وسىدان بىرنەشە كۇن بۇرىن Abai.kz اقپاراتتىق پورتالى «نۇرتىلەۋدەن اماندىق باتالوۆقا اشىق حات» (http://abai.kz/post/view?id=7095) اتتى ء(بىر جاسقا تولماعان ءسابيدىڭ اتىنان جازىلعان ءۇشبۋ حاتتى) ماتەريال جاريالاعان ەدى. الماتى وبلىسى، تالعار اۋدانى، كەڭدالا اۋىلىندا بىرەۋدىڭ سىز ۇيىندە پاتەر جالداپ تۇراتىن، سەگىز ۇلى بار وتباسىنىڭ مۇشكىل جاعدايى جازىلعان وسى حات قوعامدى ءدۇر سىلكىندىردى.  

Abai.kz جاريالاعان اتالمىش حاتقا ەلىمىزدەگى بىرقاتار اقپارات قۇرالدارى مەن الەۋمەتتىك جەلى قولدانۋشىلارى ءۇن قوسىپ، ينتەرنەت بەتىندە وسى وتباسىنىڭ جايى ءبىراز تالقىعا ءتۇستى. سول-اق ەكەن نۇرتىلەۋدىڭ وتباسىنا كومەك قولىن سوزعىسى كەلەتىن ازاماتتار كوپتەپ تابىلىپ، نۇرتىلەۋدىڭ وتباسى ءۇيلى بولدى.     

ەندى مىنە، ءبىر جاسار نۇرتىلەۋىمىز ەل ازاماتتارىنا العىس ايتىپ، تاعى دا حات جولداپتى.  وسى وتباسىنىڭ ءۇيلى بولۋىنا Abai.kz اقپاراتتىق پورتالى ازدى-كوپتى ىقپال ەتكەن سوڭ، ءداستۇر بويىنشا ءسابي نۇرتىلەۋدىڭ ءبىر ءسوزىن دە وزگەرتپەي، ونىڭ الاش جۇرتىنا العىس حاتىن جاريالاپ وتىرمىز.

Abai.kz  اقپاراتتىق پورتالى

ەل ازاماتتارىنا العىس حات

قۇرمەتتى قازاق حالقىنىڭ جاناشىر ازاماتتارى، قۇرمەتتى اماندىق اتا! مەنىڭ، مەنىڭ وتباسىمنىڭ سىزدەرگە دەگەن ريزاشىلىعىن اۋىزبەن ايتىپ جەتكىزۋ مۇمكىن ەمەس. قاتتى قۋانىشتىمىز! ويتكەنى، سىزدەردىڭ ارقاڭىزدا ءۇيلى بولدىق. ءۇيدىڭ كىلتى، قۇجاتى، مىنە، قولىمىزدا.

وتكەندە الماتى وبلىسىنىڭ اكىمى اماندىق باتالوۆقا وسى Abai.kz اقپاراتتىق پورتالى ارقىلى ءۇشبۋ حات جولداعان ەدىم. سول حاتىم وزگە دە اقپاراتتىق سايتتاردا جاريالانىپ، بىرنەشە كۇن الەۋمەتتىك جەلىلەردە تالقىلاندى. مەنىڭ ءسابي جۇرەگىمدى جارىپ شىققان جانايقايىم ءبىراز جۇرتتىڭ جاناشىرلىق سەزىمىن وياتسا كەرەك. ءبىر-اق كۇندە ءبىزدىڭ ءومىرىمىز وزگەرىپ سالا بەردى.

انامنىڭ جانارىنداعى جاس قۋانىشتان توگىلدى. اكەمنىڭ قاباعىنداعى مۇڭ ءاپ cاتتە سەيىلدى. باۋىرلارىم انە، قولدارىنا اbai.kz سايتىندا جاريالانعان ماقالانى قاعازعا شىعارىپ الىپ، ء"بىز ەل-جۇرتتىڭ ارقاسىندا ءۇيلى بولاتىن بولدىق" دەپ اسىر-سالىپ ويناپ ءجۇر.

ءبىزدى تانيتىن تانىستارىمىز، تۋىستارىمىز، كورشىلەرىمىز، ءبارى-ءبارى سىزدەرگە، ەل ازاماتتارىنا، اماندىق اتاعا العىستارىن جاۋدىرۋدا.

شىنىمدى ايتايىن، مەن ءتۇس كورىپ جاتقان سياقتىمىن. «بۇل وقيعالار وڭىمدە بولىپ جاتىر» دەگەنگە ءالى سەنە الار ەمەسپىن. مەنىڭ، مەنىڭ وتباسىمنىڭ ء«وز ءۇيى، ولەڭ توسەگى» بار ەندى. سىز ەدەن، سىزدانعان قابىرعا، كوك يىستەن ءبىرجولا قۇتىلاتىن بولدىق.

اكەم جالعا الاتىن پاتەر ىزدەپ تالاي ەسىكتى توزدىرىپ ەدى. پاتەردەن پاتەر اۋىستىرىپ ءجۇرىپ، ءبىز نە كورمەدىك؟. كىمنىڭ ءجابىر ءسوزىن ەستىمەدىك؟. ونىڭ ءبارى ارتتا قالدى. ۇمىتىلادى، ءالى-اق!

قۇرمەتتى وقىرمان قاۋىم! مەن سىزدەرگە ءوزىمىزدىڭ ءۇيىمىزدىڭ سۋرەتىن كورسەتىپ ماقتانايىنشى. مىنە، ءبىزدىڭ ءۇي. سىزدەردىڭ بىزگە سىيلاعان ۇيلەرىڭىز... بىراق، بۇل ءۇيدىڭ بۇرىنعى ەگەلەرى ءالى كوشىپ ۇلگەرمەي جاتىر. ءۇيدىڭ ىشىندەگى جيھازدار سول كىسىلەردىكى.

ادەمى، ءيا! ەندى اكە-شەشەم كومىر جاعىپ اۋرە بولمايدى. اسحانامىز دا – كەڭ. ءۇش جاتىن بولمەمىز بار. قوناق بولمەمىز – ات شاپتىرىم. دۋمان اعام ەندى ماشينەسىمەن اياق-قولىمدى باسىپ كەتپەيدى. قايسار اعام ساباعىنا كەڭ بولمەدە وتىرىپ دايىندالاتىن بولادى. مەكتەبىمىز ۇيگە ءتيىپ تۇر. مۇنداي ۇيدە تۇرعان بالا ءوزىن «باقىتتىمىن» دەۋگە تولىق قۇقىلى. مەن باقىتتىمىن، ءبىز باقىتتىمىز!

اكەم ايتادى: "بىزگە قول ۇشىن سوزعان ازاماتتاردىڭ جاقسىلىعى قۇدايدان قايتسىن» دەپ...

بىلەسىز، ءبىز شاڭىراقتا – سەگىز ۇلمىز. الەۋمەتتىك جەلىلەردە «جاعدايى جوق بولا تۇرا، مۇنشا بالانى نەگە تابا بەرگەن؟» دەگەندەر دە بولدى. انامنىڭ ارمانى – قىزدى بولۋ. ول كىسى ىلعي دا: «قىزىم بولسا، سەندەر انا سىيلاۋدى، جار سىيلاۋدى ۇيرەنەر ەدىڭدەر» دەپ وتىرادى. دەمەك، بىزگە قارىنداس كەرەك. ول قارىنداسىم قۇداي قالاسا، داڭعاراداي ۇيدە ءومىر ەسىگىن اشاتىن بولادى. 

ال، ەندى مەنىڭ باۋىرلارىمنىڭ سىزدەرگە دەگەن العىسىن قابىل الىڭىزدار...

ءۇيدىڭ ءىشى قازىر ءدال وسىنداي العىس حاتتارعا تولىپ كەتتى.

مۇنىڭ ءبارى قۋانىشتان بولىپ جاتقانىن تۇسىنگەيسىز.

وسى حاتتى وقىپ وتىرعان ءار ازاماتقا العىسىم شەكسىز. مەنىڭ جانايقايىمدى بۇكىل قازاقستانعا تاراتقان Abai.kz اقپاراتتىق پورتالىنا، سونىمەن قاتار وسى تاقىرىپتى ءىلىپ اكەتكەن بۇكىل قازاق سايتتارىنا – ريزامىز. ءبىزدىڭ جايىمىزعا الاڭداپ، ءۇن قوسقان ءار قازاققا «جاساعان جاقسىلىقتارىڭىز اللادان قايتسىن» دەگىم كەلەدى. ءتىپتى كەيبىر ازاماتتار «جەكە شوت اشىڭدار، كومەك رەتىندە اقشا اۋدارايىق» دەدى. وعان اكەم مەن انام قارسى بولدى. ء«بىزدىڭ اتىمتاي جومارت ازاماتتار سىيلاعان ءۇيىمىز بار، ءۇيى بار ادام ەشكىمگە قول جايماۋعا ءتيىس» دەيدى ولار. اتا-انامنىڭ بۇل ويى دۇرىس ەمەس پە؟!

كەشە اكەم مەن انام ءۇيدىڭ قۇجاتتارىن اكەپ: «بۇل ءۇيدىڭ يەسى – سەنسىڭ» دەدى. قۇجاتتاردى تەكسەرىپ كوردىم. ءبارى دۇرىس ەكەن.

مىنە، قۇجاتتاردى تۇگەندەپ جاتىرمىن.

قۇرمەتتى وقىرمان، سىزدەرگە ايتاتىن ءسوزىم وتە كوپ... بىراق، سول ءسوزدىڭ ءبارىن تىزسەم دە، مەنىڭ شاتتانعان كوڭىلىمنىڭ پەرنەسىن ءدال باسا الاتىن ەمەس. «اۋىزبەن ايتىپ جەتكىزە المايتىن قۋانىش بولادى» دەيدى عوي ۇلكەندەر. ءبىزدىڭ قۋانىشىمىز – ءدال سونداي قۋانىش.

ءار قازاقتىڭ ۇيىندە وسىنداي شات كۇندەر مول بولسىن!

باي، قۋاتتى بولايىق!

سالەمنەن، ءبىر جاسقا تولماعان نۇرتىلەۋ بالالارىڭىز...

P.S. بۇگىن الماتى وبلىسىنىڭ اكىمى اماندىق باتالوۆ ارنايى تالعار قالاسىنا بارىپ، نۇرتىلەۋدىڭ تىلەگىن ورىنداعان كاسىپكەرلەر مەن اتىمتاي جومارت ازاماتتارعا العىسىن ايتتى. سونداي-اق، نۇرتىلەۋدىڭ حاتتى قاتتى اسەر ەتكەنىن، سول ءۇشىن دە وسى ءبىر قۋانىشتى ءبولىسۋ ءۇشىن كەلگەنىن تىلگە تيەك ەتتى.  

Abai.kz