"الەم بويىنشا ونداعان ساياساتكەر، شەنەۋنىكتەر، ونەر جۇلدىزدارى مەن سپورتشىلاردىڭ قۇپيا بولىپ كەلگەن وفشورداعى اكتيۆتەرى تۋرالى پانامالىق Mossack Fonseca زاڭ فيرماسىنىڭ اشكەرەلەنىپ كەتكەن ميلليونداعان قۇجاتتارىندا «Dariga N. Nazarbayeva» دەگەن ادامنىڭ اتى-ءجونى بار. 9 مامىردا «پاناما قۇجاتتارىنا» قاتىستى ينتەرنەتتە جاريالانعان جاڭا دەرەكتە كەزدەسكەن بۇل ادامنىڭ اتى-ءجونى قازاقستان پرەزيدەنتى نۇرسۇلتان نازارباەۆتىڭ ۇلكەن قىزى، قازاقستان پرەمەر-ءمينيسترىنىڭ ورىنباسارى داريعا نازارباەۆانىكىنە ۇقساس", - دەپ جازادى ازاتتىق راديوسىنىڭ سايتى.

بۇل مالىمەتتى جاريالاعان حالىقارالىق زەرتتەۋشى جۋرناليستەر كونسورتسيۋمى (ICIJ) دەرەگى بويىنشا، Dariga N. Nazarbayeva 2007 – 2012 جىلدار ارالىعىندا بريتاندىق ۆيرگين ارالدارىندا تىركەلگەن Asterry Holdings LTD وفشورلىق كومپانيا يەلەرىنىڭ ءبىرى بولعان.

جۋرناليستىك زەرتتەۋدە قازاقستانعا قاتىستى جاريالانعان ونداعان ادامنىڭ اراسىندا ميلليونەر بيزنەسمەن سەرجان جۇماشەۆ، ENRC مەتاللۋرگيالىق كاسىپورنى يەلەرىنىڭ ءبىرى پاتوح شوديەۆ، بيزنەسمەن مارعۇلان سەيسەمباەۆتاردىڭ ەسىمدەرى اتالعان. سونىمەن بىرگە قۇجاتتا Erlan Sagadiev ەسىمدى ادامنىڭ ۋرۋگۆايدا تىركەلگەن Masterton Management LTD كومپانياسىنا يەلىك ەتەتىنى ايتىلعان.

«پاناماگەيت» اياسىندا كوپشىلىككە تانىمال تۇلعالاردىڭ وفشورلىق ءىس-ارەكەتتەرى جايلى العاشقى دەرەكتەر ءساۋىر ايىنىڭ باسىندا جاريالانعان. وندا داريعا نازارباەۆانىڭ ۇلكەن ۇلى جانە قازاقستان پرەزيدەنتىنىڭ جيەنى ءنۇرالى اليەۆتىڭ اتى-ءجونى اتالعان ەدى. ول بيىل كوكتەمگە دەيىن استانا قالاسى اكىمىنىڭ ورىنباسارى بولىپ ىستەگەن.

9 مامىردا ينتەرنەتتە جاريالانعان قوسىمشا دەرەكتەردە ءنۇرالى اليەۆتىڭ ەسىمى تاعى اتالعان. زەرتتەۋ اۆتورلارىنىڭ جازۋىنشا، Nurali Aliyev Alba International Holdings LTD وفشورلىق كومپانياسىنىڭ مەنشىك يەسى جانە Baltimore Alliance Inc كومپانياسى اكتسيالارىنىڭ يەلەنۋشىسى بولعان. بۇل ەكى كومپانيا دا بريتاندىق ۆيرگين ارالدارىندا تىركەلگەن.

كەيبىر ەلدەردە «پاناماگەيت» قۇجاتتارى وفشورلىق ءىس-ارەكەتتەرىن اشكەرەلەگەن ساياساتكەرلەر قىزمەتتەن كەتۋگە نەمەسە جۇرتشىلىققا قۇپيا بولىپ كەلگەن مالىمەتتەرگە قاتىستى تۇسىنىكتەمە بەرۋگە ءماجبۇر بولعان. قازاقستاندا جۋرناليستەر كونسورتسيۋمى جۇرگىزگەن زەرتتەۋ ەشقانداي رەاكتسيا تۋدىرعان جوق. باس پروكۋراتۋرا ICIJ ماتەريالدارىنداعى مالىمەتتەرگە قاتىستى ازاتتىقتىڭ جازباشا ساۋالىنا بەرگەن جاۋابىندا اشكەرە بولعان دەرەكتەرگە قاتىستى تەكسەرۋ جۇرگىزبەيتىنىن حابارلاپ، ونى «بۇل ماتەريالداردىڭ شىعۋ كوزدەرى تۋرالى قانداي دا ءبىر شىنايى مالىمەت جوقتىعىمەن» تۇسىندىرگەن.

اباي-اقپارات