناقتى شەشىم قابىلدادى.
ۇكىمەتتىك كوميسسيا جونىندەگى حالىقتىڭ كۇدىگى تولىقتاي راستالدى. قاتىستىق، كوردىك، كوز جەتكىزدىك.
ءبىرىنشى ۆيتسە-پرەمەر باقىتجان ساعىنتاەۆ باستاعان ۇكىمەتتىك كوميسسياعا شاقىرىلعان 75 ادامنىڭ 70-ءى قاتىستى. وكىنىشكە قاراي جەر قازاقستاندىقتارعا دا، شەتەلدىكتەرگە دە ساتىلماسىن، جالعا دا بەرىلمەسىن دەگەن ۇستانىمدى سول 70 ادامنىڭ 11-ءى عانا قولدادى جانە كوميسسيا شەشىمى داۋىس بەرۋ ارقىلى قابىلداناتىن بولدى. بۇل ۇكىمەت ءوز دەگەنىن ىستەيدى دەگەندى بىلدىرەدى. جالپى كوميسسيا جۇمىسىندا كوپتەگەن كەمشىلىكتەر ورىن الدى. اتاپ ايتقاندا:
1. كوميسسيانىڭ رەگلامەنتى قابىلدانعانىمەن، ونىڭ زاڭدىق، قۇقىقتىق مارتەبەسى بەلگىلەنگەن جوق. كوميسسيا شەشىمىنىڭ قۇزىرەتىنىڭ قانداي بولاتىنى دا بەلگىسىز قالپىندا قالدى. بۇل كوميسسيا پرەزيدەنتكە كەڭەس بەرۋشى عانا رول اتقاراتىن سياقتى. كوميسسيا مۇشەلەرى جەر كودەكسىنە وزگەرىستەر مەن تولىقتىرۋلار ەنگىزەتىن كەزدە پارلامەنتتىڭ جۇمىسشى توبىنا قاتىسا ما، جوق پا ول دا تۇسىنىكسىز.
2. «الاش جولى» قوزعالىسىنىڭ 5 ۇسىنىسى نازارعا الىنبادى. اتاپ ايتقاندا:
ا) كوميسسيا پارلامەنتتە قايتا قۇرىلۋ كەرەكتىگى تۋرالى ۇسىنىس قولداۋ تاپپادى.
ءا) كوميسسياعا «الاش جولى» قوزعالىسىنان قوسىمشا 10 ادام كىرگىزۋ تۋرالى ۇسىنىس قابىلدانبادى.
ب) ميتينگىگە قاتىسقان ازاماتتاردى قۋدالاۋدى توقتاتۋ تۋرالى ۇسىنىس ەلەنبەدى. ول از دەسەڭىز ميتينگىگە قاتىسپاعان «الاش جولى» قوزعالىسىنىڭ مۇشەلەرى، بەلسەندىلەرى قۋدالانۋدا.
ۆ) كوميسسيا جۇمىسى تىكەلەي ەفيردەن كورسەتۋ تۋرالى ۇسىنىس ماقۇلدانبادى. ەسەسىنە، كوميسسيا جۇمىسى تۋرالى اقپاراتتار كەيبىر ارنالاردا بىرجاقتى كورسەتىلۋدە، سىن پىكىر ايتقان كوميسسيا جۇمىسىنا قاتىسۋشىلاردىڭ پىكىرى ەفيرگە شىقپادى.
سوندىقتان، «الاش جولى» قوزعالىسى ءبىرىنشى ۆيتسە-پرەمەر باقىتجان ساعىنتاەۆ باسشىلىق ەتەتىن قر ۇكىمەتى جانىنان قۇرىلعان جەر رەفورماسى جونىندەگى كوميسسيا جۇمىسىنا تولىقتاي سەنىمسىزدىك بىلدىرەدى جانە كوميسسيا قۇرامىنا كىرگىزىلگەن «الاش جولى» قوزعالىسىنىڭ جالعىز بەلسەندىسى ماقسات نۇرىپباي كوميسسيا قۇرامىنان شىقتى.
«الاش جولى» قوعامدىق قوزعالىسىنىڭ ۇيىمداستىرۋ كوميتەتى
Abai.kz
