«انامنىڭ ۇيىندە ۇنەمى «اسىل ارنا»قوسۋلى تۇرادى. ول كىسىنىڭ نامازعا جىعىلىپ،ورازا ۇستاعانىنا كوپ جىل بولدى. الماتىداعى جاندوسوۆ پەن روزىباكيەۆ قيىلىسىنداعى مەشىتتە كۇنى-ءتۇنى دۇعا جاسايدى، اراب ءتىلىنىڭ ساباعىنا بارادى. 38 جاسىندا جەسىر قالعان جالعىز باستى ايەلدىڭ ومىردەگى تىرەگى وسى بوپ تۇر. بىراق،مەنىڭ ايتايىن دەگەنىم بۇل ەمەس. كوزبەن كورىپ وتىرعانىم مەنى قاتتى الاڭداتادى. «اسىل ارنا» دا، مەشىتتەگى يمامدار دا شىنايى ومىردەن وتە الشاق-اۋ...»، - دەپ جازادى جۋرناليست.

ونىڭ ايتۋىنشا، رەسپۋبليكا دەڭگەيىندە تەرروريستىك قاۋىپتىڭ سارى دەڭگەيى جاريالانعاندا، اناسى بۇل تۋرالى مۇلدە بەيحابار بولىپ شىققان. وسى ورايدا حالىقتى سابىرعا شاقىرىپ، ءدىني ساۋاتتى اشۋدا ارقا سۇيەيتىن جالعىز ارنا دا ء«لام-ليم» دەمەگەن. وسىدان بارىپ باق وكىلى ءبىر سالادا بىتە قايناسقان ارىپتەستەرىنىڭ جۇمىسىن سىنعا الدى.

«...«اسىل ارنانى» كورىپ وتىرىپ بايقايمىن، ولاردىڭ باعدارلاماسى بۇگىنگى كۇننىڭ تالابىنا ساي ەمەس. اقتوبەدەگى وقيعادان ەشقانداي ساباق الماعان، ەتەك جەڭىن جيماعان. حابارلارى سول كۇيىنشە، جايبىراقات، سولىڭقى كۇيدە ءجۇرىپ جاتىر. ال، مەنىڭشە، اقتوبە وقيعالارىنان كەيىن بۇل ارنا بۇكىل «سەتكاسىن» قايتا قاراپ، xابارداعى ەكپىندى، نازاردى نەگە اۋدارۋ كەرەكتىگىن ءجىتى باقىلاپ، مەملەكەت مۇددەسىن، قالا بەردى تىنىشتىعىمىزدى قورعايتىن بىردەن ءبىر ارنا بولۋعا ءتيىستى ەدى عوي»، - دەپ كۇيىنەدى تەلەجۇرگىزۋشى.

وسى ورايدا مەشىتتەگى يمامدار ۇلكەن كىسىلەرگە دە، جاستارعا دا قۇران سۇرەلەرىن عانا ەمەس، سونداي-اق بۇل مەملەكەت قازىر قانداي كەزەڭدى باستان وتكەرىپ جاتقانىن، ءتۇرلى ءدىني اعىمداردىڭ جەتەگىندە كەتىپ، قاتەلەسكەن مومىنداردى جولعا سالۋ جونىندە سويلەسۋ كەرەك دەپ سانايدى ول.

«اناممەن وسى ماسەلەلەردى قوزعاپ تىلدەسەيىن دەسەم، اڭگىمەمىز مۇلدە جاراسپايدى. ول كىسى ءيا بۇل جايتتاردان xابارسىز، ءيا مەشىتتەردە تەك قانا مۇسىلمان پارىزى جايلى اڭگىمە بولادى. الاڭداۋ، وسى جايلى ويلانۋ، جاقىندارىمەن سويلەسىپ، ەڭ ءبىرىنشى وتباسىنا بەرىك بولۋ جوق. قۇدايعا قۇلشىلىقتى ءبىرىنشى ورىنعا قويىپ، قاسىنداعى جاقىندارىن كورمەۋگە شاقىرا ما بىلمەيمىن... ءومىر بولەك، ءدىن بولەك. ۇيدە دە بولەك ادام بولا باستادىق. الاڭدايمىن...»، - دەپ ويىن تۇيىندەدى د.نۇرجىگىت.

Abai.kz