قوعامنىڭ جاي-كۇيى جاستارىنان كورىنەدى. قازىرگى جاستاردىڭ فوبياسى قانداي؟ بۇگىنگىنىڭ جاسىنىڭ فوبياسى ەلدەن ەرەك اقىلدىلىعىندا جاتقانداي. «ويلى جاس، سەن تۇسىنسەڭ، راحمەت!» اق تاڭ اتقانىنان قاس قارايىپ باتقانشا، جاساعان ءىس-ارەكەتكە بەرىلەر ەسەپ بار ما؟..

اسحانا. «اسحانادان سالات ۇرلاۋ وپەراتسياسى». كۇيلى دەگەن وتباسىنان شىققان ءاپ-ادەمى قىزدار. سىرت كەلبەت ءتىپتى تاماشا. جاپسىرمالى كىرپىك دەيسىز بە، ەڭ قىمبات برەندتى كيىمدەر دەيسىز بە، ءتىپتى پلاستيكالىق وپەراتسيا ارقىلى جاسالعان بوتاداي كوز، ويماقتاي ەرىن، سۇيكىمدى بەت-ءپىشىنى ءبارى بار. ءبارىن دە ساتىپ الۋعا ونىڭ شاماسى جەتەدى. تەك ءبىر دۇنيەنى عانا ساتىپ الا المايدى. ول – مىنا سورەدەگى سالاتتار. ۇرلانىپ جەلىنگەن سالاتتار ءدامى «اشتىقتا جەگەن قۇيقاداي-اق». ەگەر ونى ءوز اقشاسىنا ساتىپ السا، مۇنداي ءدامدى بولماس ەدى. ەڭبەكتىڭ نانى ءتاتتى دەگەن وسى دا. قالتاسىنان اقشا شىعارىپ ساتىپ الارداي، ول اقىماق ەمەس. ول – اقىلدى. تەك ەلدەن ەرەك اقىلدى. مۇنى ءتۇسىنۋ ءۇشىن دە ەلدەن ەرەك اقىل كەرەك.

زامانداسىم ەندى پروفەسسور-وقىتۋشىنىڭ القىمىنان الىپ، جاعاسىنا جارماستى. سەبەپ – «بۇل وقىتۋشىنىڭ ءوز ورنىن بىلمەۋى». بەرىلگەن تاپسىرمانى ورىنداماعان شاكىرتكە ء«اي» دەۋگە بولمايدى. ويتكەنى، ول  ۋنيۆەرسيتەتكە تاربيە الۋ ەمەس، ءبىلىم الۋ ءۇشىن كەلەدى. تاپسىرمانى ورىنداماعان ستۋدەنت ەمەس، تالاپ ەتكەن وقىتۋشى كىنالى. 

جۇيتكىگەن الپىسىنشى اۆتوبۋس. ىشتە – ءبىزدىڭ بويجەتكەن. بۇل جولى قايتەر ەكەن دەيتىن شىعارسىز؟.. ول اۆتوبۋستا ەلەگىزىپ، ۇيىقتاپ وتىر. وسىلاي ۇيىقتاۋ ارقىلى ەكى اۋىرتپالىقتان وڭاي قۇتىلۋعا بولادى. ءبىرىنشىسى – ۇلكەندەرگە ورىن بەرۋ. ەكىنشىسى – جول اقىسىن تولەۋ. ۇلكەندەرگە ورىن بەرىپ، قايتسىن؟.. ول قارتايمايدى عوي. جول اقىسىن تولەپ قايتسىن؟.. ۇنەمدەۋ كەرەك. بۇعان دا شەبەرلىك كەرەك. قولىڭنان كەلسە، قونىشىڭنان باس.

ۇيگە كەلسە، ءىنىسى ونىڭ تەلەفون قۋاتتاعىشىن پايدالانىپ وتىر ەكەن. بۇعان كونەتىن ءبىزدىڭ قىز ەمەس. ونىڭ زاتىنا تيىسۋگە بولمايدى. ءتىپتى ءدال قازىر تەلەفونىنىڭ قۋاتى تولىق بولسا دا... ونىڭ ءوز مەنشىگىن قورعاۋعا اقىلى جەتەدى. ول – اقىلدى. تەك ەلدەن ەرەك اقىلدى.

اناسى مەن اكەسى قىزمەتىنەن ورالدى. اكەسى تەلەديداردان كوپتەن كورمەگەن ەڭ جاقىن تۋىسىن كورىپ وتىر ما، ايتەۋىر كوگىلدىر ەكراننان كوز ايىرعىسى جوق. بويجەتكەن قىز سەريالىنىڭ ۋاقىتى بولدى. عالامتوردان كورۋ ءۇشىن ءوز بولمەسىنە بارۋ كەرەك. عالامتوردى قوسۋ كەرەك. مۇنشاما كوپ تىرلىكتى اتقارىپ قايتپەك؟.. اكەسىنىڭ الدىندا جاتقان فۋلتپەن قويا سالۋ وڭايدىڭ وڭايى. بۇل ءۇشىن ەشكىمنەن رۇحسات سۇراۋدىڭ قاجەتى جوق. ول ءوز قالاۋىن عانا ورىنداۋى كەرەك. ويتكەنى، وزگەنىڭ كوڭىلىنە قاراپ جۇرەتىن ول اقىماق ەمەس. ول –  اقىلدى. تەك ەلدەن ەرەك اقىلدى.

تاڭ اتتى. ساباققا بارمادى. جاي عانا كەزەكتى جىگىتپەن كەزدەسە سالىپ، ۋاقىت وتكىزبەكشى. بۇل جىگىت الدەقانداي بولىپ، كوڭىلىنەن شىقپاي قالسا، كەزەكتىسى بار. كەزدەسۋ الدىمەن ساياباقتا باستالدى. تال تۇستە جاسالعان وبىسۋلەر جۇرت نازارىن اۋدارعانىنا ونىڭ تۇكىرگەنى بار. الدەبىرەۋلەردىڭ الدەقانداي بولىپ، بەت شىمشۋلارىنا ادەمىلەپ جاۋابىن دا بەرىپ قويدى. كىمنىڭ قانداي شارۋاسى بار؟ ونىڭ اقىلى بارىنە جەتەدى. ول – اقىلدى. تەك ەلدەن ەرەك اقىلدى.

بۇگىن نە ىستەدىم دەۋ جوق. ەرتەڭ نە قىلماقپىن دەۋ جوق. ءسىرا، باقىت دەگەنىڭ وسى شىعار... ءبارى دە ەلدەن ەرەك اقىلدىلىعىنىڭ ارقاسىندا.

باقىتجان وتارباەۆا

Abai.kz