بەلگىلى ساياساتكەر مۇحتار تايجان بيلىكتەگى مەملەكەتتىك ءتىلدى مەنسىنبەيتىن كەيبىر جوعارعى لاۋازىم يەلەرىنىڭ بيلىكتەن كەتۋىن تالاپ ەتتى. بۇل تۋرالى «qazaquni.kz» پورتالى جازدى.

مۇتار تايجان، ساياساتكەر:

-ەلدىڭ ەكونوميكاسىن بۇلار توناپ، ءبۇلدىرىپ تاستادى. ەندى ولار ەكونوميكانى تۇزەتە المايدى. مەن بۇنى باياعىدا ءتۇسىندىم. قانداي ساۋاتتى مامان بولسا دا، جۇرەكتە ۇلتتىق وت جانىپ تۇرماسا – ءىستىڭ ءبارى بوس، دالباسا. كوكىرەگىندە تازا نيەت جوق بولسا، قايتەسىڭ؟

سوندىقتان، 1 قىركۇيەكتەن باستاپ – جاڭا ساياسي ماۋسىمدا – ۇكىمەت پەن پارلامەنتتىڭ  وتىرىستارى تەگىس مەملەكەتتىك تىلدە - قازاق تىلىندە ءوتۋ كەرەك. جەركومنىڭ وتىرىستارى تازا قازاق تىلىندە ءوتىپ اقىرى ناتيجەسىن كورسەتتى. ويتكەنى قازاق ءتىلى – ول دەموكراتيا مەن ادىلەتتىلىكتىڭ ءتىلى. قازاقشا سويلەپ تۇرىپ قازاق حالقىنا زيان تيگىزەتىن شەشىمدى قابىلداۋ قيىن بولادى.

سوڭعى 10-15 جىلدىڭ ىشىندە ەلدىڭ دەموگرافياسى قاعيدا تۇرعىسىندا وزگەرىپ كەتتى. قازاقستاندىقتار قازاق ءتىلدى حالققا اينالىپ ۇلگەردى. سول سەبەپتەن قازاق ءتىلىن بىلمەيتىن ۇكىمەتتىڭ مۇشەلەرى جانە سونداي پارلامەنت دەپۋتاتتارى ورىندارىن ءوز ەركىمەن بوساتىپ كەتۋ كەرەك. جاڭا مينيسترلەر مەن دەپۋتاتتار پرەزيدەنت سياقتى قازاق تىلىنەن ەمتيحان تاپسىرسىن. بولدى، ءبىز قازاق ءتىلىنىڭ مەملەكەتتىك مارتەبەسىن پارمەندى تۇردە تالاپ ەتەتىن ۋاقىت كەلدى.

بۇل ۇكىمەت پەن پارلامەنت قازاقستاننىڭ وككۋپاتسيالىق ورگاندارى بولماسا، مەملەكەتتىڭ تىلىندە سويلەسىن. ال سويلەسە المايتىندار كەتسىن، ولاردىڭ كەزى ءوتتى. زامان وزگەردى.

Abai.kz