جەر رەفورماسى جونىندەگى كوميسسيانىڭ كەزەكتى وتىرىسى اتىراۋدا ءوتتى.

حالەل دوسمۇحامبەتوۆ اتىنداعى ۋنيۆەرسيتەت عيماراتىندا بولعان جيىندا بەلسەندى توپتىڭ وكىلى اسەل نۇرعازيەۆا كوشپەلى كوميسسيا مۇشەلەرىنە، اتىراۋ وبلىسى اكىمى نۇرلان نوعاەۆقا، كوميسسيا توراعاسى اسقار يسابەكۇلىنا جانە ونىڭ ورىنباسارى جاقسىلىق ۇشكەمپىروۆكە قاماۋداعى بەلسەندىلەر «تالعات ايان مەن ماكس بواەۆقا بوستاندىق» دەگەن جازۋى بار جەيدەشەلەر تابىستادى.

«مۇحتار اعا، مەرەكە اعا، زامانداستارىم مۇحتار، ايدوس، سىزدەر كوميسسيانىڭ 25 مۇشەسى كەلدىڭىزدەر عوي. ەندى اتىراۋدان تەكتەن تەككە كەتپەڭىزدەر. بۇگىن وسىنداعى ءار قايسىسىڭىز قولدارىڭىزدان كەلسە، جەكە تالاپ قويىڭىزدار. مىندەتتەمە الىڭىزدار. سوندا عانا ءبىز كوميسسيانىڭ جۇمىسىنا ريزا بولامىز. سوندا عانا بالالار ەشقايدا قاشپايدى. ول بالالار ەلدىڭ، جەردىڭ قامى ءۇشىن شىرىلداپ جۇرگەن جىگىتتەر. اتىراۋدان كەتپەي تۇرعاندا وسى كوميسسيانىڭ بارلىق مۇشەلەرى وسى ەكى بالانى شىعارىپ الىڭىزدار. كوميسسيا جەتەكشىلەرى، تاعى دا اتىراۋعا قوش كەلىپسىزدەر. ەندى سىزدەرگە شاپان كيگىزە المايمىز. بىراق ماكس پەن تالعاتتى قولداپ جۇرگەن ازاماتتار، وتىز شاقتى ارنايى فۋتبولكالار دايىنداپ ەدىك. سونى الىڭىزدار»، - دەدى اسەل نۇرعازيەۆا.

«جەركومنىڭ» جيىنىنا جەر ساتۋعا العاش بولىپ قارسىلىق كورسەتىپ، قاماۋعا الىنعان اتىراۋلىق ازاماتتاردىڭ اتا-انالارى مەن بەلسەندى توپ وكىلدەرى دە قاتىسقان ەكەن.

ءساۋىردىڭ ورتا شەنىندە اتىراۋلىق بەلسەندىلەر ۇكىمەتتىڭ جەردى شەتەلدىكتەرگە ساتۋ مەن ۇزاق جىلعا جالعا بەرۋ تۋرالى باستاماسىنا نارازىلىق ءبىلدىرىپ، اتىراۋداعى ماحامبەت-يساتاي الاڭىنا جينالعان ەدى. وسىدان كەيىن وبلىس باسشىسى نۇرلان نوعاەۆ مىرزانىڭ ءوزى دە الاڭداعى حالىقتىڭ الدىنا كەلىپ، باسۋ ايتقان-تىن.

بۇل جولعى «جەركوم» جيىنىنا سول ميتينگىنى ۇيىمداستىردى دەپ ايىپتالعان تالعات ايان مەن ماكس بوقاەۆتىڭ انالارى دا كەلگەن.

ساۋىردەگى تولقۋلار كەزىندە وبلىس باسشىسى ەشبىر ازاماتتىڭ قامالمايتىنىن حالىق الدىندا ايتقان ەدى. الايدا اكىم سوزىندە تۇرمادى. جيىنعا كەلگەن انالار وسىلاي دەپ ايتتى.

«مەن ەشكىمگە سەنبەيمىن، سوندىقتان بار شىندىقتى وسى حالىقتىڭ الدىندا ايتقالى وتىرمىن. سەبەبى، ەرتەڭ 10-15 كۇنەن كەيىن بالامنىڭ سوتى بولادى. مەنىڭ بالام اپپاق، ءوزىم مەكتەپتە مۇعالىم بولىپ 35 جىل جۇمىس ىستەدىم. بالامدى وتە جاقسى تاربيەلەدىم. بالامنىڭ ستاتياسى مەنىڭ قولىمدا تۇر. ون قايتارا وقىپ شىقتىم. ءۇتىر-نۇكتەسىنە دەيىن بىلەمىن، جاتتاپ الدىم. ەندەشە تىڭداڭىزدار، ايتايىن. تولەشوۆ دەگەن بىرەۋ بار ەكەن شىمكەنتتە. ول مەنىڭ بالامدى سىرتىنان كورىپتى دە ۇناتىپ قالىپتى، سودان 100 مىڭ دوللار اقشا جىبەرىپتى. ول اقشانى كومەكشىسىنە بەرگەن، كومەكشىسى ءوزىنىڭ كومەكشىسىنە بەرگەن، ول اقتاۋعا جەتكىزگەن، اقتاۋداعى بىرەۋ 1000 تەڭگەگە تاكسي ۇستاپ، اتىراۋعا كەلىپتى دە اقشانى تالعاتقا بەرىپتى. وسىنداي ەرتەگىگە سەنەسىزدەر مە؟ مىنانى مەنىڭ 7-كلاستا وقيتىن بالدارىما ايتسا سەنبەيدى عوي. سىزدەر قالاي سەنىپ وتىرسىزدار؟», – دەيدى تالعات اياننىڭ اناسى. ول اتىراۋ وبلىسىنىڭ اكىمى نۇرلان نوعاەۆقا «سوزىڭدە تۇرمادىڭ» دەپ رەنىشىن ايتتى.

الەۋمەتتىك جەلىدە جاريالانعان بەينە جازبانى قارايتىن بولساڭىز، اتىراۋلىق بەلسەندى وبلىس باسشىسىنانا "تارتۋ" جاساعان ساتتە، نوعاەۆ مىرزانىڭ كوزى شاراسىنان شىعىپ كەتە جازدادى. نەگە؟

نۇرزات توعجان