ءبىز ۋنيۆەرسيتەتتە وقىپ جۇرگەن جىلدارى 16 جەلتوقسان قارساڭىندا ستۋدەنتتەردى اۋىلعا قۋالايتىن ء«داستۇر» بار ەدى. جاستاردان قورىققان سەكەمشىل بيلىكتىڭ «بۇيرىعىن» ورىنداماي، «بارار جەر باسار تاۋىمىز جوق» دەپ جاتاقحانادان كەتپەي قوياتىنبىز. جاتاقحانانىڭ اۋزىندا ءبىر مۇعالىمىمىز كەزەكشىلىككە تۇرىپ، ءبىز سەكىلدى «بۇيرىققا باعىنبايتىنداردىڭ» قايدا بارىپ، قايدان كەلەتىنىن جازىپ الاتىن. ەندى وسى ء«داستۇر» سايلاۋ الدىندا دا «قولدانىلا» باستاپتى.

مەن قازىر الماتىدان وتىز شاقىرىم جەردە، اۋىلدا تۇرامىن. ەكى-ءۇش كۇن بولدى، تەلەفوندا تىنىمدىق جوق. تۋىستارىمنىڭ بالالارى، باۋىرلارىم، بالدىزدارىم: «اعا، سايلاۋعا وراي دەمالىس بەرىپ ەدى. ءبىر-ەكى كۇنگە اۋىلعا شاپقىلاعانشا، سىزدەردىكىنە بارا سالساق دەپ ەدىك» دەيدى. قازاق قوناق كەلسە قۋاناباي ما؟. «كەلىڭدەر» دەيمىز قۋانىپ...

ەندى مىنە، بۇگىننەن باستاپ، مەنىڭ ەكى بولمەلى ءۇيىم ستۋدەنتتەر جاتاقحاناسىنا اينالادى.

باۋىرلاردىڭ باسىن قوسار سايلاۋعا مىڭ راحمەت. دەسە دە، مەن ءبىزدىڭ بيلىكتىڭ كەيبىر قىلىعىن تۇسىنە المايمىن. ءبىلىم ىزدەپ، الماتىعا كەلگەن سول جاستاردى ون كۇن بۇرىن الماتىدان قۋىپ، ۇرەيلەنەتىندەي نە باستارىنا كۇن تۋدى. سول ستۋدەنتتەردىڭ دەنىنىڭ تىركەلگەن جەرى – جاتاقحانا. ياعني، ولار داۋىستى سول ۋنيۆەرسيتەتتىڭ جانىنداعى سايلاۋ ۋچاسكەسىنەن بەرۋى ءتيىس. اۋىلعا كەتكەن جاستار سوندا سايلاۋعا قالاي قاتىسپاق؟ ولاردىڭ داۋسى ماڭىزدى ەمەس پە؟ ولاردى كەيبىر وقۋ ورىندارى داۋىس بەرۋ قۇقىعىنان ايىرىپ وتىرعان جوق پا؟

تاعى دا ءوزىمنىڭ ستۋدەنت كەزىم ەسىمە تۇسەدى. سايلاۋ كۇنى تاڭ اتپاي جاتاقحانالاردى ارالاپ، توپ-توبىمىزمەن مال قايىرعانداي قايىرىپ، داۋىس بەرۋگە اپاراتىن. مەن سياقتىلار باياعى قىڭىر مىنەزىمىزگە سالىپ (سايلاۋدىڭ ادىلدىگىنە دەگەن سەنىمىمىز از ەدى), بارماي قويۋشى ەدىك. كەشكىسىن دوستارىمىز كەلىپ: «سەندەردىڭ اتتارىڭمەن ءبىز داۋىس بەردىك» دەپ كەلەتىن.

وسى وقيعا ەسىمە ءتۇسىپ، الماتىدان قۋالانعان ستۋدەنتتەردىڭ داۋسى قاي پارتياعا بەرىلەتىنىن كۇنى بۇرىن بولجاپ قويدىم.

ءبىز قانداي دەموكراتيالى ەلمىز!

جاسا، تاۋەلسىزدىك!  

ءشارىپحان قايسار

Abai.kz