شىمكەنتتە تاعى ءبىر وتاندىق ءتول تۋىندى تۇسىرىلمەك. وعان دايىندىق جۇمىستارى باستالىپ تا كەتكەن. ءبىز رەجيسسەر ۇيىمداستىرعان كاستينگتىڭ قىزعان شاعىنا تاپ بولدىق.

مۇندا اكتەر بولىپ، باستى ءرولدى سومداعىسى كەلەتىن جاستاردىڭ قاراسى قالىن. ءتىپتى اپتاپ ىستىققا قاراماي كەلگەن بوزبالا مەن بويجەتكەندەردىڭ ىنتاسى ءبىز ويلاعاننان دا اسىپ ءتۇستى. الايدا، ولارعا قويىلعان تالاپ جەڭىل ەمەس. بەرىلگەن ماتىنگە ساي بەلگىلى ءبىر ءرولدى سول جەردە سومداپ شىعۋ قاجەت.
ءومىردىڭ قادام باسقان سايىن الدىڭنان شىعا كەلەتىن سان ءتۇرلى قيىندىقتارىنا شىداس بەرۋگە جاس جۇبايلاردىڭ كۇشى جەتە مە؟ ولار بالالارىنىڭ كوز جاسىنا قالماۋ ءۇشىن قانداي تاۋەكەلدەرگە بارادى؟ قوعامداعى اجىراسۋ ماسەلەسى جانە باسقا دا ماڭىزدى الەۋمەتتىك كەكىلجىڭدەرگە توسقاۋ بولار نە؟ مىنە، جاڭا تۋىندى وسى سۇراقتار توڭىرەگىندە ءوربيدى. 

سەرىك تالاس، رەجيسسەر: «جاڭا فيلمگە 100-گە تارتا اكتەر قاراستىرىپ جاتىرمىز. ىرىكتەۋگە كەلگەن جاستاردىڭ تەڭ جارتىسىندا تۋىندىعا قاتىسىپ، رول سومداۋعا مۇمكىندىگى بار. اكتەردىڭ وزىنە دە كوپ نارسە بايلانىستى. ىنتاسى بار دارىندى ۇمىتكەركەرگە ءتىپتى باس ءرولدى دە ۇسىنا الامىز.»

ايتا كەتەيىك، بۇل — كۇنگەيدەگى تالانتتى جانداردىڭ قازاق كوركەمفيلمىنىڭ قورجىنىنا قوساتىن العاشقى ءتول تۋىندىسى ەمەس. جۋىردا عانا جاستاردىڭ كوزايىمىنا اينالىپ ۇلگەرگەن «Hello, اۋىل» ءفيلمى تۇساۋىن كەسكەن بولاتىن.

«يۋتيۋب» جەلىسىندە سوڭعى 2 ايدىڭ ىشىندە بۇل ءفيليمدى 1 360 108 ادام تاماشالاعان. ال ەندى عانا قولعا الىنىپ جاتقان باستاماعا 4 ملن 200 مىڭ تەڭگە قاراستىرىلىپ وتىرعان كورىنەدى. مۇنداي قولداۋدى وبلىستىق جاستار ورتالىعى كورسەتىپ وتىر. ءفيلمنىڭ قاي ايدا، قاي كۇنى ۇلكەن ەكرانعا شىعاتىنى ءالى بەلگىسىز. دەگەنمەن، تامىز ايىندا ءتۇسىرىلىم باستالادى دەپ ۋادە ەتىلدى. كوزى قاراقتى كورەرمەن قازاق كينوگەرلەرىنىڭ بۇل تۋىندىسىن اسىعا كۇتەندەرىڭىزگە كامىل سەنىمدىمىز.

Abai.kz