الماتىدا «دوستىق» سپورت كەشەنىندە قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلىنىڭ جۇلدەسى ءۇشىن قازاق كۇرەسىنەن ەرەسەكتەر اراسىندا 3-رەسپۋبليكالىق تۋرنير ءوتتى.

ءتول كۇرەسىمىزدەن وتكەن دوداعا ءار وڭىردەن ىرىكتەلىپ شىققان ەڭ مىقتى 60 بالۋان كۇش سىناستى. ءار وبلىستان ىرىكتەلىپ  شىققان  بالۋانداردىڭ  وسالى جوق. «دوستىق» سپورت كەشەنىنە جانكۇيەرلەر دە كوپ جينالدى. بۇل ۇلتتىق سپورتقا، ونىڭ ىشىندە قازاق كۇرەسىنە دەگەن قۇرمەت پەن قوشەمەتتىڭ دەڭگەيىن اڭعارتسا كەرەك. وسىلايشا، الماتى قالاسىنىڭ تورىندە جاقسى ءداستۇر جالعاسىن تاپتى.

يگى شارانى قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ەرجان قاجى مالعاجىۇلى، الماتى قالاسى اكىمىنىڭ ورىنباسارى ارمان ورازبايۇلى، ەرەجەسىز جەكپە-جەكتەن الەم چەمپيونى قۋات حاميتوۆ، بەيجىڭ وليمپياداسىنىڭ قولا جۇلدەگەرى اسەت مامبەتوۆ تاماشالادى.

جارىستىڭ  اشىلۋ سالتاناتىندا باس ءمۇفتي ەرجان قاجى مالعاجىۇلى قازاق كۇرەسى – ۇرپاقتان-ۇرپاققا ۇمىتىلماي جەتكەن ءداستۇرلى ونەر ەكەنىن ايتا كەلە، جاماعاتتىڭ اۋىز بىرشىلىگىن ارتتىراتىن بۇل شارا ءداستۇرلى تۇردە جالعاساتىنىن ايتتى.

«قازاق كۇرەسى – ۇلتتىق ءداستۇرىمىز. قازاق كۇرەسى داستۇرىمىزبەن قوسا، دىنىمىزبەن دە استاسىپ جاتىر. بۇل ونەر پايعامبارىمىزدان (اللانىڭ وعان سالاۋاتى مەن سالەمى بولسىن) كەلە جاتقان سۇننەت. اللا ەلشىسى ءبىر حاديسىندە: «كۇشتى مۇسىلمان اللا تاعالا قۇزىرىندا ءالسىز مۇسىلماننان جاقسىراق»، – دەگەن. سوندىقتان، يمامدارىمىز ءار وڭىردە ۇلتتىق سپورتتىڭ باسقا تۇرلەرىنەن دە جارىستار ۇيىمداستىرىپ كەلەدى. مۇنداي باستامالار قوعامدى بىرلىك پەن ىنتىماققا، باۋىرمالدىق پەن كىشىپەيىلدىلىككە شاقىرادى. يمامدارىمىز تەك ۋاعىز ايتىپ، مەشىتتە ناماز وتكىزۋمەن شەكتەلمەي، حالىق اراسىندا يماندىلىق پەن اۋىزبىرشىلىكتى امالدارى ارقىلى ناسيحاتتاپ كەلەدى»، – دەدى باس ءمۇفتي ەرجان قاجى مالعاجىۇلى.

بوز كىلەمدە تەر توككەن بالۋانداردىڭ اراسىنان توپ جارىپ سۇرىنبەي وتكەن  نۇرجان مەرتاەۆ پەن ءبىرجان مولداشەۆ باس جۇلدەنى ساراپقا سالدى. ەكى نار جىگىتتىڭ قايسىسى باسىم تۇسەدى دەگەن كوپتىڭ كوكەيىندەگى ساۋالعا بوزكىلەمدەگى بەلدەسۋ عانا جاۋاپ بەردى. اتادان اسىپ تۋعان نۇرجان جانۇشىرا دەم بەرگەن جانكۇيەردىڭ قولداۋىمەن قارسىلاسىنىڭ جاۋىرىنىن جەرگە تيگىزىپ، باس جۇلدەنى جەڭىپ الدى.

سونىمەن، باس بايگەگە تىگىلگەن ۇلكەن قاجىلىققا جولدامانى شىعىس قازاقستان وبلىسىنان كەلگەن نۇرجان مەرتاەۆ قانجىعاسىنا بايلادى. ەكىنشى ورىندى ۇتىپ العان اتىراۋ وبلىسىنىڭ اتىنان قاتىسقان ءبىرجان مولداشەۆ پەن ءۇشىنشى ورىندى يەلەنگەن الماتى وبلىسىنان كەلگەن شىڭعىس تۇرسىنحانوۆ كىشى قاجىلىققا تەگىن جولدامانى يەمدەندى.

سونىمەن قاتار، باس ءمۇفتي ەرجان قاجى مالعاجىۇلى ءبىرىنشى ورىندى جەڭىپ العان نۇرجان مەرتاەۆتىڭ جاتتىقتىرۋشىسىنا دا ۇلكەن قاجىلىق سەرتيفيكاتىن تابىستادى.

اسەت بەكتۇر، قمدب ءباسپاسوز ءبولىمىنىڭ باس مامانى

Aباي-اقپارات