استانادا بريفينگ وتكىزگەن ءبىلىم جانە عىلىم ءمينيسترى ەرلان ساعاديەۆ جۋرناليستەردىڭ ساۋالدارىنا جاۋاپ بەرىپ، قولعا الىنىپ جاتقان رەفورمالاردىڭ جاي-جاپسارىن ءتۇسىندىردى، - دەپ حابارلايدى Qamshy.kz.

مينيستر سونداي-اق، ء«ۇش ءتىلدى وقىتۋ» جۇيەسىنە نارازىلىق تانىتىپ، اشىق حات جولداعانداردى  سوزبەن تۇيرەپ ءوتتى.

«مەن ول پەتيتسيانى وقىدىم. قول قويعانداردىڭ ىشىندە جاسى ۇلكەن، قۇرمەتتى ازاماتتاردىڭ بارىن تۇسىنەمىن. مەنىڭ ويىمشا، ولار ءبىزدىڭ جوبانى تۇسىنبەگەن سياقتى. ولاردىڭ باسىن قوسىپ، بارلىعىن ءتۇسىندىرىپ بەرمەكپىن. بۇل – ءبىر. ەكىنشىدەن، ولاردىڭ ىشىندە ءوز بالالارىن مەملەكەت قاراجاتىنا ورىسشا دا، اعىلشىنشا دا شەت ەلدەردە وقىتقاندار بار. ولار بىرەۋ دە ەمەس، ەكەۋ دە ەمەس. ولارعا نە كەرەك؟ ولار وزدەرىن ەليتا سانايدى، ال، قاراپايىم قازاقتارعا ءبىلىم كەرەك جوق دەپ ەسەپتەيدى»، - دەيدى مينيستر.

پەتيتسيادان ءۇزىندى كەلتىرگەن مينيستر قازاقتار جاقسى ءبىلىم الۋعا نە ءۇشىن تالپىنۋى كەرەكتىگىن تۇسىندىرۋگە تىرىسقان.

«ولار «مالشىلار، قۇرىلىسشىلار مەن كۇزەتشىلەرگە، بازاردا تۇرعان حالىققا اعىلشىن ءتىلى كەرەك ەمەس» دەپ سانايدى. مەنىڭ اكەمنىڭ اكەسى مالشى بولعان. ال، ول ءوز ۇلىن الماتىعا اكەلىپ، كەيىن ماسكەۋگە جىبەرىپ وقىتتى. ۇلى اكادەميك بولدى. سىزدەر بارلىقتارىڭىز ونى بىلەسىزدەر. قازىرگى ينتەلليگەنتسيا وكىلدەرىنىڭ بارلىعى – مالشىلاردىڭ بالالارى. سولاي ەمەس پە؟ سوندىقتان، ءاربىر اتا-انا ءوز بالاسىنىڭ جاقسى ءبىلىم الىپ، لايىقتى ازامات بولعانىن قالايدى»، - دەيدى ە. ساعاديەۆ اشىق حات جولداعاندارعا قاراتا.

ەستەرىڭىزگە سالساق، ەلىمىزدىڭ بىرقاتار ينتەلليگەنتسيا وكىلدەرى، قوعام جانە مەملەكەت قايراتكەرلەرى ءمينيستردىڭ باستاماسىنا نارازىلىق ءبىلدىرىپ، اشىق حات جولداعان بولاتىن.

اباي-اقپارات