قۇرمەتتى، اماندىق اعا!

مەن سىزگە امالىم تاۋسىلعاندىقتان حات جازىپ وتىرمىن. الماتى وبلىسى، قاراساي اۋدانى، جاڭاتۇرمىس اۋىلىندا مۇعالىم بولىپ قىزمەت ىستەپ ءجۇرمىن. ۇستازدىڭ باستى مىندەتتى – ۇرپاققا ءبىلىم مەن تاربيە بەرۋ! وسى مىندەتتى ۇمىتىپ، مۇعالىمدەردى قارا جۇمىسقا سالعىسى كەلەتىندەرگە قارسى تۇرىپ، مەكتەپتەردە اقشا جيناتپاي، ۇستازدار قۇقىعىن قورعاعانىم ءۇشىن مەنى اۋداندىق اتقامىنەرلەر «حالىق جاۋى»  ەتىپ الدى.

6-شىلدە كۇنى Facebook الەۋمەتتىك جەلىسىندەگى «ۇستازدار قوزعالىسى» پاراقشاسىندا مىنانداي جازبا جاريالاۋعا ءماجبۇر بولدىم.

«ەگەر بولاشاقتا «ايمان ءوز-وزىنە قول جۇمسادى» دەسە سەنبەڭىزدەر! سەبەبى مەنىڭ پسيحيكام دۇرىس. دارىگەردەن انىقتامام بار. قىزىمدى ءوسىرۋ ءۇشىن بار ءومىرىمدى ارناپ جۇرگەن اداممىن. بالامدى تاستاپ ەشقاشان ءوز-وزىمە قول جۇمسامايمىن. ەگەر دە كوشەدە بايقاۋسىزدا ماشينا قاعىپ كەتىپ جاتسا، اياقاستى بيىكتەن قۇلاپ كەتىپ، مەرت بولىپ جاتسام دا – سەنبەڭىزدەر. ويتكەنى، ىشىمدىك اتاۋلىعا جان-تانىممەن قارسى اداممىن. ول جاعىنان دا سەنىمدى بولۋلارىڭىزدى سۇرايمىن. ياعني،  ەسىرتكىگە جاقىندامايتىنىمدى ايتقىم كەلىپ وتىر. «جۇرگەن جەرىمدە سومكەمە بىردەڭە سالىپ جىبەرە مە؟» دەپ الاڭداپ جۇرەتىن بولدىم».

اماندىق اعا، مەن مۇنداي جازبانى بەكەردەن بەكەر جازبايتىنىمدى تۇسىنەرسىز دەپ ويلايمىن. بۇلاي ايتۋىما اۋداندىق دەڭگەيدەگى شەندىلەردىڭ مەنىڭ ارتىما شىراق الىپ تۇسكەنى سەبەپ بولىپ وتىر.

2016 جىلدىڭ 19-مامىرىندا  قاراسايلىق اقساقالدار («قاراسايلىق اقساقالدار ۇستازعا قىسىم كورسەتتى») ماعان قىسىم كورسەتىپ، نەگىزسىز ايىپتاپ، جينالىسقا سالدى.  

جينالىستان ءبىر كۇن وتكەن سوڭ، ياعني 20-21-مامىر كۇندەرى مەنى انتيكوررۋپتسيا پوليتسەيلەرى تەرگەۋگە الىپ كەتتى. بۇعان سەبەپ، كىم ەكەنى بەلگىسىز بىرەۋلەر مەنىڭ ۇستىمنەن شاعىم ءتۇسىرىپتى.

ونى باۋىرجان كاريپوۆتىڭ «كوكەيكەستى» اتتى يۋتۋب جەلىسىندە جاريالاعان ۆيديوسىنان كورەرسىز.

ارادان ون شاقتى  كۇن وتكەندە، ياعني 2-ماۋسىم كۇنى ماعان مەكتەبىمىزدىڭ ديرەكتورى تۇسكە دەيىن ەسكەرتۋ، تۇستەن كەيىن سوگىس بەرەدى. ەسكەرتۋدە 19-مامىر كۇنگى اقساقالدار جينالىسىندا پەدوگوگيكالىق ادەپ نورمالارىن ساقتامادى دەگەن كىنا تاعىلادى.  بۇل تۋرالى Abai.kz پورتالى «شىنشىل ۇستاز قىزمەتتەن قۋىلا ما؟» دەگەن تاقىرىپتا ماقالا جاريالاعان بولاتىن.

ءوز قۇقىعىن تالاپ ەتىپ، شىندىقتى عانا ايتىپ جۇرگەن ۇستازدى بەلگىسىز ءھام تۇسىنىكسىز ادامدار جابىرلەپ جاتقانىنان اۋداندىق ءبىلىم ءبولىمى ءھام وبلىستىق ءبىلىم باسقارماسى حاباردار بولا تۇرا ەشقانداي شارا قولدانباي وتىر.

امالسىزدان مەن سوتقا شاعىمدانىپ، ءوز قۇقىعىمدى قورعاۋعا بەل شەشە كىرىسىپ ەدىم. ەندى، مىنە سوتقا بەس كۇن قالعاندا مەنى جەمقورلىقپەن كۇرەس جۇرگىزەتىن پوليتسەيلەر (سۇلتان سۇلەيمەن)  قوڭىراۋ شالىپ، مازالاي باستادى.

ماعان 5 شىلدە كۇنى كەشكى ساعات 19.30  شاماسىندا قاراساي اۋدانى ىشكى ىستەر باسقارماسىنىڭ اعا لەيتەنانتى  سۇلتان سۇلەيمەن مىرزا قوڭىراۋ شالدى.  «سىبايلاس جەمقورلىققا بايلانىستى تەرگەۋدە بولىپسىز، ول جابىلىپ، 4-باپ بويىنشا قىلمىستىق ءىس قوزعالدى. كەلىڭىز، ەگەر كەلمەسەڭىز پوليتسەيلەردى جىبەرەمىن» دەدى. «شاقىرتۋ قاعاز جىبەرسەڭىز عانا بارامىن» دەپ جاۋاپ بەردىم.

الماتى قالالىق جانە وبلىستىق سىبايلاس جەمقورلىقپەن كۇرەس  مەكەمەلەرىنە قوڭىراۋ شالىپ، نە بولىپ جاتقانىن سۇرادىم. تەرگەۋشى ەرجان مىرزا ماعان قوڭىراۋ شالعان پوليتسيا وكىلىمەن دۇيسەنبى كۇنى كەزدەسەتىن بولىپ شەشتى. سونىمەن قاتار «سىزدەن جەمقورلىق جاساعانىڭىز تۋرالى دالەل تاپپادىق» دەدى. سىبايلاس جەمقورلىق مەكەمەسىنىڭ باسشىسى  س.پوتانين  مىرزا  2016 جىلدىڭ 22-ماۋسىمىندا ماعان ءىستىڭ جابىلعانى تۋرالى  رەسمي  حات جولدادى.

اماندىق باتالوۆ مىرزا! ەندىگى سەنىمىم وزىڭىزدە. مەن ءوزىم ءۇشىن ەمەس، كەلەر ۇرپاق ءۇشىن، ۇستازدار ءۇشىن الاڭدايتىن مامانمىن! وقۋشىلارعا دۇرىس ءبىلىم مەن تاربيە بەرگىم كەلەدى. بىراق، وسى ماقساتىما توسقاۋىل قويعىسى كەلەتىندەر ويىنا كەلگەنىن ىستەپ جاتىر.

وتىنەمىن، وبلىستىق ءبىلىم باسقارماسىنىڭ باسشىسىنا ەسكەرتىپ، مەنى زاڭسىز قۋدالاپ جاتقاندارعا تىيىم سالىڭىزشى!

ايمان ساعادۋللاەۆا

Abai.kz