وڭتۇستىك قازاقستان وبلىسىندا ءشامشى قالداياقوۆتىڭ تۋعان كۇنىنە وراي ايگىلى سازگەر اتىنداعى «مەنىڭ قازاقستانىم» وبلىستىق ءان بايقاۋىنىڭ اشىلۋ سالتاناتى ءوتتى. اشىلۋ راسىمىنە قاتىسقان وبلىس اكىمىنىڭ ورىنباسارى ۇلاسبەك سادىبەكوۆ ءداستۇرلى ءان فەستيۆالى العاش رەت كومپوزيتوردىڭ تۋعان جەرى وتىرار اۋدانىندا ءوتىپ جاتقانىن ايتىپ، بارشا قاتىسۋشىلارعا ساتتىلىك تىلەدى.

بايقاۋدىڭ 1-2 كەزەڭدەرىنەن ءوتىپ، اقتىق سىنعا جولداما العان 20 ۇمىتكەر بۇگىن باق سىناۋدا. ال باس جۇلدە جانە ءبىرىنشى ورىن يەگەرلەرى ءشامشى قالداياقوۆ اتىنداعى حالىقارالىق «مەنىڭ قازاقستانىم» ءان فەستيۆالىنە قاتىسۋعا جولداما الادى.

ءان فەستيۆالىندە كومپوزيتور، ءشامشىتانۋشى، قازىلار القاسىنىڭ توراعاسى قالدىبەك قۇرمانالى، مادەنيەت قايراتكەرلەرى حاديشا شالاباەۆا، نۇرلان ءادىلحانوۆ، «وركەن» ءانسامبلىنىڭ كوركەمدىك جەتەكشىسى وركەن رىسداۋلەتوۆ جانە حالىقارالىق، رەسپۋبليكالىق بايقاۋلاردىڭ لاۋرەاتى ءمادىحان دۇيسەەۆ قازىلىق ەتۋدە.

ايتا كەتەيىك، بايقاۋدىڭ 1-2 كەزەڭدەرى 29 ماۋسىم مەن 5 تامىز ارالىعىندا شىمكەنتتەگى «كورمە» ورتالىعىندا ءوتىپ، وعان وبلىسىمىزدىڭ اۋدان، قالالارى مەن وقۋ ورىندارىنان 17-29 جاس ارالىعىنداعى 100-گە جۋىق ۇمىتكەر قاتىسقان. ونەرسۇيەر قاۋىم اۋداندىق مادەنيەت سارايىندا ۇيىمداستىرىلعان «ساعىنىش سازىن سامعاتقان — ءشامشى» كورمەسىن تاماشالادى.

ال بايقاۋدىڭ ماراپاتتاۋ ءراسىمى مەن گالا-كونتسەرتى تۋعان توپىراقتى تەبىرەنتىپ، اسپانىن انگە بولەۋ ماقساتىندا تۇڭعىش رەت قازاققا عاسىرلار وتسە دە ونەردىڭ ولمەس تۋىندىلارىن سىيلاپ كەتكەن دارا تۇلعانىڭ وسكەن اۋىلى — ءشامشى قالداياقوۆ اۋىلىندا وتكەلى وتىر.

گالا-كونتسەرتكە ش.قالداياقوۆ اتىنداعى وبلىستىق فيلارمونيا مەن وبلىستىق وپەرا جانە بالەت تەاترىنىڭ انشىلەرى، ج.شانين اتىنداعى اكادەميالىق قازاق دراما تەاترى، وبلىستىق ءازىل-سىقاق جانە ساتيرا تەاترى، «وڭتۇستىك-تسيرك»، سۇگىر اتىنداعى قازاق ۇلت-اسپاپتار وركەسترى، «قازىنا»، «تۇمار» بي انسامبلدەرى جانە بالەت توبى قاتىسادى.

Abai.kz