تاپ قازىرگى ساتتە الەۋمەتتىك جەلىلەردە «ۇلتتىق ەكونوميكا ءمينيسترى ەربولات دوساەۆ قىزمەتىنەن كەتتى» دەگەن اقپارات تاراپ جاتىر. بۇل ءسوزدى باسقا-باسقا، جۋرناليستيكادا وزىندىك قولتاڭباسى بار، سالماقتى ءباسپاسوز وكىلدەرى جازىپ وتىر. ءبىز ماسەلەنىڭ ءمان-جايىن بىلمەك بولىپ اتالعان مينيسترلىكتىڭ قوعاممەن بايلانىس دەپارتامەنتىنىڭ مىندەتىن اتقارۋشى قالامقاس قاسەنەەۆاعا قوڭىراۋ شالدىق.

-          ساۋ-سالاماتتا بولارسىز! ءسىزدى اباي.كز اقپاراتتىق پورتالىنان مازالاپ تۇرمىز.

-          ءيا، قانداي سۇراقپەن؟

-          وسى قازىر عانا ۇلتتىق ەكونوميكا ءمينيسترى ەربولات دوساەۆ مىرزا قىزمەتىنەن كەتتى دەپ ەستىدىك. ول كىسى لاۋازىمدى ورنىنان ءوز بەتىمەن كەتتى مە، الدە؟..

-          نە دەيسىز؟.. مەن بۇنداي ءسوزدى سىزدەن ەستىپ تۇرمىن. مينيستر - ورنىندا.

-          راس پا؟

-          ارينە، راس.

-          راحمەت.

بايلانىس دەپارتامەنتىنىڭ وكىلى وسىلاي دەدى. دەمەك، دوساەۆقا قاتىستى شەتى قىلتيعان اڭگىمە ازىرگە جالعان سياقتى. بىراق، ەل ءىشى ۇلتتىق ەكونوميكا ءمينيسترى دوساەۆ پەن ورىنباسارى وسكەنباەۆتىڭ عانا ەمەس، پرەمەر-مينيستردەن باستاپ قازىرگى ۇكىمەت مۇشەلەرى الداعى كۇندەرى قانداي شەشىم قابىلدايتىنىنا ەلەڭدەپ، قۇلاق ءتۇرىپ وتىر. ويتكەنى، قاندايدا ءبىر شەتىن جايتتى قوزعاپ الىپ، ونىڭ شەشىمىن تابا المايتىن ۇكىمەت كەز-كەلگەن ەلدە ءوزىن جارامسىز تانىپ، پرەزيدەنتتەن وتستاۆكا سۇرايدى.

Abai.kz