ماسكەۋ ەندى قازاقستاننان قارۋلى كۇشتەردىڭ اكتيۆىنە قارۋ-جاراق جەتكىزۋ ءۇشىن كەبىر شەكتەۋلەردى الىپ تاستاۋدى تالاپ ەتتى، - دەپ جازادى "كوممەرسانت" باسىلىمى.

جاقىندا رەسەي فەدەراتسياسىنىڭ ەكونوميكا مينيسترلىگى قازاقستان ۇكىمەتى مەن ەۋرازيالىق ەكونوميكالىق كوميسسياعا (ەەك) جوعارىداعى تالاپتار بويىنشا شاعىم ءتۇسىرىپ، قارسىلىق نوتاسىن جولداپتى.

رف ەكونوميكا مينيسترلىگى كەلتىرگەن دەرەكتەرگە سۇيەنسەك، قازاقستان ۇكىمەتى قويىپ وتىرعان شەكتەۋلەردەن رەسەي تارابى ميلليارد دوللارعا جۋىق شىعىنعا باتۋى مۇمكىن ەكەن. ەاەو كەلىسىمدەرى بويىنشا مەملەكەتتىك اسكەري ساتىپ الۋلار فورمالدى تۇردە اشىق بولعانىمەن، ءىس جۇزىندە مۇنداي ساتىپ الۋلارعا تەك جەرگىلىكتى ۇكىمەتتىڭ قاتىسۋىمەن عانا رۇقسات ەتىلەدى.

«رەسەي فەدەراتسياسى ەۋرازيالىق ەكونوميكالىق وداق كەلىسىمدەرىنىڭ ەرەجەلەرىنىڭ ورەسكەل بۇزىلۋىنا الاڭداۋشىلىق بىلدىرەدى. بۇل – ەكونوميكالىق وداق اياسىنداعى كەلىسىمشارتتار نەگىزىندە 2 جىل كولەمىندە مەملەكەتتىك ساتىپ الۋلارعا قاتىسۋعا جانە شىعۋعا رۇقسات ەتىلەدى دەگەن ءسوز. ال قازاقستان ۇكىمەتى قابىلداعان جاڭا زاڭ جوباسىندا بۇل مەرزىمسىز دەپ وزگەرتىلگەن. ونىڭ ۇستىنە قازاقستان ۇكىمەتى مۇنداي زاڭ جوباسىنىڭ ەنگىزىلەتىنىن ەسكەرتكەن جوق. ءبىزدىڭ ايتىپ وتىرعانىمىز - اشىق تاپسىرىس. ەۋرازيالىق ەكونوميكالىق وداققا مۇشە مەملەكەتتەر اتالعان ەلدەردىڭ قورعاسىن سالاسىنداعى مەملەكەتتىك ساتىپ الۋلارعا ەركىن قاتىسۋى ءتيىس بولعان. ال قازاقستان تارابى مۇنداي ساتىپ الۋلارعا شەكتەۋ قويىپ وتىر.»، - دەلىنگەن رف ەكونوميكا مينيسترلىگىنىڭ حاتىندا.

مەملەكەتتىك قورعانىس تاپسىرىستارى ەكى تۇردە جۇرگىزىلەدى: ءبىرىنشىسى اشىق تاپسىرىس – زات، تاۋار، ازىق-تۇلىك تاسىمالداۋ. ەكىنشىسى  جابىق تاپسىرىس – قۇپيالاندىرىلعان تاۋارلار، جۇمىس جانە ءتۇرلى قىزمەت تۇرلەرى.

ەەك كەلتىرگەن رەسمي دەرەكتەرگە سۇيەنسەك، بىلتىرعى جىلى ەۋرازيالىق ەكونوميكالىق وداق اياسىنداعى قورعانىس سالاسىنداعى ساتىپ الۋلاردىڭ جالپى كولەمى – 125,5 ميلليارد دوللاردى قۇراپتى. ونىڭ 114 ميلليارد دوللارى رەسەيدىڭ ۇپايىنا جازىلسا، 9,2 ميلليارد دوللارى قازاقستانعا تيەسىلى. بار بولعانى 700 ميلليون دوللار – ەاەو-نىڭ وزگە دە مۇشەلەرىنىڭ اينالىمىنا جازىلىپتى.

2015 جىلعى دەرەكتەر بويىنشا قازاقستان قارۋلى كۇشتەرى رەسەيدەن 4 كوپ فۋنكتسيونالدى سۋ-30سم جويعىش (يسترەبيتەل) ساتىپ العان ەكەن ( قۇنى - 5 ميلليارد رۋبل).سونىمەن قاتار، تاعى 8 اسكەري ماشينا تاپسىرىس بەرىپتى (قۇنى - 10 ميلليارد رۋبل).

رەسەيلىك باسىلىمنىڭ جازۋىنشا ققك 2020 جىلعا قاراي مۇنداي اسكەري كولىكتەردىڭ قاتارىن 32-36 كولىكپەن تولىقتىرماق ەكەن.

نۇرزات توعجان

Abai.kz