وتكەندە ءبىر توپ ونەر ادامدارى جينالىپ، «31 ارنا» جاڭالىقتارىنان جەر ماسەلەسىنە قاتىستى ءوز پىكىرلەرىن، كوزقاراس، ۇستانىمدارىن ايتقان ەدى. سول ۆيدەونى الدەبىرەۋلەر باسقا ماقساتتا پايدالانىپ، اكتەرلار مەن انشىلەردىڭ سوزدەرىن كەسىپ، ءوز ىڭعايلارىنا كەلتىرىپ ينتەرنەت ارقىلى تاراتقان. وسى جاعدايعا بايلانىستى ءۇن قاتقان اكتەر بەكجان تۇرىستىڭ ايتقانىن سوزبە-ءسوز جاريا ەتىپ وتىرمىز.

Abai.kz

بەكجان تۇرىس، اكتەر:

- 26 ءساۋىر كۇنى «31-ارنا» جاڭالىقتارىنان ءبىر توپ ونەر ادامدارىنىڭ (ساكەن مايعازيەۆ، باقىت تۋشاەۆ، رينات زايىتوۆ جانە مەن) جينالىپ، قازاقستاننىڭ ازاماتى رەتىندە بۇگىنگى كۇنى ۋشىعىپ تۇرعان جەر تاقىرىبىنا قاتىستى ءوزىمىزدىڭ ازاماتتىق ويىمىزدى، ءوز كوزقاراسىمىزدى بىلدىرگەن 2 مينۋت 51 سەكۋندتىق (https://www.youtube.com/watch?v=1BpwxiUYOlQ) كورسەتىلدى. ال يۋتۋب ارقىلى تارالعان بەينەجازبانىڭ تولىعىراق نۇسقاسىنىڭ ۇزاقتىعى – 6 مينۋت 52 سەكۋند. تاقىرىبى: «جەردى جالعا بەرۋ – قازاقستاننىڭ ونەر ادامدارىنىڭ پىكىرى» / «منەنيە كازاحستانسكيح ارتيستوۆ» (https://www.youtube.com/watch?v=P93_JUEcAyE). 
مۇندا جينالعانداردىڭ ءبىر عانا: «جەر ساتىلماسىن، جالعا دا بەرىلمەسىن!» دەگەن ۇسىنىس-تىلەگى بولدى. بيلىك تاراپىنان وسى ماسەلە قايتادان قارالسا، باسقا شەشىم قابىلدانسا دەگەن تىلەگىمىزدى «31-ارنا» ارقىلى بىلدىردىك. ەشقانداي قول جيناماعانىمىزدى، ارانداتۋعا جول بەرگىمىز كەلمەيتىنىن ايتتىق... بيلىككە سەنىم ارتىپ ۇمىتتەنىپ وتىرعانىمىز دا شەت قالمادى. 
ونەر ادامدارىنىڭ بۇل ۇسىنىس-تىلەگى قازاقستان حالقى اسسامبلەياسىنىڭ كەزەكتى ححIV سەسسياسىندا ءسوز سويلەگەن ەلباسىمىزدىڭ سوزىمەن ۇندەس بولاتىن. سەسسيادا جەر – اتا-بابامىزدان بىزگە ميراس بولىپ قالعان ەڭ باستى قازىنامىز، ۇلتىمىزدىڭ ۇلى بايلىعى، قازاقتىڭ دالاسى حالىقتىڭ مەنشىگى ەكەنىن پرەزيدەنتىمىز قاداپ ايتتى. «دەگەنمەنەن وسى ماسەلەگە كوڭىل بولگەنى ءۇشىن مەن اعايىنعا، ءبىر جاعىنان، قۋانامىن. لايىم ارقاشان جەرگە دەگەن قاسيەتتى كوڭىل وسىنداي بولاتىن بولسا، ءبىزدىڭ حالىق قاسىق قانى قالعانشا وسى جەردى قورعايدى دەپ بىلەمىن»، – دەدى ەلباسىمىزدىڭ ءوزى دە (26.04.16).
...قازىر كەز كەلگەن ادامنىڭ ينتەرنەتتى پايدالانۋعا مۇمكىندىگى بار. الەۋمەتتىك جەلىلەر ارقىلى كەز كەلگەن قازاقستان ازاماتى كەز كەلگەن ماسەلەدە وزدەرىنىڭ ويلارىن، كوزقاراستارىن ءبىلدىرىپ تە جاتىر. ءدۇيىم جۇرتتى دۇرلىكتىرگەن جەر ماسەلەسىنە بايلانىستى الەۋمەتتىك جەلىلەر ارقىلى «الاش جولى» قوزعالىسىنىڭ قۇرىلعانىنان دا عالامتور پايدالانۋشىلارى حاباردار. وسى قوزعالىس ارقىلى مامىر ايىنىڭ 21-ءى كۇنى بەيبىت شەرۋ ۇيىمداستىرىلعالى جاتقانىن دا كوزى اشىق وقىرمان ءبىلىپ وتىر.
ال بۇگىن... ءبىزدىڭ سول سوزدەرىمىزدىڭ وزدەرىنە ء«تيىمدى» تۇستارىن عانا كەسىپ الىپ، وي-پىكىرىمىزدى مۇلدە باسقا باعىتقا، ياعني ءبىزدى قاراپايىم حالىققا قارسى، بيلىككە جەكسۇرىن ەتىپ كورسەتكەن الدەبىر توپتىڭ ارنايى دايارلاعان بەينەجازباسى (سيۋجەت) الەۋمەتتىك جەلىلەرگە تارالعانىن بىلدىك. مۇنداعى ماقسات نە؟ حالىق پەن بيلىكتىڭ اراسىندا التىن كوپىر بولىپ، ەلدىڭ مۇڭىن ۇكىمەت باسىندا وتىرعان ەل اعالارىنا جەتكىزگىمىز كەلگەن نيەتىمىزدى تەرىس باعىتقا بۇرىپ، ونەر ادامدارىن ارانداتۋشى توپ رەتىندە تانىتپاق بولعان بۇلاردىڭ پيعىلدارىن قالاي تۇسىنەمىز؟ مۇنى كورگەندە قاراپايىم حالىق، ءبىزدىڭ سۇيىكتى كورەرمەندەرىمىز كىمگە سەنەدى؟ ءبىزدىڭ – سەرىكزات دۇيسەنعازى، قالقامان سارين جانە مەنىڭ ۆاتساپ ارقىلى ايتقان سوزدەرىمىز (ونى دا وزدەرىنە ءتيىمدى ەتىپ كەسىپ پايدالانعان، تولىق ەمەس) بۇلاردىڭ قولىنا قالاي ءتۇستى؟ بارىنەن بۇرىن الگى بەينەجازباداعى جانىمىزعا باتقانى – 21-ءى كۇنى بەيبىت شەرۋدەن تىس قالمايتىنىمىزدى مەڭزەپ، سوعان ەلدىڭ نازارىن اۋدارتىپ، سول كۇنى الدەبىر كەلەڭسىزدىك ورىن السا تىكەلەي ءبىزدىڭ كىنالى بولىپ تابىلاتىنىمىزدى، بۇقارانىڭ ءبىزدى ايىپتايتىنىن جەتكىزگەندەرى. قالاي بولعاندا دا، تەرىس پيعىلدى بىرەۋلەردىڭ كەسىرىنەن جامانشىلىق ورىن السا، وعان تىكەلەي ءبىزدى جازعىراتىنىن اشىق ايتقاندارى... بۇل بەينەجازبا ارقىلى ونەر ادامدارىن ارانداتۋشى رەتىندە كورسەتىپ وتىرعانداردىڭ وزدەرى – ناعىز ارانداتۋشىلار! ونەر ادامدارىن ءوز كورەرمەنىنە، ءوز حالقىنا جەكسۇرىن ەتىپ كورسەتىپ وتىرعاندار دا، حالىقتىڭ بىرلىگىنىڭ، ەلدىڭ ىنتىماعىنىڭ اراسىنا ىرىتكى سالۋشىلار دا – وسىلاردىڭ وزدەرى!
«جانى اياۋلى جاقسىعا قوسامىن دەپ، اركىم ءبىر يت ۇستاپ ءجۇر ىرىلداتىپ» دەپ اباي اتام ايتپاقشى، بۇل قوعام الدىندا يىلگىسى كەلمەيتىن مىنەزى بار شىن تالانتتارعا جاسالعان ءالدبىر اعىمداردىڭ ارانداتۋشىلىعى دەپ بىلەمىن. بىزگە تاۋەلسىزدىگىمىزدىڭ تۇعىرىنان قۇلاماعانى، حالقىمىزدىڭ امان بولعانى، قالامىزدىڭ قيراماعانى كەرەك. ءبىز بەيبىت ەلدىڭ، قاراپايىم حالىقتىڭ، جىگەرلى جاستارىمىزدىڭ، باقىتتى بالالارىمىزدىڭ ارانداتۋشىلاردىڭ ارباۋىنا قالىپ، ناقاقتان زارداپ شەگۋىنە جول بەرگىمىز كەلمەيدى. 
سوندىقتان جۇرتشىلىققا جەتپەي، سيۋجەتتەن كەسىلىپ قالعان ءسوزىمدى قايتالاپ ايتامىن، بۇگىنگى ەلدىك – تىنىشتىق، بۇگىنگى ەرلىك – سابىر، بۇگىنگى وتانشىلدىق – ءتوزىم! ەل ءبىزدى – ونەر ادامدارىن بۇلىككە شاقىرۋشى ەمەس، بىرلىكتى ساقتاۋشى رەتىندە تانيدى، ەندەشە، تىنىشتىعىمىزدى ويلاپ، ارانداتۋشىلاردان ساق بولايىق، اعايىن!