قيقار سويلەپ، حالىقتىڭ ءام الەۋمەتتىك جەلىنىڭ نارازىلىعىن تۋدىرعان دەپۋتات قاراقۇسوۆا حانىم داۋعا اينالعان مالىمدەمەسىنە قاتىستى تۇسىنىك بەردى، دەپ حابارلايدى Tengrinews.kz.

جاقىندا ءماجىلىستىڭ التىنشى شاقىرىلىمىنىڭ دەپۋتاتى گۇلجان قاراقۇسوۆا حانىم استاناداعى ەڭ قىمبات قوناق ۇيدە تۇرىپ جاتقان ءوز ارىپتەستەرىن جاقتاپ، جۋرناليستەرگە جەكىپ سويلەگەنىن جازعان ەدىك (http://abai.kz/post/view?id=7448).

ەسكى ءام جاڭا دەپۋتات قاراقۇسوۆا حانىم الەۋمەتتىك جەلىلەرگە مۇلدە كىرمەيتىنىن ايتىپ، سول ءبىر داۋلى ينتەرۆيۋدىڭ قانداي جاعدايدا الىنعانىن ءتۇسىندىرىپتى.

«ماعان 40 ادام كەلىپ، سۇراقتارىن قويا باستادى. جۋرناليستەر دە زاڭدى بىلگەنىن قالايمىن. ادام قاي جەردە جۇمىس ىستەسە دە، سوعان سايكەس قامتاماسىز ەتىلۋى كەرەك. سەبەبى: بيلىكتىڭ بارلىق سالاسى - مەملەكەتتىڭ بەينەسى. بىزگە ىسساپارمەن كەلگەن شەتەلدىك ءبىر لاۋازىمدى ادام تاڭعى اسىمىزدان ءدام تاتقىسى كەلسە نە بولادى؟ ول قايدا كەلۋى مۇمكىن ەكەنىن ەلەستەتىپ كورىڭىز. سوندىقتان ءار مەملەكەت ءوز وكىلدەرىنە سايكەس دەڭگەيدە جاعداي جاسايدى. سەبەبى ول ادام عانا ەمەس، ول سونىمەن قاتار دەپۋتات، مەملەكەتتىڭ وكىلى", - دەپ مالىمدەدى قاراقۇسوۆا تىلشىمەن تەلەفون ارقىلى اڭگىمەسىندە.

"بيلىكتىڭ زاڭناما سالالارى باسقا مەمورگاندار سەكىلدى "مەملەكەتتىك ساتىپ الۋ تۋرالى" زاڭمەن ءومىر سۇرەدى، ءبىز تاڭداۋ جاساۋعا قۇقىلى ەمەسپىز. قاڭتاردا تەندەر جاريالاندى، قاتىسقىسى كەلگەندەر ءوتىنىش بەردى. كەيىن قۇزىرلى ورگاندارعا تەندەر وتكىزىلدى، "مەملەكەتتىك ساتىپ الۋ تۋرالى" زاڭى بويىنشا ەڭ ارزانى تاڭدالادى. ەڭ ارزانىن "بەيجىڭ سارايى" بولىپ تابىلدى. تاۋلىگىنە 29 مىڭ تەڭگە", - دەدى دەپۋتات.

قاراقۇسوۆانىڭ پىكىرىنشە، دەپۋتاتتاردىڭ قوناقۇيدە تۇرۋىن تالقىلاۋ الەۋمەتتىك جەلىلەردەن باستالعان. "بارلىق سوڭعى قاقتىعىس الەۋمەتتىك جەلىلەردە باستالدى. الەۋمەتتىك جەلىلەردە ءبىزدىڭ مەملەكەتىمىزگە قارسى جۇمىس ىستەپ، اقشا تاباتىن ادامدار دا وتىرادى. سايلاۋ بولماي جاتىپ، 15 ناۋرىزدا الەۋمەتتىك جەلىلەردە دەپۋتاتتارعا 120 مىڭ تەڭگەلىك بولمەلەر بەرۋدى جوسپارلاپ جاتىر دەگەن شۋ شىقتى، تەندەر ول كەزدە وتكىزىلمەگەن دە ەدى", - دەدى ماجىلىسمەن.

ايتۋىنشا، ونىڭ داۋعا ۇلاسقان پىكىرى ءماتىن اراسىنان الىنعان ەكىۇشتى ءسوز. "لوگيكا بويىنشا بۇل سۇراق دەپۋتاتتارعا ەمەس، پارلامەنت اپپاراتىنا قويىلۋى كەرەك", - دەدى ول.

ال قاراقۇسوۆانىڭ بۇرىنعى ارىپتەسى ايگۇل سولوۆەۆا پىكىر ءبىلدىرىپ، قاراقۇسوۆانىڭ نەلىكتەن بۇلاي جاۋاپ بەرگەنىن تۇسىنبەگەندىگىن ايتقان.

«شىنىمدى ايتسام مەن دە اڭتارىلىپ قالدىم. ول كومميتەتتىڭ ءتورايىمى جانە ماڭىزدى ءبىر جيىننان شىققان بولۋى كەرەك. نەگىزىندە ول اشىق ءارى اقكوڭىل ادام»،-دەيدى ايگۇل سولوۆەۆا حانىم.

ەكس-دەپۋتات سولوۆەۆا گۇلجان قاراقۇسوۆانىڭ تىلشىلەرگە بەرگەن سۇحباتىنىڭ الدىندا كوللەكتورلىق قىزمەت تۋرالى زاڭ جوباسىن قورعاعان بولۋى مۇمكىن ەكەندىگىن ايتتى.

«بۇل سوزدەر ادامدارعا قاتىستى دۇرىس ايتىلمادى. ءاربىر ادام جۇمىس ىستەيدى، شاحتەر دە، قالعاندارى دا. سوندىقتان دەپۋتاتتىڭ مۇنداي سوزدەرى، مەنىڭشە، دۇرىس ەمەس»، – دەپ اتاپ ءوتتى ەكس-دەپۋتات.

دەپۋتات گۇلجان حانىم بيىل 66 جاسقا تولادى. ماجىلىستەگى مىندەتى – قارجى جانە بيۋدجەت كوميتەتىن باسقارۋ. ءوزى ۇستاز بولعان، ەكونوميكا عىلىمىنىڭ دوكتورى. 2007 جىلدان باستاپ بيلىك پارتياسىنىڭ قاتىرىنا قوسىلىپتى.

پرەزيدەنتتىڭ ەكونوميكالىق رەفورما جونىندەگى كەڭەسشىسى بولعان.

2001 جىلى قر ەڭبەك جانە حالىقتى الەۋمەتتىك قورعاۋ ءمينيسترى قىزمەتىنە تاعايىندالعان.

Abai.kz