الماتى وبلىسى، قاراساي اۋدانىنا قاراستى جاڭاتۇرمىس اۋىلىنداعى مەكتەپتىڭ ۇستازى ايمان ساعيدۋللاەۆانى وقىرمان قاۋىم جاقسى تانيدى. وسى شىناشاقتاي عانا ايمان قىز ۇستازداردىڭ سەنبىلىكتەرگە بارۋىنا، ديرەكتورلاردىڭ پارمەنىمەن ءتۇرلى كونتسەرتتەرگە بيلەت ساتىپ الۋعا، سونىمەن قاتار مۇعالىمدەردى ءماجبۇرلى تۇردە قوعامدىق جۇمىستارعا سالۋعا قارسىلىعىن ءبىلدىرىپ، وقىتۋشىلار قۇقىعىن قورعاپ ءجۇر. مۇعالىمنىڭ جانايقايى مينيسترلىكتىڭ قۇلاعىنا ءىلىنىپ، تالاي كۇرمەۋلى ماسەلەنى شەشكەنىن دە جاقسى بىلەمىز. سول ايمان ساعيدۋللاەۆاعا بۇگىن قاراساي اۋدانىنىڭ ءبىرتوپ اقساقالدارى قىسىم جاساپتى. ونى بىزگە ۇستازدىڭ ءوزى حابارلاپ ايتىپ بەردى.

ايمان ساعيدۋللاەۆا، ۇستاز:

– بۇگىن ساعات ەكى جارىمدار شاماسىندا مەنى ديرەكتور شاقىرتتى. تۇستەن كەيىن ساباعىم جوق ەدى. بارسام مەنى ءبىر توپ اقساقال مەن ءبىر ايەل كۇتىپ وتىر ەكەن. ولار مەنىڭ ماسەلەمدى قاراۋعا جينالعانعا ۇقسايدى. وسى ءبىر تۇسىنىكسىز جيىنعا قاراساي اۋدانىنا قاراستى رايىمبەك اۋىلدىق وكرۋگىنىڭ اكىمى  ايدىن اۋەسباي باستاعان، ەلتاي جانە رايىمبەك اۋىلدىق وكۋرگتارىنىڭ اقساقالدار القاسىنىڭ توراعالارى، قىرعاۋىلدى اۋىلىنىڭ اقساقالى جانە كىم ەكەنى بەيمالىم ءبىر ايەل كىسى قاتىستى. مەنى تەزگە سالماق بولعان بۇل جينالىستا ۇزىن سانى ون ادام بولدى. وزىمە كەرەك بولار دەپ، ولاردىڭ اتى-جوندەرىن تولىق جازىپ العان ەدىم. سىرتقا شىعىپ كەلسەم، الگى قاعازدى ايەل ازاماتشا ۋماجداپ سومكەسىنە سالىپ جاتىر ەكەن. «ول قاعازدى كورگەن جوقپىن» دەپ ءتان الماي قويدى.

جينالىستاعى العاشقى ءسوزدى ايەل ازاماتشا الدى.

ول ءبىزدىڭ مەكتەپكە بالاسىن اكەلمەكشى ەكەن. سول ءۇشىن وسى مەكتەپتى سىرتتاي زەرتتەپتى. ول كىسىنىڭ سوزىنە سەنسەك، مەكتەپتىڭ اينالاسى لاس كورىنەدى، ەشقانداي جۇمىس جاسالمايدى ەكەن، ۇستازدار اراسىندا ىنتىماق-بىرلىك جوق ەكەن. بۇعان باستى سەبەپكەر وپپوزيتسونەر ايمان ساعيدۋللاەۆا-مىس. «مۇنداي مۇعالىمى بار مەكتەپكە بالامدى قالاي وقىتامىن، ونىڭ بولاشاعىن قايتىپ سەنىپ تاپسىرامىن» دەگەنگە ساياتىن ءبىراز اڭگىمە ايتىپ، ماعان دۇرسە قويا بەردى. ء«سىز نەگە مۇعالىمدەردى سەنبىلىككە شىقپا دەپ ۇگىتتەيسىز، وتانىمىزدىڭ تازا بولۋىنا قارسىسىز با؟ اتا-انا مەن ۇستازدار بولىپ بىرىگىپ، تازالىق جۇرگىزسەك، ونىڭ نەسى جامان؟» دەگەن ىڭعايدا ماعان ۇرسىپ تا الدى. «مەكتەپتەگى جۇرتتىڭ ديرەكتوردى تىڭدامايتىنى»، «وقۋشىلاردىڭ مەنى جاقسى كورەتىنى»، «مۇعالىمدەردىڭ مەنى قولدايتىنى» ول كىسىگە ىرىتكى سالۋ بولىپ كورىنەدى ەكەن.

ءوزىڭىز ويلاڭىزشى... ءالى ءبىزدىڭ مەكتەپكە بالاسىن اكەلمەگەن ادامنىڭ مەنىڭ ماسەلەمدى بۇلاي قاراۋعا حاقىسى بار ما؟ مەنى قانداي دەرەككە سۇيەنىپ قارالاپ وتىر؟. بالاسى وسى مەكتەپتە وقيتىن اتا-انا بولسا تۇسىنۋگە بولار. ال، ايدالاداعى ادام كەلىپ، مەنى تارپا باس سالاتىنداي قىلمىس جاساعان جوقپىن.

مۇنى كىم ۇيىمداستىرعانىن سۇراپ بىلمەك بولدىم. اسىلبەك قوجانوۆ اتتى اقساقال «مەكتەپتە ىنتىماق، بىرلىك بولسىن دەپ ۇيىمداستىرىپ ەدىم» دەدى. سوندا جاڭاتۇرمىستىڭ حالقى از بولعانداي، مەنىڭ ماسەلەمدى اۋدان اقساقالدارى قارايتىن بولعانى ما؟ بۇلاردىڭ ءبارى نەگە بەلسەنە قالدى؟ تۇسىنبەيمىن.

يمانجان دەگەن اقساقال: «قايدا بارسام دا، ايمان دەگەن اتتى ەستيمىن» دەپ رەنىشىن ءبىلدىردى.

مەنىڭ تاماعىم كەۋىپ، سويلەۋ قيىنداپ كەتكەن سوڭ، سۋ ىشۋگە شىقپاق بولدىم. بىراق، ولار مەنى سۋعا دا جىبەرمەي، ءۇش ساعات بويى جينالىسقا جاقسىلاپ تۇرىپ سالدى. ءۇش ساعات بويى تانىمايتىن ادامداردىڭ قىسىمىن كورۋ وڭاي ما؟ مەنى سۋعا جىبەرگەن سوڭ، جازىپ وتىرعان قاعازىمدى دا ۇرلاپ الدى. جينالىستىڭ ورتاسىندا جۋرناليستەرگە «قىسىم جاسالىپ جاتقانىن» ايتپاق بولىپ سىرتقا شىعىپ كەتىپ ەدىم، ول ءۇشىن دە ءبىراز ءسوز ەستىدىم.  

اقىرى جۇرەگىم اۋىرىپ، سوعۋى جيىلەپ كەتكەن سوڭ، «جادەل جاردەم» شاقىرۋعا ءماجبۇر بولدىم.

بۇل مەكتەپكە بالاسىن وقىتۋعا ءالى اكەلمەگەن اتا-انانىڭ تاباسىنا قالدىراتىنداي نە جازىعىم بار ەدى؟. مەكتەبىمىزدىڭ ديرەكتورى بەكجان بازارقۇلقىزى نۇسىپبەكوۆادان اتالمىش اتا-انانىڭ كىم ەكەنىن سۇرادىم. ول كىسى ول ايەلدى تانىمايتىنىن ايتتى. سوندا تانىمايتىن ادام مەملەكەتتىك مەكەمەگە كەلىپ جينالىس وتە بەرەتىن بولعانى ما؟ مۇعالىمدەردى باسى ارتىق، قوعامدىق جۇمىستارعا جەگىپ قويۋعا قارسىلىق ءبىلدىرىپ، اۋدان كولەمىندە ۇستازداردىڭ قۇقىعىن قورعاعانىم ءۇشىن بۇلاي جينالىسقا سالۋ دۇرىس ەمەس.

ءتۇيىن

ايمان ساعيدۋللاەۆانىڭ نەگىزسىز ءۇش ساعاتتىق جينالىسقا سالۋعا اتا زاڭىمىز قالاي قارايدى؟

مۇعالىمنىڭ قۇقىعىن اياققا تاپتاپ، اقساقالدار مەن بەلگىسىز اتا-انانىڭ تاباسىنا قالدىرىپ وتىرعان كىم؟

بۇل سۇراقتارعا جاۋاپ تاپپاي، ايمان ساعيدۋللاەۆا دا، Abai.kz اقپاراتتىق پورتالى دا  توقتامايدى.

ا، ايتپاقشى، مەكتەپتىڭ ديرەكتورى ايمان ساعيدۋللاەۆاعا وسى سەنبى كۇنى، ياعني 21 مامىردا، پەدكەڭەس وتەتىنىن، وعان قاتىسپاسا، قىزمەتتەن بوسايتىنىن ەسكەرتىپتى.

ءشارىپحان قايسار

Abai.kz