باتىس قازاقستان اگرارلىق-تەحنيكالىق ۋنيۆەرسيتەتى سوناۋ كەڭەس زامانىندا ىرگەسى قالعانعان ەلدەگى ىرگەلى وقۋ ورىندارىنىڭ ءبىرى. ونىڭ ات شاپتىرىم 60 گەكتار وزىنە تيەسىلى جەرى بولىپ ەدى. وقۋ ورنى ونى كۇنگى كەشەگە دەيىن يگى ماقساتتارعا پايدالاندى.

ءالى دە پايدالانا بەرەتىن ەدى. قازىر ونىڭ كولەمى تۋرا وتىز گەكتارعا ازايىپ كەتكەن. بۇل وتىز گەكتاردى ۋنيۆەرسيتەتكە 2002 جىلدان رەكتور بولىپ باسقارىپ كەلگەن قازىباي ءبوزىموۆتىڭ ءوزى يەمدەنىپ كەتتى. بىرەر جىلدان بەرى رەكتورلىقتى باسقا ادامعا بەرگەنىمەن، ءوزى سول ۋنيۆەرسيتەتتىڭ قۇرمەتتى رەكتورى رەتىندە سول وقۋ ورنىنىڭ يگىلىگىن بۇرىنعىشا ءوزى پايدالانىپ كەلەدى. ول ءبىر جىلدارى وبلىستىڭ تەرەكتى، تاسقالا سياقتى اۋداندارىنىڭ شۇرايلى جەرلەرىنەن وقۋ ورنىنىڭ وندىرىستىك باعىتتاعى شارۋاشىلىعىنا ارنايى تەگىن جەر العان بولاتىن. وعان ۋنيۆەرسيتەتتىڭ ستۋدەنتتەرىن جەگىپ ەگىن سالادى، ءبىراز مال باسىن دا ۇستايدى. ونىڭ ءبارىن كوكتەم مەن كۇزگى ۋاقىتتاردا ستۋدەنتتەر اتقارادى، بىراق ەڭبەكتەرىنە ەشتەڭە تولەمەيدى. ونىمەن قويماي، باسقا وقۋ ورىندارىنىڭ ستۋدەنتتەرىن دە رەكتورلارىمەن كەلىسە وتىرىپ، تەگىن جۇمىسقا تارتادى. ستۋدەنتتەر پراكتيكادان وتكەندەرىنە عانا ءماز.  

بۇل ق.بوزىموۆتىڭ ۇستىنەن بۇدان بىرەر جىل بۇرىن وبلىستىق قارجى پوليتسياسى 38 ميلليون تەڭگەگە قاتىستى الاياقتىق بويىنشا ءىس تە قوزعاعان. بۇل ءىستىڭ اقىر اياعىندا ول رەكتورلىقتان عانا ءتۇسىپ قالدى. ميلليونداعان قارجى جىمقىرىلسا دا، تەك سونداي «جازامەن» عانا قۇتىلدى. بۇل وقيعا بىلايشا ءوربيدى. بوزىموۆ بقاتۋ-دە رەكتور بولعان كەزىندە الدە ادەيى، الدە شىنىمەن دە تابىس تابۋدى كوزدەپ، الينا حاكالو دەگەن ايگىلى الاياق قۇرعان قارجى پيراميداسىنا العاشقىدا  66 ميلليون تەڭگە اقشا اۋدارعان. ودان كەيىن ءتارتىپ بويىنشا جەتپىس كۇن كۇتىپ، سوسىن وسى قوردان بيزنەستى دامىتۋعا گرانت اقشا الۋى ءتيىس ەدى. ق.بوزىموۆ ول مەرزىمدى كۇتپەي حاكالومەن ەكىنشى كەلىسىمشارت جاساسىپ، الگى قورعا تاعى 66 ميلليون تەڭگە اۋدارادى. سودان كەيىن عانا قوردان گرانت ەسەبىندە 44 ميلليون تەڭگە الادى. ارادا كىشكەنە ۋاقىت وتكەندە، دالىرەك ايتقاندا 2013 جىلدىڭ ىشلدە ايىندا الينا حاكالومەن تاعى دا كەلىسىمشارت جاساسىپ، بۇل جولى دا 66 ميلليون تەڭگە اۋدارادى. سودان 2013 جىلدىڭ تامىز ايىندا رەكتوردىڭ قولىنا 44 ميلليون تەڭگە گرانت تيەدى. بىزگە تۇسىنىكسىز وپەراتسيالار وسىلاي جالعاسا بەرەدى دە جىلدىڭ اياعىندا بارىپ، ق.بوزىموۆتىڭ اقشالاي العان گرانتى 160 ميلليون تەڭگەنى قۇرايدى. ال ونىڭ الگى قورعا اۋدارعان اقشاسى 198 ميلليون تەڭگەگە جەتكەن. سونىڭ سالدارىنان مەملەكەتتىك جوعارى وقۋ ورنى 38 ميلليون تەڭگە شىعىنعا باتادى. بۇل تۋرالى كەزىندە ءبىراز باسىلىمدار شۋلاپ جازعانىمەن، جابۋلى قازان جابۋلى كۇيىندە قالدى. 

ق.بوزىموۆ وبلىسقا جاڭادان كەلگەن قۇقىق قورعاۋ ورگاندارى باسشىلارىن مىندەتتى تۇردە قوناققا شاقىرىپ، قوناقاسى بەرەدى. بىردەن جاقىن تانىسۋعا تىرىسادى. ول دا تەگىن جاي ەمەس-اۋ...

اسقار قۋانباي، ورال قالاسى

Abai.kz