بۇگىن ارتىستەر قان تاپسىردى. وبلىستىق قان قۇيۋ ورتالىعى مەن «قىزىل اي» قوعامدىق قورىنىڭ وڭىردەگى فيليالى ءازىل-سىقاق جانە ساتيرا تەاترىندا «قان وتكىزىپ، دونور بول» بىرلەسكەن اكتسياسىن ۇيىمداستىردى. بەلسەندىلىك تانىتقان ازىلكەشتەردىڭ اراسىندا رەسپۋبليكالىق ساحنالاردا ونەر كورسەتىپ جۇرگەن ساڭلاقتار دا بار. بۇل تۋرالى «Abai.kz» پورتالى otyrar.kz سايتىنا سىلتەمە جاساي وتىرىپ حابارلايدى.

نۇرجان قۇلشىنباەۆ ۇنەمى گوسترولدىك ساپاردا جۇرەدى. الىس-جاقىن شەت مەملەكەتتەرگە دە ءجيى شىعادى. قاربالاس جۇمىس دەنساۋلىققا كوڭىل بەرۋگە مۇرشا بەرمەيدى دەيدى ول.

دەگەنمەن، ورايلى ءساتتى وڭتايلى پايدالانعان ونەر ادامى بۇگىن اكتسياعا ەڭ العاش بولىپ كەلدى. ءتيىستى ساراپتامالاردان ءوتىپ، ومىرىندە ءبىرىنشى رەت قان تاپسىرىپ دونور اتاندى. كۇن ۇزاققا سوزىلعان شارادا 20 شاقتى دونور 8 ليترگە جۋىق قان تاپسىردى.

ۇيىمداستىرۋشىلار حالىق دەنساۋلىعى ءۇشىن ماڭىزدى اقتسيا قان تاپشىلىعىنىڭ الدىن الىپ، حال ۇستىندە جاتقان ناۋقاستاردى امان الىپ قالۋعا سەبەپ بولادى دەيدى. الايدا «قىزىل اي» قوعامىنىڭ مۇشەلەرىن حالىقتىڭ قان تاپسىرۋعا كەلگەندە ەنجارلىعى قىنجىلتادى.

ساراپشىلار بۇگىندە ەلىمىزدە مىڭ ادامعا 15 دونوردان كەلەتىنىن ايتادى. بۇل دامىعان ەلدەردەگى كورسەتكىشپەن سالىستىرعان 3 ەسەگە تومەن.

Abai.kz