باتىس قازاقستان وبلىسىنا ارنايى ساپارمەن بارعان مەملەكەت باسشىسى نۇرسۇلتان نازارباەۆ "بولاشاق-ت" جشس تۇرعىن ءۇي قۇرىلىسى كومبيناتىندا بولىپ، جاستاردىڭ باسپانا الماي جاتىپ ۇيلەنبەۋ كەرەكتىگىن ايتتى، – دەپ جازادى Skifnews.kz.

"الدىمەن باسپانالى بولۋ كەرەك، سودان كەيىن وتباسىن قۇرۋ كەرەك. ەگەر ءوز ءۇيىڭ بولماسا وتباسىن قاي جەرگە قۇراسىڭ؟! بىزدە دۇرىس ىستەمەيدى. الدىمەن باسپانا ماسەلەسىن شەشىپ الۋ كەرەك، سوسىن ۇيلەنۋ كەرەك. مەن دۇرىس ايتىپ تۇرمىن عوي؟! ۇيلەنىپ الاسىڭ دا ارى-بەرى ساندالىپ جۇرەسىڭ", – دەدى ەلباسى اتالعان كومبينات جۇمىسشىلارىمەن كەزدەسۋى بارىسىندا.

وسىلايشا، ەلباسىمىز قازاقستاننىڭ جاستارىن ءۇي-جايلى بولماي وتاۋ قۇرماۋعا ۇگىتتەپ وتىر. ەلىمىزدەگى جاستاردىڭ دەنى ونسىز دا باسپاناسىز جۇرگەنىن ەسكەرسەك، ەلباسىنىڭ بۇل سوزىنەن كەيىن الداعى 5-10 جىلدا ەلىمىزدە دەموگرافيالىق توقىراۋ ورىن الۋى مۇمكىن.

قازاقستان بيلىگى تاۋەلسىزدىك العانعا دەيىن جانە العاننان كەيىن دە ءوز جاستارىن باسپانامەن تولىق قامتاماسىز ەتە الماعان. بۇگىنگى قارقىنمەن الداعى ونجىلدىقتا دا قامتاماسىز ەتۋى ەكىتالاي. بۇل رەتتە قازاقتىڭ "باس ەكەۋ بولماي، مال ەكەۋ بولمايدى" دەگەن ماقالى تاعى ەسكە تۇسەدى. ويتكەنى، ەرتە زاماندا اتالارىمىز جاستاردى الدىمەن ۇيلەندىرىپ، سودان كەيىن عانا ەنشىسىن بەرىپ بولەك شىعارعان. ياعني، ەر ازامات وتاۋ قۇرماي دۇنيەسىنىڭ بەرەكەسى بولمايدى دەگەن سەنىم بار حالقىمىزدا.

مەملەكەت باسشىسى قازاقتىڭ وسىناۋ ماقالىن جوققا شىعاردى دەپ تۇبەگەيلى ايتۋدان اۋلاقپىز، ارينە. ەلباسىنىڭ ايتپاعى باسقا بولۋى دا مۇمكىن دەپ جازدى باسىلىم.

Abai.kz