«جەر كودەكسى» تۋرالى مالىمدەمە
«ازات» قوزعالىسى ماقسات ەتكەن ەلدەگى ورتا تاپتىڭ دامۋى، ۇلتتىق رەسۋرستىڭ ءادىل بولىنۋىنە نەگىزدەلگەن نارىقتىق ەكونوميكا مەن ۇلتتىق قۇندىلىقتارعا نەگىزدەلگەن دەموكراتيانىڭ قالىپتاسۋى قولعا الىنباي كەلەدى. ءبىز، بۇلاردىڭ ورنىن ەلدى اپاتتىق جاعدايعا دۋشار ەتەر سىبايلاس جەمقورلىق جۇيەنىڭ، پاراقورلىق پەن ماسىلدىق سانانىڭ باسقانىن نارازىلىقپەن مالىمدەيمىز.
بۇگىنگى قازاقستان بيلىگىن ەلدەگى قالىپتاسقان قۇقىقتىق ادىلەتسىزدىكتى، اسىرە تەڭسىزدىكتى، قيسىنسىز سيپاتتاعى بەيۇلتتىق جانە سولقىلداق الەۋمەتتىك ساياساتتى تەز ارادا جويىپ، مەملەكەتتىك ۇلى مۇراتتار مەن ۇلتتىق قۇندىلىقتارعا باسىمدىق بەرۋگە شاقىرامىز. قاجەت بولسا، وزەكتى ماسەلەگە تىكەلەي ارالاسۋدى ازاماتتىق پارىزىمىز سانايمىز.
«ازات» قوزعالىسىنىڭ ارداگەرلەرىنىڭ مالىمدەمەسىنەن ءۇزىندى.
استانا.
12.06.2015.
«ازات» قوزعالىسىنىڭ ارداگەرلەر كلۋبىنىڭ
2016 جىلعى ساۋىردەگى قر جەر كودەكسى تۋىنداتقان
جالپىحالىقتىق نارازىلىققا قاتىستى
مالىمدەمەسى
«ازات» قوزعالىسىنىڭ ارداگەرلەر كلۋبى (قىسقاشا – «ازات-اردا» كلۋبى) ەلدە قالىپتاسقان جەرگە قاتىستى داۋعا بەيجاي قاراۋ مۇمكىن ەمەستىگىن، مۇنداي قوعامدىق قايشىلىقتىڭ نەگىزى مەملەكەتتىڭ ۋاقىت تالابىنا ساي دامۋىن كەرەكسىنگەن حالىق تالابىنان تۋىنداعانىن ەسكەرە وتىرىپ، مىنانى اتاپ وتەدى:
- مەملەكەتتەگى مول رەسۋرستىڭ ەل دامۋىنا لايىقتى تۇردە جۇزەگە اسىرىلماۋىنان، دەموكراتيالىق پرينتسيپتەردىڭ بارىنشا تاپتالۋىنان، سودان تۋىنداعان جەمقورلىق پەن پاراقورلىق جايلاپ، ۇلتتىق قور مولشەرىنەن 2 ەسە دەرلىك قاراجاتتىڭ مەملەكەتتەن تىسقارى جىلىستاپ، ەكونوميكانىڭ ينۆەستيتسيالىق تاپشىلىققا ۇشىراپ، قازاقستان قوعامى ەكونوميكالىق-الەۋمەتتىك الەۋەت پەن قۇقىقتىق ادىلەتتىڭ وسالدانعان جاعدايىنا تاپ كەلدى;
- بۇگىنگى قالىپتاسقان «بيلىك بۇرىنعىشا بيلەي المايتىن، حالىق بۇرىنعىشا كونە المايتىن» جاعدايدى قىمتاۋ مۇمكىن ەمەس جانە ەل دامۋىن تۇيىقتان شىعاراتىن، ۇشقارى قوعامدىق جارىلىسقا جەتكىزبەيتىندەي، قاي تاراپتان دا باتىل دا ادىلەتتى شەشىممەن ارەكەت ەتۋگە ەلدىڭ ساياسي-ەكونوميكالىق-الەۋمەتتىك ومىرىنە بىردەن ءبىر لايىق دەموكراتيالىق باعىتتىڭ قاجەتتىگى بارىنشا ايقىندالدى.
وكىنىشى سول، قر كونستيتۋتسياسىندا بەلگىلەنگەن الەۋمەتتىك، قۇقىقتىق، دەموكراتيالىق ەل قۇرۋ يدەياسىنىڭ ومىردەن اۋىتقۋىنان بيلىك پەن حالىق اراسىندا ءوزارا سەنىمسىزدىك قامالى ورنادى. سول سەبەپتى دە تۋىنداعان نارازىلىق جەر داۋىمەن شەكتەلمەيدى. بيلىك ەلدىڭ ەكونوميكالىق رەسۋرسىن حالىقپەن ساناسىپ ارەكەت ەتكەندە مۇنشالىقتى الشاقتىق ورناماسىن سەزىنۋى ءتيىس.
بيىلعى ءساۋىر ايىندا ورىن العان جالپىحالىقتىق نارازىلىق ەلدىڭ جاڭاشا دامۋ ءداۋىرىنىڭ قاجەتتىگىن كورسەتتى. بۇنداي جاعدايدا قانداي دا ءبىر تەكەتىرەس ساياسي جارىلىس پەن قوعامدىق اپاتقا سوقتىرۋى ابدەن مۇمكىن. تاراپتاردىڭ اڭدىسۋى ولاردىڭ ءبىر بىرىنە اقپاراتتىق جاۋىعۋ مەن ەلدى بولجاۋعا بولمايتىن كەرى كەتۋگە يتەرمەلەيدى.
قازاقستاننىڭ جاڭاشا دامۋ كەزەڭىنە اياق باسۋىندا وزىنە عانا ءتان جولى بار ەكەنىن بارلىق مۇددەلى تاراپتاردىڭ ەسكەرۋى ماڭىزدى.
«ازات-اردا» كلۋبى جوعارىدا ايتىلعانداردى اتاي وتىرىپ، ەلدى تۇپكىلىكتى ساياسي-ەكونوميكالىق-الەۋمەتتىك تىعىرىقتان شىعۋدىڭ جولىن قاراستىرۋعا مۇددەلى جاقتاردىڭ بارلىعىن تاريحي جاۋاپتى تاراپتار رەتىندە سەرىكتەسە قيمىلداۋعا شاقىرادى. قانداي دا ءبىر راديكالدىق سىڭارجاق شەشىمدەر مەن ەكىنشى تاراپتى تىقسىرۋعا بولماسا الداۋسىراتۋعا باعىتتالعان شارالار ەشكىمگە وپا بەرمەيدى، ەشبىر تاراپ ۇتپايدى. وتكەن جىلدارى جىبەرىلگەن ولقىلىقتى ەندى تەك قانا كەلىسۋ مەن شىنايى دا ءادىل شەشىمدەر قوس تاراپتىڭ ءبىر بىرىنە سەنىمىن كىرىكتىرەدى.
«ازات-اردا» كلۋبى قالىپتاسقان جاعدايدى رەتتەۋ جولىندا تاراپتاردى مىناداي ۇسىنىمداردى جۇزەگە اسىرۋعا ۇندەيدى.
بيلىك تارابىنا:
- جەر داۋىنىڭ ۋشىعۋى ەلدەگى دەموكراتيالىق-قۇقىقتىق پرينتسيپتەردىڭ اياقاستى بولعاندىعىنان ەكەندىگىن مويىنداي وتىرىپ، ساياسي رەفورمانى قولعا الىپ، مەملەكەتتى بيلەۋ ورگاندارىن ەلدى جاڭا جاعدايدا بيلەۋ رەجيمىنە لايىقتاۋدى قولعا الۋ;
- جەر داۋىنا تىكەلەي قاتىسى بار جانە سول دەڭگەيدەگى باسقا دا ماسەلەلەردى شەشۋدە ماڭىزدى قوعامدىق ورگان رەتىندە پارلامەنت جانىنداعى قوعامدىق پالاتانى قالپىنا كەلتىرىپ، قايتا جاساقتاۋ;
- قازاقستاننىڭ دەموكراتيالىق ءادىل قوعام ورناتۋىنىڭ باستى كەپىلى رەتىندە ازاماتتاردىڭ كونستيتۋتسيالىق ەركى مەن قۇقىعىن شەكتەيتىن زاڭنامانى قايتا قاراۋ;
- جەر كودەكسىن تۇپكىلىكتى جاڭارتۋ تۇجىرىمداماسىن جاساۋ.
قوعامدىق تاراپقا:
- تاۋەلسىز ساراپشىلار القاسىن قۇرىپ، جەر كودەكسىنە ساياسي-ەكونوميكالىق-الەۋمەتتىك ساراپتاما جاساۋ;
- جەر كودەكسىن ساياسي-ەكونوميكالىق-الەۋمەتتىك تۇرعىدان رەۆيزيالاۋ مەن ونى تۇپكىلىكتى جاڭارتۋ تۇجىرىمداماسىن جاساۋعا اتسالىسۋ.
- جەر داۋىنىڭ شەشىمىن ەلدى دەموكراتيالاندىرۋ ىستەرىنىڭ اياسىندا قاراستىرۋ;
- ەلدى دەموكراتيالاندىرۋدىڭ ءتۇرلى قۇرىلىمدارىن جاساقتاۋعا، دامىتۋعا بەلسەندىلىك تانىتۋ، ازاماتتىق قوعام ورناتۋعا كىرىسۋ، سونىڭ ىشىندە ەلدىڭ دەموكراتيالىق كۇشتەرىنىڭ قاۋىمداستىعىن قۇرۋعا اتسالىسۋ.
«ازات-اردا» كلۋبى تاراپتاردىڭ قازىرگى ورىن الىپ وتىرعان داۋى مەن اڭدىسۋىن تىيىپ، نارازىلىقتى كوشەدەن دەموكراتيالىق ۇدەرىسكە ۇلاستىرۋ ءۇشىن قوعامدىق-ساياسي الاڭعا كوشىرۋ ارقىلى قازاقستاننىڭ دامۋىنا جاڭا بەتبۇرىس جاساۋدى جاقتايدى جانە بيلىك پەن قوعامدىق تاراپتى سوعان ۇندەيدى.
10 مامىر 2016 جىل
«ازات-اردا» كلۋبى 2015 جىلى 12 ماۋسىمدا بولعان قازاق حاندىعىنىڭ 550 جىلدىعى اياسىندا بولعان قازاقستاننىڭ ازاماتتىق «ازات» قوزعالىسىنىڭ 25 جىلدىعىنا ارنالعان جيىندا نەگىزى قالاندى. كلۋبقا 18-گە تولعان قازاقستاننىڭ كەز كەلگەن ازاماتى مۇشە بولا الادى. كلۋب ەلدەگى سەرپىلىس تۋدىراتىن جايتتارعا باعا بەرىپ، ءوز كوزقاراسىن بىلدىرۋگە جانە قازاقستان تاۋەلسىزدىگىن ساياسي-تاريحي قۇندىلىق رەتىندە ساقتاۋعا بار ۇلەسىن قوسۋعا باعىتتالعان.
«ازات» قوزعالىسىنىڭ ارداگەرلەرىنىڭ مالىمدەمەسى
Abai.kz
