بۇۇ-نىڭ ادام قۇقىعى جونىندەگى ساراپشىلارى قازاقستان بيلىگىن ۇكىمەتتىڭ اۋىلشارۋاشىلىعى جەرلەرىن ساتۋ جانە جالعا بەرۋ جوسپارىنا اشىق قارسى شىققان بەلسەندىلەردى قاماپ، قىلمىستىق قۋدالاۋدى توقتاتۋعا شاقىردى، - دەپ جازادى ازاتتىق راديوسىنىڭ سايتى.

ءساۋىردىڭ سوڭى مەن مامىردىڭ باسىندا قازاقستاننىڭ بىرنەشە قالاسى - اتىراۋ، اقتوبە، سەمەي, اقتاۋ، قىزىلوردا، الماتىدا جۇزدەگەن ادام ۇكىمەتتىڭ اۋىلشارۋاشىلىعى ماقساتىنداعى جەرلەرىن ساتۋ جانە شەتەلدىكتەرگە جالعا بەرۋ جوسپارىنا قارسىلىق ءبىلدىرىپ ميتينگىلەر وتكىزگەن. ميتينگكە قاتىسقان كەيبىر بەلسەندىلەرگە قوعامدىق الاۋىزدىق تۋدىرماق بولدى" دەگەن ايىپ تاعىلعانى حابارلانعان.

بۇۇ ادام قۇقىعى جونىندەگى جوعارعى كوميسسارى كەڭسەسى 12 مامىردا تاراتقان مالىمدەمەسىندە قازاقستان ۇكىمەتىن "قۋعىنداۋدىڭ بارلىق ءتۇرىن دەرەۋ توقتاتىپ، ازاماتتىق قوعامدى قورعاۋدىڭ ءتيىمدى شارالارىن جاساۋعا" شاقىردى.

"جەر كودەكسىنە قارسى پىكىرلەرىن ايتقاندار قازىر تۇتقىندالىپ, كامالىپ، قىلمىستىق قۋدالانىپ جاتىر" دەلىنگەن بۇۇ كەڭسەسى تاراتقان مالىمدەمەدە.

بۇۇ كەڭسەسى قارسىلىق تانىتقاندار مەن ادام قۇقىعىن قورعاۋشىلاردىڭ وزدەرىنىڭ ەرىكتى تۇردە جينالىپ، پىكىرىن ەركىن ءبىلدىرۋ قۇقىعىن پايدالانعانى ءۇشىن قىلمىستىق قۋدالاۋ كورىپ وتىرعانىنا الاڭداۋشىلىق بىلدىرەدى. كەيبىر ميتينگىگە قاتىسقاندار مەن قۇقىق قورعاۋشىلارعا قىلمىستىق كودەكستىڭ 174 بابى بويىنشا ("الەۋمەتتىك ارازدىق تۋدىر") ءىس قوزعالا باستاعان.

ء"باسپاسوز ەركىندىگى مەن ازاماتتاردىڭ جينالا الۋ ەركىندىگى - دەموكراتيالىق قوعام بولىپ ءومىر ءسۇرۋدىڭ تىرەگى سانالادى. جۋرناليستەر مەن ازاماتتىق قوعام وكىلدەرىن ءوز بەتىمەن تۇتقىنداپ, قىلمىستىق قۋدالاۋعا جول بەرىلمەۋى ءتيىس" دەلىنگەن بۇۇ مالىمدەمەسىندە.

بۇۇ كەڭسەسىنىڭ مالىمەتىنشە، قازاقستان بەيبىت جيىن وتكىزۋ ەركىندىگى، وي-پىكىرىن ەركىن تۇردە ءبىلدىرۋ قۇقىعى مەن ءسوز بوستاندىعىن ازاماتتىق قوعامعا قاۋىپسىز جانە ىڭعايلى جاعداي جاساۋ ارقىلى جانە ونىڭ ءوز قىزمەتىن قۋدالانۋدان قاۋىپتەنبەي ىسكە اسىرۋى ارقىلى نىعايتۋعا مىندەتتەمە العان.

ناۋرىزدىڭ سوڭىندا سول كەزدەگى ۇلتتىق ەكونوميكا ءمينيسترى ەربولات دوساەۆ ۇكىمەت بيىل 1 شىلدەدەن باستاپ ەلدە اۋىل شارۋاشىلىعى جەرلەرىن ازاماتتارعا جەكە مەنشىككە اۋكتسيون ارقىلى ساتۋ جانە شەتەلدىكتەرگە جالعا بەرۋ مەرزىمىن 10 جىلدان 25 جىلعا دەيىن ۇزارتۋدى جوسپارلاپ وتىرعانىن جاريالاعان ەدى. ءساۋىردىڭ 24-ىنەن بەرى قازاقستاننىڭ بىرنەشە ايماعىندا ۇكىمەتتىڭ «جەر ساتۋ» جوسپارىنا قارسىلىق اكتسيالارى ءوتتى. بەلسەندىلەر 21 مامىردا بۇكىل ەل كولەمىندە «جەر ساتۋعا» نارازىلىق شەرۋلەرىن وتكىزەتىنى تۋرالى مالىمدەگەن ەدى. ال 6 مامىردا ۇكىمەتتىڭ كەڭەيتىلگەن جيىنىندا پرەزيدەنت نۇرسۇلتان نازارباەۆ جەر كودەكسىنىڭ داۋ تۋدىرعان باپتارىنىڭ كۇشىنە ەنۋىنە 2016 جىلدىڭ 31 جەلتوقسانىنا دەيىن موراتوري ەنگىزگەن.

اباي-اقپارات